នាដការីរបាំបុរាណ សុគា គីមលាង ប្រកាសតម្រុយចូលប្រកួត Miss Universe 2025

នាដការីឆ្នើមផ្នែករបាំបុរាណអប្សារាកញ្ញា សុគា គីមលាង ហៅ កូនអាន់ បានប្រកាសបង្ហាញពីតម្រុយចូលរួមប្រកួតក្នុងកម្មវិធីប្រឡងសម្រស់ដ៏អស្ចារ្យ Miss Universe Cambodia 2025 បង្កការចាប់អារម្មណ៍សម្រាប់អ្នកគាំទ្រនិងអ្នកនិយមតាមដានវិស័យបវរកញ្ញានៅកម្ពុជា។

ការប្រកាសត្រៀមខ្លួន ចូលប្រឡូកក្នុងវិស័យបវរកញ្ញារបស់កញ្ញា សុគា គីមលាង នានេះបានធ្វើឲ្យអ្នកគាំទ្រមួយចំនួនបង្ហាញការលើកទឹកចិត្ត ខណ:នាងប្តេជ្ញាយកជ័យជំនះ ដើម្បីក្លាយជាតំណាងកម្ពុជាឈានទៅដល់ឆាកអន្តរជាតិ នាពេលខាងមុខ។ នាដការីរូបនេះ បានបញ្ជាក់ច្បាស់ៗថា នាងដល់ពេលត្រូវច្បាស់លាស់នឹងបង្ហាញហើយ។

កញ្ញា សុគា គីមលាង ឬ កូនអាន់ បានលើកឡើងថា “រាល់ការប្រឹងប្រែងខិតខំនិងបទពិសោធន៍របស់ខ្ញុំ នឹងធ្វើឲ្យ Universe ទទួលស្គាល់កូនខ្មែរកាន់តែច្បាស់ថា ប្រទេសតូចតែបេះដូងធំ គឺ Kon Ant ,Cambodia” ។

យ៉ាងណា ការប្រកាសខ្លួនចូលក្នុងវិស័យបវរកញ្ញា ពីសំណាក់ សុគា គីមលាង គឺស្របពេលដែលមានការបើកភ្លើងខៀវពីសំណាក់អ្នកគ្រប់គ្រងកម្មវិធីខាងលើ ដែលបើកឱកាសសម្រានាដការី ដើម្បីដណ្តើមមកុដ Miss Universe Cambodia 2025 ។

កញ្ញា សុគា គីមលាង កន្លងមកធ្លាប់បេ្តជ្ញាចិត្ត ក្នុងការចូលរួមថែរក្សានូវសម្បត្តិវប្បធម៌អរិយធម៌ ដែលបុព្វបុរសជាតិខ្មែរ បានបន្សល់ទុកដល់កូនចៅជំនាន់ក្រោយ។ នេះជាឱកាសដ៏ល្អបំផុតដែលស្រីស្អាតរូបនេះ នឹងលេចវត្តមានក្នុងការប្រកួត Miss Universe 2025 ដើម្បីយកជ័យជំនះឈានទៅប្រកួតលើឆាកអន្តរជាតិ។

ជាការកត់សម្គាល់ នាដការី សុគា គីមលាង បានតាំងចិត្តខ្ពស់ក្នុងការចូលរួមថែរក្សាសម្បត្តិវប្បធម៌-អរិយធម៌ខណ:កន្លងមក ក៏ត្រូវបានទស្សនិកជនដឹងថា នាងតែងតែមានភាពលេចធ្លោលើសកម្មភាពផ្សព្វផ្សាយវប្បធម៌សិល្ប:ខ្មែរ។សកម្មភាពនេះតែងទទួលបានការកោតសរសើរ និងគាំទ្រពីសំណាក់មហាជនខ្មែរគ្រប់វ័យ៕ អត្ថបទ៖ ចាន់រ៉ា