សន្តិសុខសង្គម

ឆែកទូរសព្ទប្រពន្ធ ឃើញអតីតសង្សារឆាតមក កើតចិត្តប្រច័ណ្ឌ អុកឡុកក្នុងគ្រួសារ ត្រូវបងប្អូនហៅសមត្ថកិច្ចអន្តរាគមន៍ភ្លាមៗ

បានផុស

២ years មុន

នៅ

ថ្ងៃអង្គារ ១០ ធ្នូ ២០២៤

ដោយ

បុរសជាប្ដី បានឆែកទូរសព្ទប្រពន្ធ ឃើញអតីតសង្សារឆាតមកប្រពន្ធខ្លួន ក៏កើតចិត្តខឹង អុកឡុកក្នុងគ្រួសារ ត្រូវបងប្អូនជួយហៅសមត្ថកិច្ចមកអន្តរាគមន៍ភ្លាមៗ បង្កឲ្យមានការភ្ញាក់ផ្អើលកាលពីវេលាម៉ោង ១០ និង ២០ នាទី យប់ ថ្ងៃទី ៩ ខែធ្នូ ឆ្នាំ ២០២៤ នៅដីឡូត៍ ១ កន្លែង ស្ថិតនៅផ្លូវ ៣៣៧ កែងផ្លូវ ៥៩៨ សង្កាត់បឹងកក់ទី ២ ខណ្ឌទួលគោក រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីស្ត្រីជាប្រពន្ធបានឲ្យដឹងថា គាត់ និងប្តីរបស់គាត់ បានរៀបការអស់រយៈពេល ១១ ឆ្នាំ មកហើយ។ មុនពេលកើតហេតុ គាត់បានដេកលក់មួយភាំង ហើយក៏ស្រាប់តែប្តីគាត់មកអុកឡុកក្នុងគ្រួសារ ដោយចោទប្រកាន់ថា រូបគាត់មានសហាយជាមួយសង្សារចាស់។ ពេលនោះ គាត់(ប្រពន្ធ) បានបញ្ជាក់ប្រាប់ទៀតថា កាលពីប្រមាណជិត ១ ឆ្នាំមុន រូបគាត់ និងបុរស(អតីត) គឺធ្លាប់មានទំនាក់ទំនងជាមួយគ្នាតាមការឆាតពិតប្រាកដមែន គ្រាន់តែប្រើពាក្យសម្ដីអូន និងបងធម្មតា តែប៉ុណ្ណោះ តែប្តីគាត់ប្រច័ណ្ឌហួសហេតុពេក សូម្បីតែទូរសព្ទក៏មិនចង់ឲ្យគាត់ប្រើដែរ និងចង់ទៅធ្វើការជាជាងអ៊ុតសក់ក៏មិនឲ្យទៅ ទៅធ្វើការរោងចក្រក៏មិនព្រម។

ទាក់ទិនករណីនេះដែរ បុរសជាប្តី បាននិយាយរៀបរាប់ប្រាប់ថា នៅមុនកើតរឿងថ្មីៗ នេះ គឺប្រពន្ធគាត់បានឆាតជាមួយសង្សារចាស់ដែលធ្លាប់មានទំនាក់ទំនងជាមួយគ្នាកាលពីប្រមាណជិត ១ ឆ្នាំមុន ដោយប្រពន្ធគាត់និយាយទៅកាន់អតីតសង្សារចាស់សុទ្ធតែប្រើពាក្យ «អូន និងបង អូនដេកជាមួយគេ តែនឹកដល់បង» ហើយធ្លាប់សន្យាថាឈប់មានទំនាក់ទំនង តែនៅតែមាន។

ក្រោយពេលកើតហេតុ កម្លាំងសមត្ថកិច្ចនគរបាលប៉ុស្តិ៍ និង អាជ្ញាធរ បានមកសម្របសម្រួលភ្លាមៗ ថា បើរស់នៅជាមួយគ្នាកើត កុំឈ្លោះប្រកែកគ្នា និងកុំប្រច័ណ្ឌគ្នា តែបើរស់នៅជាមួយគ្នា មិនចុះសម្រុង ព្រឹកស្អែក អាចទៅលែងលះគ្នានៅសង្កាត់ ហើយកុំប្រើអំពើហិង្សាដាក់គ្នា វាជាបទល្មើសព្រហ្មទណ្ឌ៕

អត្ថបទ ៖ សំណាង