តម្លៃសាច់ជ្រូកធ្លាក់ចុះ ដោយសារការចិញ្ចឹមលើសតម្រូវការ

លោក ស្រ៊ុន ពៅ ប្រធានសមាគមអ្នកចិញ្ចឹមសត្វ ប្រាប់កម្ពុជាថ្មីនៅថ្ងៃទី ០១ ខែ​សីហា ឆ្នាំ ២០២៤នេះថា តម្លៃជ្រូក​រស់​នៅ​កម្ពុជា​​​បានធ្លាក់ចុះបន្តិច ដោយសារតែការចិញ្ចឹម​ច្រើន​លើស​តម្រូវការទីផ្សារ។

លោកថា តម្លៃជ្រូកធ្លាក់ចុះ មិនច្រើននោះទេ ខណៈ​កម្ពុជាឆ្លៀត​​​នាំចេញបានខ្លះ សង្ឃឹមថាអាចទប់ទល់ថ្លៃផលិត។

បច្ចុប្បន្ន តម្លៃជ្រូករស់បានធ្លាក់ពី ១ ម៉ឺន ៥០០ រៀល មកក្រោម ៩ ពាន់រៀល ក្នុងមួយ​គីឡូ​ក្រាម ជាតម្លៃដែលធ្វើឱ្យ​កសិករ​ប្រឈមការខាត។

លោក ម៉ូវ ឃាង ម្ចាស់សត្តឃាតដ្ឋាននៅក្រុងតាខ្មៅ បានឱ្យដឹងដែរថា តម្លៃសាច់ជ្រូកប៉ាយ​នៅ​កន្លែងរបស់លោកបានធ្លាក់ចុះប្រមាណជាង ១ ពាន់រៀលក្នុងមួយគីឡូ ពោលគឺលក់បានក្នុង​រង្វង់​​ ១ ម៉ឺន ២ ពាន់រៀល។

លោក ម៉ូវ ឃាង បញ្ជាក់ថា ការធ្លាក់ចុះដោយសារតម្រូវការ​របស់​ប្រជា​ពលរដ្ឋធ្លាក់ចុះ ហើយ​នៅ​តែ​មាន​ការលួចលាក់ក្នុងការនាំចូលសាច់បង្កក ដែលធ្វើឱ្យតម្លៃ​សាច់​ជ្រូក​ធ្លាក់ចុះ។

យោងតាមសមាគមអ្នកចិញ្ចឹមសត្វ កម្ពុជាមានតម្រូវការសាច់ជ្រូកប្រមាណ ៨ ០០០ ទៅ ៩​០០០ ក្បាលក្នុងមួយថ្ងៃនៅទូទាំងប្រទេស៕

អត្ថបទ៖ ឡេង ដេត