កីឡា

Kazushima ដាក់គោលដៅជួបកីឡាករខ្លាំងៗទូទាំងពិភពលោក

បានផុស

១ year មុន

នៅ

ថ្ងៃសុក្រ ១៩ មេសា ២០២៤

ដោយ

កីឡាករប្រដាល់ឃីកបុកស៊ីងទម្ងន់ស្រាលជប៉ុន Riku Kazushima ម្ចាស់ខ្សែក្រវាត់ RISE Flyweight Championship បានដាក់គោលដៅជួបជើងខ្លាំងដើម្បីបង្ហាញសមត្ថភាពរបស់ខ្លួនឲ្យពិភពលោកបានឃើញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Kazushima បានចូលហ្វឹកហាត់ក្បាច់គុនតាំងពីក្មេងអាយុ ៥ ឆ្នាំ ដោយចាប់ផ្តើមពីកីឡាការ៉ាតេ។ ក្រោយមកចូលហ្វឹកហាត់ប្រដាល់សេរីនៅថ្នាក់ទី ៦ និងបានឈ្នះជើងឯក ៦ លើក ក្នុងនាមជាអ្នកប្រដាល់សេរីកាលជាយុវជន។ Kazushima បានបង្ហាញខ្លួនក្នុងការប្រកួតអាជីពដំបូងកាលពីថ្ងៃទី២០ ខែកញ្ញា ឆ្នាំ២០២០ នៅសង្វៀន RISE EVOL 6 ទល់នឹងមិត្តរួមជាតិកីឡាករ Rui Kasami ដោយបានឈ្នះពិន្ទុជាឯកច្ឆន្ទ។

មិនមែនត្រឹមតែជាកីឡាករប្រដាល់វ័យក្មេងពោរពេញដោយសមត្ថភាពប៉ុណ្ណោះទេ Kazushima ក៏ជាកីឡាករការ៉ាតេដ៏ល្អផងដែរ។ ស្ថិតក្នុងវ័យ២១ឆ្នាំ អ្នកប្រដាល់ជនជាតិជប៉ុនម្នាក់នេះ បានដាក់គោលដៅពង្រឹងសមត្ថភាពខ្លួនឲ្យឈានដល់កំពូលតាមរយៈការជួបកីឡាករខ្លាំងៗទូទាំងពិភពលោក។

កីឡាករ Riku Kazushima បាននិយាយថា៖ «នៅទីនេះមានអ្នកប្រដាល់ខ្លាំងៗជាច្រើនទូទាំងពិភពលោក។ ពួកគេមកពីស្ថាប័នផ្សេងៗគ្នា។ ខ្ញុំនឹងជួបពួកគាត់ម្នាក់ម្តង ហើយធ្វើឲ្យកេរ្ដិ៍ឈ្មោះរបស់ខ្ញុំត្រូវបានគេទទួលស្គាល់។ សូមបន្តគាំទ្រខ្ញុំ»។

ទោះបីជាយ៉ាងណា ក្នុងប្រភេទទម្ងន់ស្រាល ៥១.៥ គីឡូក្រាម បច្ចុប្បន្ននេះមិនសូវមានអ្នកប្រដាល់ខ្លាំងៗច្រើនទេដែលជាហេតុធ្វើឲ្យ Kazushima ពិបាកស្វែងរកដៃគូ។ បើចង់ជួបកីឡាករខ្លាំងៗ លុះត្រាឡើងទម្ងន់ចាប់ពី ៥៣ គីឡូក្រាម។

Riku Kazushima រៀបរាប់ថា ៖«និយាយតាមត្រង់ទៅ គ្មានគូប្រកួតខ្លាំងណា ដែលខ្ញុំចង់ជួបទេឥឡូវនេះ។ វាមិនមានបញ្ហាថា តើត្រូវចេញប្រកួតក្រៅស្រុក ឬនៅជប៉ុននោះទេ ឲ្យតែមានដៃគូខ្លាំងគឺខ្ញុំជួបទាំងអស់។ ជួបដៃគូខ្លាំងធ្វើឲ្យខ្ញុំអាចបញ្ជាក់ថា ខ្ញុំមានសមត្ថភាពល្អយ៉ាងណា»៕