ព័ត៌មានជាតិ

រដ្ឋាភិបាល គ្រោងនឹងផ្តល់ប័ណ្ណសមធម៌ជូនអ្នកជំងឺអេដស៍ដែលនៅសេសសល់ឱ្យរួចរាល់នៅបំណាច់ឆ្នាំនេះ

បានផុស

២ years មុន

នៅ

ថ្ងៃព្រហស្បតិ៍ ១៥ សីហា ២០២៤

ដោយ

រាជរដ្ឋាភិបាល គ្រោងនឹងផ្តល់ប័ណ្ណសមធម៌ជូនដល់អ្នកជំងឺអេដស៍ដែលនៅសេសសល់ឱ្យរួចរាល់នៅបំណាច់ឆ្នាំ ២០២៤ នេះ ខណៈបច្ចុប្បន្នមានអ្នកជំងឺអេដស៍ជិត ៤ ម៉ឺននាក់ បានទទួលប័ណ្ណនេះរួចហើយ។

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើរស្បែក និងកាមរោគបានឱ្យដឹងថា បច្ចុប្បន្នកម្ពុជាត្រូវបានគេប៉ានស្មានថាមានអ្នកផ្ទុកជំងឺអេដស៍ប្រមាណ ៧៦ ០០០ នាក់ ក្នុងនោះមានអ្នកជំងឺអេដស៍សកម្មដែលបានមកទទួលសេវាព្យាបាលដោយឱសថប្រឆាំងមេរោគអេដស៍ទាំង ៧២ កន្លែង ចំនួន ៦៨ ៨០២ នាក់ និងអ្នកជំងឺសង្ស័យជាង ៧ ០០០ នាក់ នៅមិនទាន់បានមកធ្វើតេស្ត និងទទួលសេវាព្យាបាលនៅឡើយទេ ខណៈក្នុង ១ ឆ្នាំ មានអ្នកឆ្លងថ្មី នៃមេរោគអេដស៍ប្រមាណ ១ ២០០ នាក់ និងស្លាប់ប្រមាណ ១ ០០០ នាក់។

លោកវេជ្ជបណ្ឌិតបានបន្តថា ក្នុងចំណោមអ្នកជំងឺអេដស៍សកម្មដែលបានមកទទួលសេវាព្យាបាលដោយឱសថប្រឆាំងមេរោគអេដស៍ ចំនួន ៦៨ ៨០២ នាក់ មជ្ឈមណ្ឌលជាតិបានសហការជាមួយភាគីពាក់ព័ន្ធដំណើរការចុះឈ្មោះអ្នកជំងឺអេដស៍ទទួលបានប័ណ្ណសមធម៌ចំនួន ៣៩ ១៨៧ នាក់ ស្មើនឹង ៥៧% គិតត្រឹមត្រីទី ២ ឆ្នាំ ២០២៤ នេះ។

លោកវេជ្ជបណ្ឌិតបានបន្តទៀតថា ការផ្តល់ជូនប័ណ្ណសមធម៌ដល់អ្នកជំងឺអេដស៍បានជួយសម្រួលដល់ការរស់នៅរបស់ពួកគាត់បានល្អប្រសើរ ព្រោះថាក្រៅពីការមកទទួលសេវាព្យាបាលជំងឺអេដស៍ដោយឥតគិតថ្លៃហើយ ពួកគាត់អាចទៅព្យាបាលនៅតាមមន្ទីរពេទ្យរដ្ឋឥតគិតថ្លៃផងដែរ ដែលបានជួយរួមចំណែកកាត់បន្ថយការចំណាយផ្សេងៗ ក្នុងគ្រួសារលើកស្ទួយជីវភាពកាន់តែប្រសើរ។

លោកវេជ្ជបណ្ឌិត បានបន្ថែមថា តាមគម្រោងយើងនឹងខិតខំផ្តល់ប័ណ្ណសមធម៌ជូនដល់អ្នកជំងឺអេដស៍ដែលនៅសេសសល់ឱ្យរួចរាល់នៅបំណាច់ឆ្នាំ ២០២៤ នេះ។

លោកវេជ្ជបណ្ឌិត សូមអំពាវនាវដល់អ្នកសង្ស័យថាមានផ្ទុកមេរោគអេដស៍ ត្រូវក្លាហានចេញមកធ្វើតេស្តឈាមរកមេរោគអេដស៍ ដើម្បីទទួលបានការព្យាបាលជំងឺត្រឹមត្រូវ និងទទួលបានប័ណ្ណសមធម៌ ដើម្បីទទួលបានអត្ថប្រយោជន៍ជាច្រើនពីរាជរដ្ឋាភិបាល៕

អត្ថបទ ៖ សំអឿន