ពលរដ្ឋ​សំណូមពរ​អាជ្ញាធរ​ជួសជុល​ជង្ហុក​មួយ​កន្លែង​ ដើម្បី​បង្ការ​គ្រោះថ្នាក់​ ពិសេស​គឺពេល​រាត្រី

ភ្នំពេញ ៖ ប្រជាពលរដ្ឋ​ធ្វើដំណើរ​ឆ្លង​កាត់ បណ្តោយផ្លូវ ហ៊ុននាង ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បាន​សំណូមពរ​ដល់​អាជ្ញាធរ​មេត្តា​ជួយពិនិត្យមើល និង​ជួលជុល​ជង្ហុក​មួយ​កន្លែង​ ដែល​តែងតែ​បង្ក​គ្រោះថ្នាក់​ដល់​អ្នក​ធ្វើ​ដំណើរ ជា​ពិសេស​នោះ​នៅ​ពេលរាត្រី។

ប្រជាពលរដ្ឋ​រស់​នៅ​ជិតនឹងផ្លូវជង្ហុក បាន​លើក​ឡើង​ថា​ ផ្លូវ​មួយ​នេះ​ពី​មុន​មាន​រថយន្តដឹកខ្សាច់ដឹក​ឆ្លងកាត់រាល់ថ្ងៃ ដោយយកទៅចាក់ធើ្វការអភិវឌ្ឍន៍នៅ​ខាង​ក្នុងផ្លូវ៦០ម៉ែត្រ ធើ្វ​ឱ្យ​កើត​មាន​ជង្ហុក​តូចមួយ​នៅ​ទីនេះ ហើយជង្ហុក​មួយ​នេះ​ផង​ដែរ ដំបូងឡើយ​តូច​ទេ តែ​ដោយសារ​មានភ្ញៀងធ្លាក់ផង​ក៏​មាន​ទឹក​ដក់​កើត​ជា​ជង្ហុក​ធំ​ទៅៗ ហើយ​នៅ​ពេល​មាន​ទឹកដក់​ក្នុងជង្ហុកនេះ​ អ្នក​ធើ្វ​ដំណើរ​ឆ្លង​កាត់​មើល​មិន​ឃើញ អាច​ធ្លាក់​ដួល​ធ្វើ​ឱ្យគ្រោះថ្នាក់​។

ចំណែក​ពលរដ្ឋម្នាក់ទៀត​បានលើកឡើង ស្រដៀង​នេះដែរ​ថា នៅ​ពេល​ដែល​ឃើញមានអ្នក​ដួល​ច្រើននាក់​ គាត់​ក៏បានយកដី រឺ កំទេចថ្ម យកទៅចាក់បំពេញ ដើម្បី​បញ្ចៀស​មាន​អ្នក​ដួល តែ​មិន​យូរប៉ុន្មាន ជង្ហុក​មួយ​នេះ​បានមកជាសភាពដើមវិញ ដូច្នេះ​លោក​សូម​សំណូមពរ​ដល់ អាជ្ញាធរ​ពាក់ព័ន្ធមេត្តាជួយជួសជុលឡើងវិញផង។

ជុំវិញ​បញ្ហាជង្ហុក​នេះ លោក ជា សុខៃ ចៅសង្កាត់ចាក់អង្រែក្រោម បានឱ្យកម្ពុជាថ្មីដឹងថា លោកនឹងចុះទៅពិនិត្យជាក់ស្ដែង ហើយ​នឹង​ជួសជុល​ជា​បន្ត​បន្ទាប់៕

អត្ថបទ ៖ ម៉េង