ព័ត៌មានជាតិ

ខេត្តកណ្ដាលរកឃើញអ្នកពាក់ព័ន្ធសហគមន៍២០កុម្ភៈជាង១៤០០០នាក់ និងមានអ្នកឆ្លងកើនដល់ជាង១០០នាក់

បានផុស

៥ years មុន

នៅ

ថ្ងៃចន្ទ ១៥ មីនា ២០២១

ដោយ

គិតត្រឹមថ្ងៃទី១៥ខែមីនាឆ្នាំ២០២១នេះ ខេត្តកណ្តាលបានរកឃើញអ្នកជាប់ពាក់ព័ន្ធផ្ទាល់និងប្រយោលប្រមាណជាង១៤០០០នាក់ និង មានអ្នកឆ្លងជំងឺកូវីដ១៩ចំនួន១១១នាក់។

លោក គ្រុយ ម៉ាឡែន នាយករដ្ឋបាលសាលាខេត្តកណ្តាលបានឲ្យដឹងនៅរសៀលថ្ងៃនេះថាស្ថានភាពជំងឺកូវីដ១៩នៅក្នុងភូមិសាស្ត្រខេត្តកណ្តាល នៅតែធ្ងន់ធ្ងរនៅឡើយ ដោយរដ្ឋបាលខេត្តកំពុងបន្តរុករកអ្នកដែលជាប់ពាក់ព័ន្ធនឹងជំងឺកូវីដជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា គិតត្រឹមថ្ងៃទី១៥មីនានេះ ក្រុមការងារបានស្វែងរកអ្នកជាប់ពាក់ព័ន្ធនឹងព្រឹត្តិការណ៍សហគមន៍២០កុម្ភៈប្រមាណជាង១៤០០០នាក់ហើយ ក្នុងនោះមានអ្នកដែលប៉ះពាល់ផ្ទាល់ចំនួន១៧១៣នាក់ កំពុងធ្វើចត្តាឡីស័កនៅក្នុងមណ្ឌលដែលបានរៀបចំ។ ក្រៅពីនេះជាអ្នកដែលមានការប៉ះពាល់ដោយប្រយោលដែលឲ្យពួកគាត់ធ្វើចត្តាឡីស័កនៅតាមផ្ទះ។

លោកបានបន្តទៀតថា ក្នុងចំណោមអ្នកជាប់ពាក់ព័ន្ធជាង១៤០០០នាក់នោះក្នុងមានមានអ្នកឆ្លងចំនួន១១១នាក់ភាគច្រើនជាជនជាតិចិនក្នុងនោះមានអ្នកជាសះស្បើយចំនួន៣នាក់ផងដែរ។

លោកបានបន្ថែមទៀតថា ទោះបីជាមានការឆ្លងជំងឺច្រើន តែយើងនៅតែអាចគ្រប់គ្រងបានព្រោះអ្នកឆ្លងនៅក្នុងជ្រៃធំស្រុកកោះធំដែលអាជ្ញាធរបានបិទរួចហើយហើយនៅផ្សារវិហារសួគ៌នៅស្រុកខ្សាច់កណ្តាលនិងនៅភូមិវាលធំស្តុកល្វាឯកក៏យើងអាចគ្រប់គ្រងបានដែរ។

លោកបានបញ្ជាក់ទៀតថា «យើងនឹងពិនិត្យមើលទីតាំងបន្ថែមទៀត ក្នុងករណីសំណាកមានចំនួនច្រើនព្រោះថា បច្ចុប្បន្នយើងអាចគ្រប់គ្រងបាននៅឡើយទេ»។ លោកបានបន្ថែមថា ទោះបីជាស្ថានភាពកូវីដនៅមិនទាន់ធូរស្រាលក៏ដោយក៏រដ្ឋបាលខេត្តមិនបានហាមឃាត់មិនឲ្យប្រជាជនមកពីតំបន់មានហានិភ័យណាមួយចូលក្នុងខេត្តនោះទេលើកលែងតែតំបន់មួយចំនួនដែលខេត្តបានហាមឃាត់ប៉ុណ្ណោះដូចជាតំបន់ជ្រៃធំ ផ្សារវិហារសួគ៌ និង ភូមិវាលធំនៅស្រុកល្វាឯមដែលមានការរាតត្បាតកូវីដ១៩។ ក្រៅពីតំបន់៣ទីតាំងនេះយើងបានអនុញ្ញាតឲ្យចេញចូលជាធម្មតានៅឡើយទេ។

គួរបញ្ជាក់ថា គិតត្រឹមថ្ងៃទី១៥មីនានេះកម្ពុជាមានករណីឆ្លងសរុប ចំនួន ១៣២៥នាក់ក្នុងនោះមានអ្នកឆ្លងក្នុងសហគមន៍ចំនួន៨១០នាក់និងជាសះស្បើយចំនួន ៧៣០នាក់ ដែលក្នុងនោះ អ្នកជាសះស្បើយថ្មីចំនួន ៨៣ នាក់៕

ដោយ ៖ សំអឿន