Ronaldo ជាកីឡាករបង្ហាញខ្លួនច្រើនជាងគេក្នុងព្រឹត្តិការណ៍ EURO

តារាឆ្នើម Cristiano Ronaldo ទោះបីមានវ័យចំណាស់ពិតមែន ប៉ុន្តែរូបគេនៅតែទទួលការទុកចិត្តពីលោក Roberto Martínez គ្រូបង្វឹកក្រុមជម្រើសជាតិព័រទុយហ្គាល់។

ស្ថិតក្នុងវ័យ៣៩ឆ្នាំ កីឡាករ Cristiano Ronaldo ជាកីឡាករបាល់ទាត់នៅអឺរ៉ុបទី១ បង្ហាញខ្លួនបានច្រើនបំផុតក្នុងព្រឹត្តិការណ៍ EURO ជុំចុងក្រោយ។ រូប​គេ​បាន​បង្ហាញខ្លួន​ឲ្យ​ក្រុមជម្រើសជាតិព័រទុយហ្គាល់ ក្នុងព្រឹត្តិការណ៍ EURO ៦​រដូវ​កាល​ជាប់​គ្នា​គឺ​ឆ្នាំ២០០៤ ២០០៨, ២០១២ ២០១៦ ២០២០ និង២០២៤។

ព្រឹត្តិការណ៍អឺរ៉ូឆ្នាំ២០០៤ Ronaldo ​លេង​បាន៦លើកឲ្យក្រុមជម្រើសជាតិព័រទុយហ្គាល់ សរុប​៤១៨នាទី ស៊ុតបញ្ចូលទីបាន២គ្រាប់ បញ្ចូលបាល់ឲ្យមិត្តរួមក្រុមស៊ុតបញ្ចូលទីបាន២លើក ក្នុងវ័យត្រឹមតែ១៩ឆ្នាំ។

ខ្សែប្រុយទ្ធឆ្នើម Ronaldo កំពុងកាន់​កំណត់ត្រាសំខាន់​ៗ​ជាងច្រើនទៀតក្នុង​ពានរង្វាន់អឺរ៉ូ ក្នុងនោះ​ជាកីឡាករស៊ុតបញ្ចូលទីច្រើនបំផុតក្រោយ​រក​បាន​១៤គ្រាប់ និងជាកីឡាករបង្ហាញខ្លួនច្រើនបានចំនួន២៥​ប្រកួត​ ជាមួយក្រុមជម្រើសជាតិព័រទុយហ្គាល់ នៅជុំចុងក្រោយ។ សម្រាប់ស្ថិតិរបស់របស់រូបគេអាចនឹងប្រែប្រួលបន្ថែមក្នុងការប្រកួតពានរង្វាន់ EURO ឆ្នាំ២០២៤។

ក្រុមជម្រើសជាតិទ័រទុយហ្គាល់ស្ថិតក្នុងពូល F រួមមានក្រុមជម្រើសជាតិតួកគី ហ្សកហ្ស៊ី និងសាធារណរដ្ឋឆែក។ ការប្រកួត​ជុំចុងក្រោយពានរង្វាន់ EURO មានក្រុមចូលរួម​២៤ក្រុម ហើយបែងចែកជា៦ពូល ក្នុងនោះក្រុម​លេខ​១​និង​លេខ​២​ ប្រចាំពូលនីមួយៗ និងក្រុមលេខ៣ល្អបំផុតចំនូន៤ក្រុម ឡើងទៅវគ្គ១៦ក្រុមចុងក្រោយ៕​

អត្ថបទ៖ ផា រតនា