ND Miss Mera Cambodia ប្រកាសលក់ដី ដើម្បីផលិតកម្មវិធីឲ្យល្អ ក្រោយឈឺចាប់ពាក្យ Unprofessional

កញ្ញា ខាត់ ស្រីច័ន្ទ អតីតលំដាប់រងទី៤ Miss Grand Cambodia 2020 ហើយក៏ជាម្ចាស់កម្មវីធី Miss Mera Cambodia ដែលទើបបង្កើតថ្មី ប្រកាសលក់ដីផ្ទាល់ខ្លួន ដើម្បីផលិតកម្មវិធីប្រកួតឲ្យល្អ ក្រោយស្ថាប័ន Miss Grand International ថាកម្ពុជា Unprofessional។

រឿងចម្រូងចម្រាសជាមួយស្ថាប័ន MGI និង ស្ថាប័ន MGC បានបង្កជាការឌឺដងផ្លែផ្កាគ្នាហូរហែព្រមទាំងខាងភាគីថៃចោទប្រកាន់កម្ពុជាថា Unprofessional ក្រោយការធ្វើជាម្ចាស់ផ្ទះរួមគ្នា។ ទន្ទឹមនឹងជម្លោះពាក្យសម្ដីនេះ បានធ្វើឲ្យអ្នកគាំទ្រវិស័យបវរកញ្ញាទាំងសងខាងបង្ហាញពីការខឹងសម្បារ និងកាន់ជើងប្រទេសរៀងៗខ្លួន។ លើសពីនោះ មិនថាប្រជាជន បវរកញ្ញា និងតារា បានសម្ដែងការមិនពេញចិត្តចំពោះទង្វើរបស់ស្ថាប័នមួយនេះមកលើកម្ពុជា ជាពិសេសគឺការបង្កាច់បង្ខូចរបស់បវរកញ្ញាថៃផងដែរ។

ក្រោយជម្លោះមិនទាន់រលត់នៅឡើង ស្រាប់តែ កញ្ញា ខាត់ ស្រីច័ន្ទ​ (Kate Cat) បានបង្ហោះនិងធ្វើការ Live លក់ដីរបស់ខ្លួនដើម្បីផលិតកម្មវិធីថ្មីឈ្មោះ Miss Mera Cambodia ឲ្យមានគុណភាព និងត្រូវតាមស្ដង់ដា ដើម្បីកម្ពុជានិងបញ្ជាក់ពីសមត្ថភាពរបស់កូនខ្មែរក៏អាចផលិតកម្មវីធីល្អបានដែរ។ តាមរយៈការសរសេរនៅលើហ្វេសប៊ុករបស់កញ្ញាបានបញ្ជាក់ថា “បងប្អូននាងខ្ញុំ លក់ដីបន្ទាន់ក្នុងតំលៃពិសេស សម្រាប់កាធ្វេីកម្មវិធី Miss Mera Cambodia ខ្ញុំដឹងពិបាកក្នុងការក sponsor ខ្លាំងព្រោះកម្មវិធីខ្ញុំថ្មី ប៉ុន្តែខ្ញុំពិតជាចង់ធ្វេីកម្មវិធីមួយដែរ ហៅថា ស្តង់ដារ ខ្ញុំបានឃេីញ Press conference គេហេីយខ្ញុំរឹតតែឈឺចាប់”។

គួររំលឹកផងដែរថា កម្មវិធី Miss Mera Cambodia ត្រូវបានបង្កើតឡើងដោយកូនខ្មែរ ចូលរួមគាំទ្រ និងលើកកម្ពស់វិស័យបវកញ្ញានៅក្នុងស្រុក ហើយឈានទៅរកអន្តជាតិ នាថ្ងៃអនាគត ព្រមទាំងមានបេក្ខនារី ១៧រូប កំពុងចូលរួមប្រកួត៕