កីឡាករ​អាល្លឺម៉ង់​សរសើរកីឡាករ​ចិន​ខំ​ប្រឹង​ហាត់ មិន​បានជួបគ្រួសារ៣ឆ្នាំ

នៅពីក្រោយការឈ្នះមេដាយមាសនៅប្រភេទកីឡាលោតទឹករបស់អត្តពលិកអូឡាំពិកលោតទឹកចិន មានរឿងនឹកស្មានមិនដល់ ក្រោយពួកត្រូវបានដាក់កម្រិតឲ្យស្នាក់នៅកន្លែងហ្វឹក​ហាត់​ដោយ​មិនឲ្យចេញក្រៅ​សោះ​​ក្នុង​រយៈ​ពេល​៣​ឆ្នាំ។

អត្តពលិកអូឡាំពិកលោតទឹកអាល្លឺម៉ង់​ លោក Timo Barthel បានបង្ហាញពីការលះបង់ដ៏ធំ​ធេង​របស់​កីឡាករ​ចិន​ Lian Junjie និង Hao Yang ក្រោយឈ្នះមេដាយមាសនៅអូឡាំពិកនៅទីក្រុងប៉ារីស។ លោក​​បាន​អះ​អាង​ថា អត្ដពលិកខ្លះមិនបានឃើញគ្រួសាររបស់ពួកគេអស់រយៈពេល៣ឆ្នាំ គឺ​ផ្តោតលើការហ្វឹកហាត់ដើម្បីដណ្ដើមមេដាយ​អូឡាំពិក​​ជូន​ជាតិ។

លោក Timo Barthel បាននិយាយថា ៖«ពួកគេត្រូវរស់នៅ​កន្លែង​ឆ្ងាយពីផ្ទះ។ ពួកគេស្នាក់ទៅបន្ទប់១គ្នា៤នាក់។ ពួកគេហ្វឹកហាត់១២ម៉ោង​ក្នុង​មួយ​ថ្ងៃ។ ពួកគេមិនបានដឹងរឿងអ្វីទាំងអស់ក្រៅពីការមុជទឹក។ ពួកគេ​មិន​មាន​ជីវិត​ឯកជន​ដូច​យើង​ ដែលអាចទៅ​ក្រៅ​ជាមួយ​មិត្ត​ស្រី ឬ​ដៃគូ ញ៉ាំ​ការ៉េម ទៅ​ភោជនីយដ្ឋាន ជួប​ក្រុម​គ្រួសារ។ ពេល​ខ្លះ​ពួកគេមិន​បាន​ជួប​គ្រួសារ​អស់​រយៈ​ពេល​៣​ឆ្នាំ»។

ក្រោយពីការលើកឡើងបែបនេះ ក៏មានសំណួរសួរទៅ Barthel តើ​អ្នក​ចង់​មាន​ជីវិត​បែប​នេះដើម្បី​ឈ្នះមេដាយមាស​ទេ?
លោក Barthel បានឆ្លើយថា៖«ខ្ញុំបានឮ​ដំណឹងថាយើងទទួលបាន ២០,០០០ អឺរ៉ូ សម្រាប់មេដាយមាសពីការឧត្ថម្ភនៅ​អាល្លឺម៉ង់។ តើវាមានតម្លៃទេ? សម្រាប់ទឹកប្រាក់ ២០,០០០ អឺរ៉ូ? តើ​អ្នក​ទុក​ជីវិត​របស់​ដើម្បីវាមែនទេ? យើង​​បាន​ធ្វើ​រួច​ហើយ។ លុយមិនអាចមានឥទ្ធិពលើខ្ញុំទេ»។

ទោះបីជាយ៉ាងក៏លោក Barthel ​បាន​កោតសរសើរ​អត្តពលិកចិន Lian Junjie និង Hao Yang ដែលធ្វើឲ្យពិភពលោកភ្ញាក់ផ្អើល ក្រោយការសម្ដែង​ដ៏​អស្ចារ្យ​​ស័ក្តិសម​ជាម្ចាស់មេដាយមាសពិតមែន៕

ប្រែសម្រួល៖ ផា​ រតនា