ព័ត៌មានជាតិ

ថ្ងៃបើកការដ្ឋានព្រែកជីកហ្វូណនតេជោ នៅតាមស្ថាប័ន ទីវត្តអារាម និងពលរដ្ឋ ខណ្ឌមានជ័យ ត្រៀមរួចរាល់ ដើម្បីចូលរួមអបអរ

បានផុស

២ years មុន

នៅ

ថ្ងៃអង្គារ ៣០ កក្កដា ២០២៤

ដោយ

អាជ្ញាធរនៅតាមស្ថាប័ន ព្រះសង្ឃតាមទីវត្តអារាម និងប្រជាពលរដ្ឋ ខណ្ឌមានជ័យ បានត្រៀមរួចរាល់សម្រាប់ចូលរួមអបអរថ្ងៃបើកការដ្ឋានព្រែកជីកហ្វូណនតេជោ នាថ្ងៃទី ០៥ ខែសីហា ឆ្នាំ ២០២៤ ខាងមុខនេះ។

លោក ជា សារ៉េត ចៅសង្កាត់ស្ទឹងមានជ័យទី ១ បានឲ្យដឹងថា ថ្ងៃបើកការដ្ឋានផ្លូវការ នៅវេលាម៉ោង ៩ និង ៩ នាទីព្រឹក មន្ត្រីអាជ្ញាធរទូទាំងសង្កាត់ នឹងធ្វើពិធីទូងស្គរអបអរសាទរព្រែកជីកហ្វូណនតេជោឲ្យបានអធិកអធមបំផុត ដោយត្រៀមលក្ខណៈសម្បត្តិ និងសម្ភារៈរួចរាល់ជាស្រេចហើយផងដែរ។

ព្រះគ្រូសិរីមុនី យឹម ឯកវុត្ថា ព្រះសមុហ៍ ខណ្ឌមានជ័យ និងជាព្រះគ្រូសូត្រស្តាំ តំណាងសង្ឃនៅទូទាំងវត្តសង្ក្រាន្តតាព្រហ្មស្ទឹងមានជ័យ មានសង្ឃដីកាថា ព្រែកជីកនេះ គឺកកើតឡើងដោយគតិបណ្ឌិតដឹកនាំរបស់ សម្តេចតេជោ ហ៊ុន សែន និង សម្តេចធិបតី ហ៊ុន ម៉ាណែត ដែលបានគិតគូរបង្កើតឡើងសម្រាប់បន្សល់ទុកដល់កូនចៅតៗ ជំនាន់ ហើយវាក៏ក្លាយជាចរន្តសេដ្ឋកិច្ចមួយនាំកម្ពុជាទៅរកការអភិវឌ្ឍកាន់តែខ្លាំងក្លា នាថ្ងៃអនាគត។

ប្រជាពលរដ្ឋជាអាជីវករលក់ដូរក្នុងផ្សារស្ទឹងមានជ័យ បានសម្ដែងក្តីរីករាយ និងពេញចិត្តចំពោះគម្រោងព្រែកជីកហ្វូណនតេជោ ដោយពួកគាត់ទាំងអស់គ្នា ត្រៀមខ្លួនរួចហើយ ដើម្បីអបអរសាទរ នៅថ្ងៃបើកការដ្ឋានខាងមុខនេះ។

គួរបញ្ជាក់ថា នៅថ្ងៃទី ៥ ខែសីហា ឆ្នាំ ២០២៤ ដដែលនោះ រដ្ឋបាលរាជធានីភ្នំពេញ នឹងរៀបចំព្រឹត្តិការណ៍ដ៏ធំនៅកោះពេជ្រ គឺការប្រគំតន្ត្រីដែលមានអ្នកចូលរួមប្រមាណ ១ ម៉ឺននាក់ ជាមួយនឹងការបាញ់កាំជ្រួចយ៉ាងគគ្រឹកគគ្រេងផងដែរ ដើម្បីជាការចូលរួមអបអរគម្រោងព្រែកជីកប្រវត្តិសាស្ត្រនេះ៕

អត្ថបទ ៖ សុភា