ព័ត៌មានអន្ដរជាតិ

វៀតណាម កំណត់ពេលវេលាជ្រើសតាំងប្រធានាធិបតីថ្មី

បានផុស

២ years មុន

នៅ

ថ្ងៃអង្គារ ២៧ សីហា ២០២៤

ដោយ

Chheang

ប្រព័ន្ធផ្សព្វផ្សាយរដ្ឋ Voice of Vietnam បានចុះផ្សាយនៅថ្ងៃទី២៧ខែសីហានេះថា សភាជាតិនឹងបោះឆ្នោតជ្រើសរើសប្រធានាធិបតីថ្មីនៅក្នុងខែតុលាខាងមុខ ដែលជាការផ្លាស់ប្តូរថ្នាក់ដឹកនាំកំពូលចុងក្រោយបង្អស់ក្នុងអំឡុងពេលដែលមានភាពចលាចលខុសពីធម្មតាសម្រាប់រដ្ឋកុម្មុយនិស្តវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណែងប្រធានាធិបតីគឺជាតួនាទីដ៏សំខាន់មួយនៅក្នុងរចនាសម្ព័ន្ធដឹកនាំសសរស្តម្ភ៤របស់វៀតណាម ដែលមានដូចជា អគ្គលេខាធិការបក្សកុម្មុយនិស្តដែលជាតំណែងកំពូល នាយករដ្ឋមន្ត្រី និងប្រធានរដ្ឋសភា។

ប្រធានាធិបតីបច្ចុប្បន្ន លោក To Lam ត្រូវបានតែងតាំងជាអគ្គលេខាធិការ ឬជាប្រធានបក្សកុម្មុយនិស្តដែលកាន់អំណាចនៅក្នុងខែសីហា បន្ទាប់ពីមរណភាពរបស់លោក Nguyen Phu Trong។ លោក Trong ធ្លាប់កាន់តំណែងកំពូល២ក្នុងពេលតែមួយនៅរវាងខែតុលាឆ្នាំ២០១៨ ដល់ខែមេសាឆ្នាំ២០២១ ដែលតំណែងទាំង២នោះគឺជា ប្រធានាធិបតី និងអគ្គលេខាធិការបក្ស។

អស់ជាច្រើនទស្សវត្សមកហើយ ការផ្លាស់ប្តូរនយោបាយនៅក្នុងឯកបក្សវៀតណាមត្រូវបានរៀបចំយ៉ាងយកចិត្តទុកដាក់ជាទីបំផុត ដោយសង្កត់ធ្ងន់លើស្ថិរភាពដ៏ប្រុងប្រយ័ត្ន។ ប៉ុន្តែ យុទ្ធនាការប្រឆាំងអំពើពុករលួយទ្រង់ទ្រាយធំហៅថា «ឡភ្លើង (Blazing Furnace)» បានបោសសម្អាតអ្នកនយោបាយ និងមន្ត្រីជាច្រើននាក់នៅក្នុងពេលប៉ុន្មានឆ្នាំថ្មីៗនេះ ក្នុងនោះរួមមានទាំងមេដឹកនាំកំពូលមួយចំនួនរបស់វៀតណាមផងដែរ។ កត្តានេះហើយបានធ្វើឲ្យវៀតណាមធ្លាក់ចូលទៅក្នុងភាពចលាចលនយោបាយដែលមិនធ្លាប់មានពីមុនមក។

ចាប់តាំងពីឆ្នាំ២០២១ ប្រធានាធិបតី២រូបគឺលោក Nguyen Xuan Phuc និងលោក Vo Van Thuong បានលាលែងពីតំណែង ដែលនេះគឺជាផ្នែកមួយនៃយុទ្ធនាការប្រឆាំងនឹងអំពើពុករលួយ ខណៈដែលឧបនាយករដ្ឋមន្ត្រី៣រូបក៏ត្រូវបានចាប់ខ្លួនផងដែរ។

នៅថ្ងៃទី២៦ខែសីហា សភាជាតិវៀតណាមបានប្រកាសនូវវត្តមានឧបនាយករដ្ឋមន្ត្រីថ្មីចំនួន៣រូប ចៅក្រម១រូប ប្រធានរដ្ឋអាជ្ញា១រូប និងរដ្ឋមន្ត្រី២រូប៕

ដោយ៖ ឈាង

ចុចអាន៖ ឥស្សរជនបរទេសរូបណាខ្លះ ដែលទៅចូលរួមគោរពវិញ្ញាណក្ខន្ធមេបក្សកុម្មុយនិស្តវៀតណាម?

Related Topics:ប្រទេសវៀតណាម