ហាណូយ ប្រកាសអាសន្នថែមមួយកម្រិតទៀត ដែលជាកម្រិតធ្ងន់ ព្រោះទឹកជំនន់

តាមសេចក្តីរាយការណ៍របស់ VN Express, គិតត្រឹមម៉ោង១១:៣០នាទីយប់ថ្ងៃអង្គារទី១០ខែកញ្ញា ទីក្រុងហាណូយ បានដំឡើងការប្រកាសអាសន្នឈានដល់កម្រិត២ ដែលជាកម្រិតធ្ងន់ បន្ទាប់ពីទឹកទន្លេក្រហមនៅតែបន្តហក់ឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្រិតអាសន្ននេះត្រូវបានប្រកាសស្របពេលកម្ពស់ទឹកទន្លេ ហក់ឡើងខ្ពស់នៅខណ្ឌចំនួន១០ ជាពិសេស Long Bien ដែលកម្ពស់ទឹកឈានដល់ ១០.៥ម៉ែត្រ។

ទោះបីជាយ៉ាងណាក៏ដោយ កម្ពស់ទឹកមិនទាន់ឈានដល់កម្រិតប្រកាសអាសន្នទី៣ ដែលជាកម្រិតធ្ងន់ធ្ងរបំផុតនោះទេ ខណៈការប្រកាសអាសន្នកម្រិតនេះ ទាល់តែទឹកឡើងដល់កម្ពស់១១.៥ម៉ែត្រ ប៉ុន្តែមន្ត្រីពាក់ព័ន្ធកំពុងតាមដានស្ថានការណ៍យ៉ាងយកចិត្តទុកដាក់។

ទីភ្នាក់ងារឧតុនិយមព្រមានថា ការហក់ឡើងនៃទឹកទន្លេក្រហម អាចបង្កការជន់លិចតំបន់នៅតាមដងទន្លេនិងតំបន់ទំនាប ដែលគំរាមកំហែងដល់អាយុជីវិតនិងទ្រព្យសម្បត្តិរបស់ប្រជាជន។

មុននេះ ទីក្រុងហាណូយ ក៏ចេញការប្រកាសអាស​ន្នអំពីគ្រោះទឹកជំនន់កម្រិត១ដែលមិនធ្លាប់មានសោះក្នុងរយៈពេល១៦ឆ្នាំ ហើយមនុស្សរាប់រយនាក់ ត្រូវជម្លៀសខ្លួនទៅកាន់ទីទួលសុវត្ថិភាព។

ក្រោយការប្រកាស គណៈកម្មាធិការប្រជាជនទីក្រុងហាណូយបានអំពាវនាវដល់អង្គភាពទាំងអស់ ឲ្យត្រៀមខ្លួនឆ្លើយតបទៅនឹងគ្រោះទឹកជំនន់ ដោយឈរជើងប្រុងជើងការ ២៤ម៉ោងលើ២៤ម៉ោង ហើយស្ថាប័នពាក់ព័ន្ធត្រូវជូនដំណឹងជានិច្ចអំពីទីតាំងមានគ្រោះថ្នាក់ ដូចជាកន្លែងមានបំណាក់ដីជាដើម។

ក្រៅពីទឹកជំនន់, ស្ថានីយជលសាស្ត្រតំបន់ភាគខាងជើងនិងកណ្តាបានឲ្យដឹងថា ចាប់ពីថ្ងៃទី១០ដល់ថ្ងៃទី១២ខែកញ្ញា ទីក្រុងហាណូយ ក៏នឹងមានភ្លៀងធ្លាក់ពី៨០ទៅ១៥០មិល្លីម៉ែត្រផងដែរ ខណៈកន្លែងខ្លះអាចឈានដល់២៥០មិល្លីម៉ែត្រឯណោះ៕

អត្ថបទ៖ សុខ សុវណ្ណ

ចុចអាន៖ ទីក្រុងហាណូយ ប្រកាសអាសន្នអំពីទឹកជំនន់ និងជម្លៀសមនុស្សរាប់រយនាក់