ព័ត៌មានជាតិ

ចប់ហើយ ! តុលាការកាត់ទោស សម រង្ស៉ី ដាក់នាគារ២៥ឆ្នាំ និងដកហូតសិទ្ធិបោះឆ្នោត សិទ្ធិឈរឈ្មោះ

បានផុស

៤ years មុន

នៅ

ថ្ងៃចន្ទ ១ មីនា ២០២១

ដោយ

so pon

មន្ត្រីជាន់ខ្ពស់សាលាដំបូងរាជធានីភ្នំពេញបានឲ្យដឹងថា នៅថ្ងៃទី០១ ខែមីនា ឆ្នាំ២០២១នេះ បានបើកសវនាការប្រកាសសាលក្រមកាត់ទោសលោក សម រង្ស៉ី និងបក្ខពួក ក្នុងសំណុំរឿង “ឧបឃាត” តាមមាត្រា២៧ និង៤៥១ នៃក្រមព្រហ្មទណ្ឌ ដែលសវនាការកាត់ទោសនោះ មានលោក ឌុច សុខសារិទ្ធ ប្រធានក្រុមប្រឹក្សាជំនះជម្រះ និងលោក សេង ហៀង ជាតំណាងអយ្យការ។

ក្នុងនោះ សម រង្ស៊ី ត្រូវបានចៅក្រមសម្រេចឲ្យជាប់ពន្ធនាគារ២៥ឆ្នាំ ព្រមទាំងដកហូតសិទ្ធិបោះឆ្នោត និងសិទ្ធិឈរឈ្មោះបោះឆ្នោតផងដែរ ចំណែកលោកស្រី ជូឡុង សូមួរ៉ា, លោក ម៉ែន សុថាវរិន្ទ្រ, លោក អ៊ូ ច័ន្ទឫទ្ធិ, លោក ហូរ វ៉ាន, លោក ឡុង រី និងលោក នុត រំដួល ជាប់ពន្ធនាគារ២០ឆ្នាំ។ រីឯលោកស្រី មូរ សុខហួរ និងលោក អេង ឆៃអ៊ាង ត្រូវជាប់ពន្ធនាគារចំនួន២២ឆ្នាំ។

សូមបញ្ជាក់ថា លោក សម រង្ស៉ី ត្រូវបានចោទប្រកាន់ពីបទ “ឧបឃាត” តាមមាត្រា២៧ និង៤៥១ នៃក្រមព្រហ្មទណ្ឌ ពាក់ព័ន្ធការប៉ុនប៉ងធ្វើរដ្ឋប្រហារ ផ្ដួលរំលំរាជរដ្ឋាភិបាលស្របច្បាប់ ក្រោមឧបាយកលជាផែនការនៃការវិលត្រឡប់ចូលប្រទេសកម្ពុជា អំឡុងព្រឹត្តិការណ៍ ៩ វិច្ឆិកា ២០១៩។ ចំណែកបក្ខពួក៨នាក់ផ្សេងទៀតដូចជា លោក អេង ឆៃអ៊ាង, លោកស្រី មួរ សុខហួរ, លោក អ៊ូ ច័ន្ទឬទិ្ធ, លោក ហូរ វ៉ាន់, លោកឡុង រី, លោក ម៉ែន សុថាវរិន្ទ្រ, លោកស្រី ជូឡុង សួមួរ៉ា និងលោក នុត រំដួល ក៏ត្រូវបានអយ្យការអមសាលាដំបូងរាជធានីភ្នំពេញ បានចោទប្រកាន់ពីបទ “ឧបឃាត” ដូចគ្នា៕ កោះកែវ