យន្តហោះបើកធ្លាក់ផ្លូវរត់នៅនេប៉ាល់ ផ្ទុះឆេះស្លាប់មនុស្ស ១៨នាក់

តាមការចុះផ្សាយរបស់ AP នៅថ្ងៃពុធ ទី២៤ ខែកក្កដា ឆ្នាំ២០២៤, យន្តហោះខ្នាតតូចមួយគ្រឿងបានបើកធ្លាក់ផ្លូវរត់ ក្នុងប្រទេសនេប៉ាល់ ដោយផ្ទុះឆេះសម្លាប់មនុស្សចំនួន១៨នាក់ ប៉ុន្តែពីឡុតមិនបាត់បង់ជីវិតឡើយ ដោយគ្រាន់តែរងរបួសប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើង ពេលយន្តហោះ ព្យាយាមហោះឡើងនៅឯអាកាសយានដ្ឋាន Tribhuvan ក្នុងទីក្រុង កដ្ឋមណ្ឌូ ខណៈភ្លាមៗ គេមិនទាន់ដឹងច្បាស់ទេថាតើ មូលហេតុអ្វីទើបយន្តហោះនេះ រអិលធ្លាក់ចេញពីផ្លូវរត់។

មន្ត្រីក្នុងតំបន់លោក Basanta Rajauri បានប្រាប់ទៅអ្នកសារព័ត៌មានថា ក្រុមជួយសង្គ្រោះបានរកឃើញសាកសពមនុស្សចំនួន១៨នាក់ ហើយមនុស្សម្នាក់គត់ដែលរួចជីវិត គឺអាកាសយានិក។ គាត់ត្រូវរបួសភ្នែក ប៉ុន្តែមិនជាធ្ងន់ធ្ងរខ្លាំងណាស់ណាទេ ហើយពេលនេះ កំពុងសម្រាកព្យាបាលនៅឯមន្ទីរពេទ្យ Kathmandu Medical College។

យោងតាមព័ត៌មានបឋម, យន្តហោះនេះគឺជាកម្មសិទ្ធិរបស់ក្រុមហ៊ុនអាកាសចរណ៍ Saurya ដែលធ្វើដំណើរចេញពីទីក្រុង កដ្ឋមណ្ឌូ ឆ្ពោះទៅកាន់តំបន់រមណីយដ្ឋាន Pokhara។

ត្បិតតែគេមិនទាន់ដឹងច្បាស់អំពីមូលហេតុនៃគ្រោះថ្នាក់នេះមែន ប៉ុន្តែនៅប្រទេសនេប៉ាល់ ខែនេះគឺជារដូវវស្សា ហើយទោះពេលកើតហេតុ មិនមានភ្លៀងក៏ដោយ តែពេលខ្លះទិដ្ឋភាពក្នុងរដ្ឋធានី គឺមើលសូវច្បាស់ទេ៕

អត្ថបទ៖ សុខ សុវណ្ណ 

ចុចអាន៖ ធ្លាក់ឧទ្ធម្ភាគចក្រដឹកភ្ញៀវទេសចរ ជិតភ្នំ Everest ស្លាប់មនុស្ស ៥នាក់