ប្រធានសភាកម្ពុជា-វៀតណាម ថា កិច្ចសហប្រតិបត្តិការប្រទេសទាំងពីរ គឺដើម្បីសន្តិភាព និងការអភិវឌ្ឍតាមព្រំដែន

នៅក្នុងជំនួបនាព្រឹកថ្ងៃទី២៦​ ខែកក្កដា ឆ្នាំ២០២៤នេះ ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន និងប្រធានរដ្ឋសភាវៀតណាម លោក ត្រីន ថាញ់មិញ បានសម្ដែងការពេញចិត្តចំពោះកិច្ចសហប្រតិបត្តិការរវាងប្រទេសទាំងពីរ ក្នុងគោលដៅធ្វើឱ្យតំបន់ព្រំដែនមានសន្តិភាព និងការអភិវឌ្ឍ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន និងលោក ត្រីន ថាញ់មិញ បានបញ្ជាក់សាជាថ្មីឡើងវិញអំពីតម្លៃនៃកិច្ចសហប្រតិបត្តិការរវាងកម្ពុជា និងវៀតណាម បន្តពីលោកអគ្គលេខាមជ្ឈឹមបក្សវៀតណាម ង្វៀន ភូចុង និងសម្តេចតេជោ ហ៊ុន សែន ដែលបានបង្កើតស្នាដៃជាប្រវត្តិសាស្រ្តជាច្រើនសម្រាប់កិច្ចសហប្រតិបត្តិការនៃប្រទេសទាំងពីរ បក្សទាំងពីរ ប្រជាជនទាំងពីរ រដ្ឋទាំងពីរ ដើម្បីឆ្ពោះទៅកាន់អនាគតកាលនៃព្រំដែនប្រកបដោយសន្តិភាព និងការអភិវឌ្ឍ។ ឈរលើស្មារតីនេះ ថ្នាក់ដឹកនាំទាំងពីរ បានប្តេជ្ញាចិត្តបន្តកិច្ចសហប្រតិបត្តិការ និងអនុវត្តកិច្ចព្រមព្រៀងដែលមានស្រាប់ឱ្យកាន់តែមានប្រសិទ្ធភាពខ្ពស់ ដើម្បីបម្រើឱ្យឧត្តមប្រយោជន៍សម្រាប់ប្រទេស និងប្រជាជនទាំងពីរកម្ពុជា-វៀតណាម។

ជំនួបក្នុងរដ្ឋធានីហាណូយ, ភាគីទាំងពីរ ក៏បានវាយតម្លៃខ្ពស់ចំពោះកិច្ចសហប្រតិបត្តិការនៃស្ថាប័ននីតិបញ្ញត្តិនៃប្រទេសទាំងពីរកម្ពុជា និងវៀតណាម ក្នុងនោះភាគីទាំងពីរបានផ្តល់នូវតម្លៃខ្ពស់ចំពោះកិច្ចសហប្រតិបត្តិការអន្តរស្ថាប័ន ក៏ដូចជាការផ្លាស់ប្តូរបទពិសោធន៍នៃការកសាងច្បាប់ ក៏ដូចជាកិច្ចសហប្រតិបត្តិការក្នុងក្របខ័ណ្ឌជំនាញរបស់គណៈកម្មការនានា របស់រដ្ឋសភា និងព្រឹទ្ធសភានៃប្រទេសទាំងពីរ​ ក៏ដូចជាអគ្គលេខាធិការដ្ឋាន។ ប្រធានសភាទាំងពីរ ក៏បានប្រកាសគាំទ្រគ្នាទៅវិញទៅមកចំពោះលទ្ធផលដែលទទួលបានជាផ្លែផ្កាកន្លងមក​ តាមរយៈកិច្ចសហប្រតិបត្តិការជាន់ខ្ពស់រវាងគណបក្សនិងគណបក្ស ក៏ដូចជាស្ថាប័ននីតិបញ្ញត្តិនៃប្រទេសទាំងពីរ​ និងក្នុងវេទិកាការទូតសភា​ វេទិកា​ពហុភាគី ជាដើម។

ប្រមុខសភាទាំងពីរ ក៏បានអញ្ជើញគ្នាទៅវិញទៅមកដេីម្បីបំពេញទស្សនកិច្ចផ្លូវការ ក្នុងនោះ ភាគីវៀតណាម បានគោរពអញ្ជើញសម្តេចតេជោ ប្រធានព្រឹទ្ធសភា ធ្វើទស្សនកិច្ចផ្លូវការនៅវៀតណាម ពេលសមស្របខាងមុខ ក្នុងនាមជាប្រធានព្រឹទ្ធសភាកម្ពុជា ដែលជាទស្សនកិច្ចលើកដំបូងរបស់សម្តេចតេជោ ដើម្បីចារជាប្រវត្តិសាស្រ្តនៃកិច្ចសហប្រតិបត្តិការរបស់ថ្នាក់ដឹកនាំកំពូលនៃស្ថាប័ននីតិបញ្ញត្តិ៕