ព័ត៌មានអន្ដរជាតិ

ជនជាតិកូរ៉េខាងជើងបន្លំធ្វើការនៅក្រុមហ៊ុនអាមេរិក យកលុយទៅជួយគម្រោងផលិតអាវុធ

បានផុស

១ year មុន

នៅ

ថ្ងៃសុក្រ ១៣ ធ្នូ ២០២៤

ដោយ

Chheang

កាលពីថ្ងៃទី១២ខែធ្នូឆ្នាំ២០២៤ សហរដ្ឋអាមេរិក បានចោទប្រកាន់ថា មានបុគ្គលិកបច្ចេកវិទ្យារបស់កូរ៉េខាងជើងបានបន្លំខ្លួនធ្វើការងារនៅក្រុមហ៊ុនអាមេរិក បន្ទាប់មកបានលួចអាថ៌កំបាំងពាណិជ្ជកម្មរបស់ក្រុមហ៊ុន ដើម្បីជំរិតទារប្រាក់ ទុកជួយដល់មូលនិធិកម្មវិធីអាវុធរបស់ទីក្រុងព្យុងយ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសអាមេរិក បាននិយាយថា ជនជាតិកូរ៉េខាងជើងប្រហែល ១៣០នាក់បានទទួលការងារ IT នៅក្រុមហ៊ុន និងអង្គការមួយចំនួនរបស់សហរដ្ឋអាមេរិកចាប់ពីឆ្នាំ២០១៧ ដល់ឆ្នាំ២០២៣ ហើយរកចំណូលបានយ៉ាងហោចណាស់ ៨៨លានដុល្លារសម្រាប់ទីក្រុងព្យុងយ៉ាងប្រើប្រាស់ផលិតអាវុធប្រល័យលោក។

ក្រសួងការបរទេស បានបន្តថា ជនជាតិកូរ៉េខាងជើងទាំងនោះ ត្រូវបានបញ្ជូន និងគ្រប់គ្រងដោយក្រុមហ៊ុនកូរ៉េខាងជើងចំនួន២ ដូចជា ក្រុមហ៊ុន Yanbian Silverstar Network Technology ដែលមានមូលដ្ឋាននៅប្រទេសចិន និងក្រុមហ៊ុន Volasys Silverstar ដែលមានមូលដ្ឋាននៅប្រទេសរុស្ស៊ី។ ក្រុមហ៊ុនទាំង២នេះ សុទ្ធតែជាក្រុមហ៊ុនដែលរងទណ្ឌកម្មពីសហរដ្ឋអាមេរិក។

ក្រសួងយុត្តិធម៌អាមេរិក កាលពីថ្ងៃព្រហស្បតិ៍បានសម្រេចចោទប្រកាន់ជនជាតិកូរ៉េខាងជើង ១៤នាក់ ដែលបម្រើការងារឲ្យក្រុមហ៊ុនទាំង២។ មនុស្ស១៤នាក់នេះត្រូវបានចោទប្រកាន់ពីបទឆបោកតាមអនឡាញ ការលាងលុយកខ្វក់ និងការលួចបន្លំអត្តសញ្ញាណ។

ចំណែកឯក្រសួងការបរទេសអាមេរិក បានប្រកាសផ្ដល់ប្រាក់រង្វាន់ចំនួន ៥លានដុល្លារ សម្រាប់អ្នកដែលរាយការណ៍ពីអ្នកឃុបឃិត និងព័ត៌មានផ្សេងៗដែលទាក់ទងនឹងគម្រោងការណ៍របស់ក្រុមហ៊ុនកូរ៉េខាងជើងទាំង២៕