សុខគា គីមលាង ផ្តើមចាប់ក្តីស្រមៃនិងគោលដៅសម្រាប់ Miss Universe Cambodia 2025

ដូចអ្វីដែលខ្លួនធ្លាប់បានបង្ហើបកន្លងមក ទីបំផុត នាដការីឆ្នើមផ្នែករបាំបុរាណអប្សារាកញ្ញា សុគា គីមលាង ហៅ កូនអាន បានបង្ហាញវត្តមានចូលប្រកួតកម្មវិធីសម្រស់ Miss Universe Cambodia 2025 ខណ:បច្ចុប្បន្នកញ្ញាកំពុងហ្វឹកហាត់ដើម្បីប្រកួតប្រជែងដណ្តើមយកជ័យជំនះក្លាយជាម្ចាស់មកុដ។

ថ្វីត្បិតនេះគ្រាន់តែការចាប់ផ្តើមជំហ៊ានដំបូងរបស់តារាស្រី សុខគា គីមលាង ក៏ពិតមែន ប៉ុន្តែអ្វីដែលធ្វើឱ្យអ្នកគាំទ្ររំពឹងចិត្តខ្ពស់ទុកជាមុនដោយសង្ឃឹមថា បេក្ខភាព Miss Universe Cambodia 2025 រូបនេះអាចធ្វើបាន ដោយសំអាងលើសមត្ថភាពរបស់សិល្បការិនីរូបនេះផ្ទាល់។

នាដការី សុខគា គីមលាង បានបញ្ជាក់ថា ឥឡូវនេះ នាងផ្តើមចាប់យកពេលវេលាដែបោះជំហានទៅមុខជាមួយក្តីស្រមៃនិងគោលដៅ MUC 2025 ហើយ។ ទន្ទឹមនេះ កញ្ញាក៏បង្ហាញការអរគុណសម្រាប់ការគាំទ្រ និងក្រុមការងារដែលនៅពីក្រោយភាពស្រស់ស្អាតនៃបេក្ខភាពនីមួយៗផងដែរ។

ចំពោះការដាក់ខ្លួនចូលប្រឡូកក្នុងវិស័យបវរកញ្ញារបស់នាដការីរូបនេះ នាពេលនេះ បានធ្វើឱ្យអ្នកគាំទ្រមួយចំនួនបង្ហាញការលើកទឹកចិត្ត ខណ:នាងប្តេជ្ញាយកជ័យជំនះ ដើម្បីក្លាយជាតំណាងកម្ពុជាឈានទៅដល់ឆាកអន្តរជាតិនាពេលខាងមុខ។ ទៀតសោត បេក្ខភាពបវរកញ្ញាក្នុងកម្មវិធីប្រកួតសម្រស់ Miss Universe Cambodia 2025 ហាក់មានបេក្ខភាពលេចធ្លោគួរឱ្យកត់សម្គាល់។

នាដការី សុខគា គីមលាង ធ្លាប់បានតាំងចិត្តខ្ពស់ក្នុងការចូលរួមថែរក្សាសម្បត្តិវប្បធម៌-អរិយធម៌ ខណ:កន្លងមកក៏ត្រូវបានទស្សនិកជនដឹងថា នាងតែងតែមានភាពលេចធ្លោលើសកម្មភាពផ្សព្វផ្សាយវប្បធម៌សិល្ប:ខ្មែរ។ តួយ៉ាងសកម្មភាពនេះ តែងទទួលបានការកោតសរសើរនិងគាំទ្រពីសំណាក់មហាជនខ្មែរគ្រប់វ័យ៕ អត្ថបទ៖ ចាន់រ៉ា