នគរបាលក្រុងប៉ោយប៉ែត បង្ក្រាបការជួញដូរគ្រឿង​ញៀនជិត៤ពាន់គ្រាប់ ឃាត់ខ្លួនជនជាតិ​ថៃ៣នាក់

ជនជាតិថៃចំនួន៣នាក់ត្រូវកម្លាំងនគរបាលក្រុងប៉ោយប៉ែតធ្វើការឃាត់ខ្លួនពាក់ព័ន្ធករណីជួញដូរថ្នាំញៀនដកហូតវត្ថុតាង
គ្រឿងញៀនមេតំហ្វេតាមីន WY ចំនួន៣៨០០គ្រាប់។ ការឃាត់ខ្លួនជនសង្ស័យទាំង៣នាក់នេះបានធ្វើឡើងនៅវេលាម៉ោង៧យប់ ថ្ងៃទី១៦ ខែកក្កដា ឆ្នាំ២០២៤ នៅបន្ទប់ជួលមួយកន្លែង ក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត បានប្រាប់ឲ្យដឹងថា ដោយអនុវត្តតាមបទបញ្ជារបស់ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ កម្លាំងជំនាញបានចុះបង្ក្រាបការជួញដូរថ្នាំញៀនក្នុងផ្ទះសំណាក់មួយកន្លែង ធ្វើការឃាត់ខ្លួនជនជាតិថៃបានចំនួន៣នាក់។ លោកវរសេនីយ៍ទោ ព្រហ្ម ពិសិដ្ឋ បានបញ្ជាក់ឲ្យដឹងបន្តទៀតថាជនសង្ស័យទាំង៣នាក់មានឈ្មោះ ១.ឈ្មោះ Tananat Kerdnoy ភេទប្រុស អាយុ៤៤ឆ្នាំ។ ២.ឈ្មោះ Tanakorn Eikeiv ភេទប្រុស អាយុ២២ឆ្នាំ។ ៣.ឈ្មោះ Veerapat Trainut អាយុ២៨ឆ្នាំ ស្នាក់នៅបន្ទប់ជួលមួយកន្លែង ក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត។

ក្នុងប្រតិបត្តិការបង្ក្រាប កម្លាំងនរបាលបានធ្វើការដកហូតវត្ថុតាងរួមមាន ថ្នាំគ្រាប់WY ចំនួន១៩កញ្ចប់ ស្មើ ៣.៨០០​គ្រាប់ ម្សៅម៉ត់ខេ មួយកូនថង់, ថ្នាំគ្រាប់ អ៊ិចស្តាស៊ី ២គ្រាប់, ទូរស័ព្ទដៃចំនួន០៣គ្រឿង។ ក្រោយសួរនាំហើយជនសង្ស័យ និងវត្ថុតាងត្រូវបាននគរបាលជំនាញកសាងសំណុំរឿងបញ្ជូនមកស្នងការនគរបាលខេត្តបន្ទាយមានជ័យរៀបចំឯកសារដើម្បីបញ្ជូនទៅតុលាការ។

កម្លាំងនគបាលប្រឆាំងគ្រឿងញៀនបានឲ្យដឹងថា ដោយបានការអនុញ្ញាតពីលោកឧត្តមសេនីយ៍ទោ សិទ្ធិ ឡោះ មានការសម្របសម្រួលនីតិវិធីពី លោក សំរឹទ្ធ សុខុន ព្រះរាជអាជ្ញារង អមសាលាដំបូងខេត្ត នៅរសៀលថ្ងៃទី១៨ ខែកក្កដា ឆ្នាំ២០២៤ កម្លាំងនគរបាលផែនប្រឆាំងគ្រឿងញៀន បានបញ្ជូនជនសង្ស័យជាជនជាតិថៃចំនួន ៣ នាក់ទៅតុលាការខេត្តបន្ទាយមានជ័យ ដើម្បីដាក់ទោសទៅតាមនីតិវិធីច្បាប់៕

អត្ថបទ៖ វ៉ាន់ ណាង