ព័ត៌មានអន្ដរជាតិ

ផ្ទុះភ្នំភ្លើងនៅអ៊ីស្លង់ ព្រួសកម្អែ កម្ពស់៥០ម៉ែត្រពីដី

បានផុស

២ years មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

Chheang

បន្ទះដ៏ខ្លាំងក្លាមួយ បានកើតឡើងនៅក្នុងរណ្ដៅភ្នំភ្លើង Sundhunkur ក្នុងឧបទ្វីប Reykjanes ភាគនិរតីនៃប្រទេសអ៊ីស្លង់ កាលពីថ្ងៃពុធ ទី២៩ ខែឧសភា ដោយបាញ់កម្អែទៅលើផ្ទៃមេឃកម្ពស់ខ្ទង់៥០ម៉ែត្រឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការិយាល័យឧតុនិយមអ៊ីស្លង់ (IMO) បានឲ្យដឹងថា ការផ្ទុះបានចាប់ផ្តើមនៅម៉ោងប្រហែល ១២ និង ៤៦ នាទីយប់ ម៉ោងក្នុងតំបន់កាលពីថ្ងៃពុធ ដែលបណ្តាលឲ្យមានលំហូរនៃកម្អែភ្នំភ្លើងដ៏ខ្លាំងមួយនៅជុំវិញភ្នំភ្លើង Hagafell ទៅទិសខាងកើត និងបន្ទាប់មកហូរទៅភាគខាងត្បូងឆ្ពោះទៅតំបន់អណ្តូងរ៉ែ Melhólsnáma។ ក្រហែងប្រេះនៃកម្អែភ្នំភ្លើង មានចម្ងាយប្រមាណជា ៣,២គីឡូម៉ែត្រពីកន្លែងផ្ទុះ។

អាជ្ញាធរនៅក្នុងតំបន់ បានព្រមានថា ការហូរកម្អែភ្នំភ្លើង បច្ចុប្បន្ន មានចម្ងាយនៅមិនដល់១គីឡូម៉ែត្រនោះទេពីរបាំងការពារកម្អែភ្នំភ្លើងភាគខាងជើងក្រុង Grindavik។ ទន្ទឹមនោះ ក៏មានការជម្លៀសប្រជាជនចេញពីក្រុង Grindavik ព្រមទាំងតំបន់ទេសចរណ៍ Blue Lagoon ដែលជាកន្លែងស្ប៉ាទឹកក្ដៅធម្មជាតិដ៏ល្បីល្បាញ។

អាជ្ញាធរអ៊ីស្លង់ ក៏បានព្រមានផងដែរពីការសាយភាយនៃឧស្ម័នពុល ដែលអាចបក់បោកទៅភាគអាគ្នេយ៍នៃតំបន់ ហើយក៏អាចបក់ទៅភាគខាងកើតឆ្ពោះទៅរកក្រុង Selvogur និងក្រុង Olfus។

នេះគឺជាបន្ទុះភ្នំភ្លើងលើកទី៥ និងខ្លាំងបំផុតក្នុងតំបន់ គិតចាប់តាំងពីខែធ្នូ ឆ្នាំ២០២៣។ បន្ទុះភ្នំភ្លើងនៅរណ្ដៅ Sundhunkur បានចាប់ផ្ដើមសកម្មឡើងៗ ដោយវាបានផ្ទុះចំនួន៨លើកមកហើយ គិតចាប់តាំងពីខែមីនា ឆ្នាំ២០២១ បន្ទាប់ពីស្ងប់ស្ងាត់ការផ្ទុះអស់រយៈពេល៨០០ឆ្នាំកន្លងមក៕

ដោយ៖ ឈាង