ទីក្រុងហាណូយ ប្រកាសអាសន្នអំពីទឹកជំនន់ និងជម្លៀសមនុស្សរាប់រយនាក់

មិនធ្លាប់មានសោះក្នុងរយៈពេល១៦ឆ្នាំមកនេះ ដែលទីក្រុងហាណូយ ចេញការប្រកាសអាស​ន្នអំពីគ្រោះទឹកជំនន់ ខណៈមនុស្សរាប់រយនាក់ ត្រូវជម្លៀសខ្លួនទៅកាន់ទីទួលសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារតែកម្ពស់ទឹកទន្លេក្រហម ហក់ឡើងខ្ពស់, ទីក្រុងហាណូយ បានប្រកាសអាសន្ននៅ ១០ខណ្ឌ, រឹតបន្តឹងការធ្វើដំណើររបស់រថយន្តដឹកទំនិញឆ្លងកាត់ស្ពាន Chuong Duong និងហាមរថភ្លើងលែងឲ្យបើកតាមស្ពាន Long Bien។

នៅខណ្ឌ Thuong Tin នាវេលាម៉ោង៩ព្រឹកថ្ងៃអង្គារទី១០ខែកញ្ញាឆ្នាំ២០២៤, កម្ពស់ទឹកទន្លេក្រហមបានឈានដល់ ៧.២៧ម៉ែត្រ ដោយឡើងលើសកំណត់ត្រាចាស់ក្នុងឆ្នាំ២០០៨ ប្រហែល៣សង់ទីម៉ែត្រ។

លេខារងគណៈកម្មាធិការបក្សកុម្មុយនីស្តប្រចាំទីក្រុងហាណូយ លោក Nguyen Van Phong បានឲ្យដឹងថា ទឹកជំនន់ទន្លេក្រហម បានឡើងដល់កម្រិតប្រកាសអាសន្នទី១។

ទន្ទឹមនោះ គណៈកម្មាធិការប្រជាជនទីក្រុងហាណូយបានចេញសេចក្តីប្រកាសដល់អង្គភាពទាំងអស់ ឲ្យត្រៀមខ្លួនឆ្លើយតបទៅនឹងគ្រោះទឹកជំនន់ ដោយឈរជើងប្រុងជើងការ ២៤ម៉ោងលើ២៤ម៉ោង ហើយស្ថាប័នពាក់ព័ន្ធត្រូវជូនដំណឹងជានិច្ចអំពីទីតាំងមានគ្រោះថ្នាក់ ដូចជាកន្លែងមានបំណាក់ដីជាដើម។

ក្រៅទឹកជំនន់, ស្ថានីយជលសាស្ត្រតំបន់ភាគខាងជើងនិងកណ្តាបានឲ្យដឹងថា ចាប់ពីថ្ងៃទី១០ដល់ថ្ងៃទី១២ខែកញ្ញា ទីក្រុងហាណូយ ក៏នឹងមានភ្លៀងធ្លាក់ពី៨០ទៅ១៥០មិល្លីម៉ែត្រផងដែរ ខណៈកន្លែងខ្លះអាចឈានដល់២៥០មិល្លីម៉ែត្រឯណោះ។

សេចក្តីរាយការណ៍នេះកើតឡើងស្របពេល តួលេខមនុស្សស្លាប់ដោយសារព្យុះទីហ្វុង យ៉ាកជី នៅវៀតណាម កើនដល់៦៤នាក់ ហើយប្រទេសនេះក៏ប្រឈមនឹងគ្រោះមហន្តរាយបាក់ដីធ្ងន់ធ្ងរថែមទៀត។

តាមការចុះផ្សាយរបស់សារព័ត៌មាន VN Express, ក្នុងចំណោមមនុស្សស្លាប់ទាំងអស់ គឺមាន៤៩នាក់ ដែលបាត់បង់ជីវិតដោយសារជំនន់ទឹកភ្លៀង។

ក្រៅពីករណីស្លាប់ ក៏មានមនុស្សចំនួន២២៩នាក់រងរបួសផងដែរ ហើយក្នុងនោះគ្រាន់តែនៅខេត្តក្វាងនិញ មានមនុស្សរងរបួសរហូតដល់១៥៧នាក់ទៅហើយ៕

អត្ថបទ៖ សុខ សុវណ្ណ

ចុចអាន៖ វៀតណាម ស្លាប់មនុស្សកាន់តែច្រើនដោយសារព្យុះ ខណៈភាគខាងជើង ប្រឈមបំណាក់ដីធ្ងន់ធ្ងរ