ព័ត៌មានអន្ដរជាតិ

ភ្លើងឆេះព្រៃនៅប៉េរូសម្លាប់មនុស្ស១៥នាក់ ចាប់តាំងពីខែកក្កដា

បានផុស

២ years មុន

នៅ

ថ្ងៃពុធ ១៨ កញ្ញា ២០២៤

ដោយ

ភ្លើងឆេះព្រៃនៅក្នុងប្រទេសប៉េរូក្នុងតំបន់អាមេរិកខាងត្បូង បានបណ្តាលឱ្យមនុស្សយ៉ាងហោចណាស់១៥នាក់បានស្លាប់ចាប់តាំងពីខែកក្កដា ហើយផ្ទៃដីចម្ការដាំដុះជាង៣០០០ហិកតា និងតំបន់ធម្មជាតិអភិរក្សបានឆាបឆេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មានAPនៅថ្ងៃទី១៨ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយករដ្ឋមន្ត្រី Gustavo Adrianzen បានប្រាប់អ្នកយកព័ត៌មានថា ភ្លើងឆេះព្រៃដែលបានកើតឡើងគឺដោយសារសកម្មភាពរបស់មនុស្ស ហើយតំបន់ចំនួន២២ក្នុងចំណោម២៤ បានរងនូវការឆាបឆេះដែលធ្វើឲ្យប្រទេសនេះក្លាយជាប្រទេសមានភ្លើងឆេះព្រៃយ៉ាងសកម្ម ខណៈពពក ផ្សែង និងខ្យល់កំពុងរំខានដល់ប្រតិបត្តិការរបស់យន្តហោះពន្លត់ភ្លើងថែមទៀត។

ចាប់តាំងពីខែកក្កដាមក យ៉ាងហោចណាស់មនុស្ស ១៥នាក់បានស្លាប់ និង៩៨នាក់ផ្សេងទៀតបានរងរបួសដោយសារភ្លើងឆេះ។ ក្នុងចំណោមអ្នកស្លាប់មាន១០នាក់បានស្លាប់ក្នុងរយៈពេល២សប្តាហ៍ចុងក្រោយនេះ ហើយមនុស្សជាង១៨០០នាក់ បានរងផលប៉ះពាល់ ខណៈវិស័យបសុសត្វក៏ត្រូវបានគេរាយការណ៍ថាបានបាត់បង់សត្វចំនួន ៣៣៤ក្បាលផងដែរ។

សេវាព្រៃឈើ និងសត្វព្រៃជាតិរបស់ប្រទេសប៉េរូ (SERFOR) បានបង្ហាញថា ឥទ្ធិពលនៃការប្រែប្រួលអាកាសធាតុធ្វើឱ្យមានគ្រោះមហន្តរាយជាច្រើនរួមទាំងការររីករាលដាលនៃភ្លើងឆេះ លក្ខខណ្ឌមួយចំនួនដូចជាខ្យល់បក់ខ្លាំង និងគ្រោះរាំងស្ងួតដែលអូសបន្លាយបានធ្វើឲ្យការឆាបឆេះកាន់តែងាយស្រួល និងរីករាលដាលយ៉ាងឆាប់រហ័ស។ ជាពិសេសភ្លើងឆេះដ៏ស្មុគស្មាញបំផុតមួយចំនួនគឺនៅក្នុងតំបន់ Amazon ដែលមានព្រំប្រទល់ជាប់ប្រទេសអេក្វាទ័រ៕