ព័ត៌មានជាតិ

ពលរដ្ឋភូមិទឹកចេញសំណូមពរអាជ្ញាធរជួយជួសជុលស្ពានឈើមួយកន្លែងដែលទ្រុឌទ្រោមខ្លាំង

បានផុស

៥ years មុន

នៅ

ថ្ងៃចន្ទ ១ មីនា ២០២១

ដោយ

ស្ពានឈើមួយកន្លែងដែលមានបណ្ដោយប្រវែង១០ម៉ែត្រ ទទឹង៧ម៉ែត្រ ស្ថិតនៅក្នុងភូមិទឹកចេញ ឃុំក្បាល ស្រុកទឹកផុស ខេត្តកំពង់ឆ្នាំង ក្នុងពេលនេះបានរងការបែកបាក់ទ្រុឌទ្រោមយ៉ាងខ្លាំង ដែលធ្វើឱ្យប្រជាពលរដ្ឋដឹកកសិផលចេញចូលជួបការលំបាក ហេតុនេះពួកគាត់សំណូមពរដល់អាជ្ញាធរ ឃុំស្រុក និងខេត្ត មេត្តាជួយជួសជុលស្ពាននៅខាងលើនេះឱ្យពួកគាត់ដោយសេចក្តីអនុគ្រោះផង។

លោក ឡែម ឈិន មេភូមិទឹកចេញនៅល្ងាចថ្ងៃទី២៨ ខែកុម្ភៈ ឆ្នាំ២០២១នេះ បាននិយាយឲ្យដឹងថា ស្ពានឈើមួយកន្លែងនេះបានរងការខូចខាតជាយូរមកហើយ ដែលពេលនេះកាន់តែមានសភាពទ្រុឌ ទ្រោមកាន់តែខ្លាំង ធ្វើឲ្យប្រជាពលរដ្ឋនៅក្នុងភូមិឃុំជួបការលំបាកក្នុងពេលដឹកកសិផលដែលផលិតបាននៅតាមស្រែចម្ការដឹកយកទៅលក់នៅទីផ្សារ ។ មិនតែប៉ុណ្ណោះនៅក្នុងរដូវវស្សាពេលភ្លៀងខ្លាំងក៏ត្រូវទឹកជំនន់ធ្លាក់ចុះពីលើភ្នំហូរលិចជាញឹកញាប់ផងដែរ ហេតុដូចនេះលោកនិងប្រជាពលរដ្ឋនៅក្នុងភូមិសូមសំណូមពរ អាជ្ញាធរនិងស្ថាប័នពាក់ព័ន្ធ មេត្តាជួយជួសជុលស្ពានឈើខាងលើនេះជូនប្រជាពលរដ្ឋដោយអនុគ្រោះផងចុះ។

ប្រជាពលរដ្ឋរស់នៅក្នុងភូមិទឹកចេញក៏បានឱ្យដឹងទៀតថា នៅតំបន់ភូមិទឹកចេញនេះគឺជាភូមិដែលមានទីតាំងជាប់នឹងជើងភ្នំឱរ៉ាល់ ហើយផ្លូវលំនៅក្នុងតំបន់នេះក៏មានការខូចខាតដោយអន្លើៗជាច្រើនកន្លែងផងដែរ ជាហេតុនៅរដូវវស្សាពេលមានភ្លៀងធ្លាក់មក ប្រជាពលរដ្ឋធ្វើដំណើរជួបការលំបាកយ៉ាងខ្លាំង។

ដោយឡែកចំណុចស្ពានឈើខាងលើនេះ ពេលភ្លៀងធំម្ដងៗត្រូវទឹកជន់លិចប្រមាណ១០០ម៉ែត្រខាងកើតស្ពាននេះ ធ្វើឲ្យចរាចរណ៍ទៅមកត្រូវកកស្ទះ។ ហេតុនេះប្រជាពលរដ្ឋស្នើសុំអាជ្ញាធរនិងស្ថាប័នពាក់ព័ន្ធជួយជួសជុលស្ពាននៅចំណុចខាងលើនេះផង ៕

អត្ថបទ ៖ ឈៀង ថារិទ្ធ