ចិនគ្រោងសម្រេចអនុញ្ញាតឱ្យកម្ពុជា នាំចូលសំបុកត្រចៀកកាំឆាប់ៗនេះ

អគ្គនាយកដ្ឋានគយចិនគ្រោងសម្រេចអនុញ្ញាតឱ្យកម្ពុជានាំចេញផលិតផលសំបុកត្រចៀកកាំទៅទីផ្សាររបស់ខ្លួននៅខែតុលា ឆ្នាំ ២០២៤ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ​ស៊ុយ ​កុកធាន ​ប្រធាន​សមាគម​ត្រ​ចៀក​កាំ​កម្ពុជាប្រាប់កម្ពុជាថ្មីនៅថ្ងៃទី ៣១ ខែកក្កដា នេះ​​​ថា តាមព័ត៌មានពីក្រុមហ៊ុនផ្ដល់សេវាប្រឹក្សារបស់ចិន នៅខែតុលា ឆ្នាំ ២០២៤ ខាងមុខនេះ អគ្គនាយកដ្ឋានគយចិននឹងសម្រេចអនុញ្ញាតឱ្យកម្ពុជានាំចេញសំបុកត្រចៀកកាំដោយផ្ទាល់ទៅទីផ្សារចិន។

លោក ស៊ុយ កុធាន ប្រាប់ថា សមាគម ត្រចៀកកាំខ្មែរ នឹងរៀបចំ សិក្ខាសាលាមួយនៅថ្ងៃទី ១៥ ខែ កញ្ញា ខាងមុខដើម្បីពិភាក្សាអំពី ការចុះកិច្ចព្រមព្រៀងទិញ-លក់សំបុកដើម្បីនាំទៅចិន។

បើតាមលោក ស៊ុយ កុកធាន ផលិតកម្មសំបុកត្រចៀកកាំ ភាគច្រើនផលិត​នៅខេត្តជាប់​មាត់​សមុទ្រ ដូចជា ខេត្តកំពត ខេត្តកោះកុង ប៉ុន្តែសក្ដានុពល​សម្រាប់​​ការវិនិយោគបន្ត បច្ចុប្បន្ន បាន​ប្ដូរ​មក​ខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញ​បឹង​ទន្លេសាប ខេត្តស្ទឹងត្រែង និងព្រះ​វិហារ​វិញ ដោយសារខេត្តជាប់មាត់សមុទ្រ មានការសាង​សង់​ច្រើន​លើសលប់។

បច្ចុប្បន្នតម្លៃសំបុកមិនទាន់កែច្នៃ មានការធ្លាក់ចុះថ្លៃបន្តិចប្រមាណ ១០ ភាគរយ ដោយសារតែការនាំចេញ​តាម​រយៈ​ច្រក​វៀតណាម ទៅចិន តឹងតែង រួមផ្សំនឹងសេដ្ឋកិច្ចចិនមានបញ្ហាតិចតួច។

តម្លៃបច្ចុប្បន្ន ៥០០ ដុល្លារ ក្នុងមួយគីឡូក្រាម សម្រាប់សំបុកមិនទាន់កែច្នៃ ខណៈកែច្នៃហើយ ១ ២០០​ សម្រាប់ទីផ្សារក្នុងស្រុក៕

អត្ថបទ៖ ឡេង ដេត