រដ្ឋមន្ត្រីព័ត៌មាន៖បរិបទឌីជីថល ប្រព័ន្ធផ្សព្វផ្សាយទំនើបដើរទៅមុខ តែបែបបុរាណប្រឈមការបិទទ្វារ

បរិបទឌីជីថល និងការរីកចម្រើនឆាប់រហ័សផ្នែកបច្ចេកវិទ្យា ប្រព័ន្ធផ្សព្វផ្សាយទំនើបដើរតួនាទីជំនួសឱ្យប្រព័ន្ធផ្សព្វផ្សាយបុរាណ រួមមាន ទូរទស្សន៍ វិទ្យុ កាសែត ដែលធ្វើឱ្យប្រព័ន្ធផ្សព្វផ្សាយបុរាណខ្លះប្រឈមការបិទទ្វារ ដោយសារតែបាត់ចំណូលពីពាណិជ្ជកម្ម។ នេះជាការលើកឡើងរបស់រដ្ឋមន្ត្រីក្រសួងព័ត៌មាន លោក នេត្រ ភក្ត្រា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីបើកសន្និសីទស្ដីពីការអភិវឌ្ឍប្រព័ន្ធផ្សព្វផ្សាយលើកទី២ នាព្រឹកថ្ងៃទី១៩ ខែធ្នូ ឆ្នាំ២០២៤ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថា «ប្រព័ន្ធផ្សព្វផ្សាយបុរាណ បានធ្លាក់ចុះតួនាទី ក៏ប៉ុន្តែប្រព័ន្ធផ្សព្វផ្សាយទំនើប បានដើរតួនាទីដ៏សំខាន់»។ លោករដ្ឋមន្ត្រី បន្តថា ប្រព័ន្ធផ្សព្វផ្សាយបុរាណ បាននិងកំពុងជួបប្រទះបញ្ហាប្រឈម «ខ្សែមួយ ចំណងពីរ» ដែលមានន័យថា បាត់បង់ទាំងអ្នកមើល បាត់បង់ទាំងចំណូលពីការផ្សាយពាណិជ្ជកម្ម។  

តាមការបញ្ជាក់ឱ្យដឹងដោយលោករដ្ឋមន្ត្រី នេត្រ ភក្ត្រា គឺនៅឆ្នាំ២០១៦ ថវិកាចំនួន ១១៦លានដុល្លារ ត្រូវបានចំណាយទៅលើការផ្សព្វផ្សាយពាណិជ្ជកម្មលើប្រព័ន្ធផ្សព្វផ្សាយបុរាណ គឺវិទ្យុ ទូរទស្សន៍ កាសែត ទស្សនាវដ្តី ប៉ុន្តែនៅឆ្នាំ២០២៤ ការចំណាយថវិកាលើការផ្សាយពាណិជ្ជកម្ម គឺត្រឹមតែ ៨០លានដុល្លារប៉ុណ្ណោះ។ ខណៈចរន្តការផ្សព្វផ្សាយពាណិជ្ជកម្មលើប្រព័ន្ធឌីជីថល នៅឆ្នាំ២០១៦ គឺចំណាយថវិកាត្រឹមតែកន្លះលានដុល្លារ ក៏ប៉ុន្តែនៅឆ្នាំ២០២៤ ការចំណាយថវិកាលើផ្សាយពាណិជ្ជកម្មលើផលិតផលទាំងអស់ គឺមានប្រមាណ១៧០លានដុល្លារ។

លោករដ្ឋមន្ត្រី ចាត់ទុកថា នេះជាការផ្លាស់ប្តូរចរន្តនៃការប្រើប្រាស់បណ្តាញប្រព័ន្ធផ្សព្វផ្សាយបុរាណ និងប្រព័ន្ធផ្សព្វផ្សាយទំនើបនៅកម្ពុជា។ ន័យនេះ បើស្ថាប័នផ្សព្វផ្សាយ ដែលមិនបានធ្វើសមារណកម្មខ្លួនក្នុងបរិបទឌីជីថលទេ នោះ គឺត្រូវតែប្រឈមមុខនឹងការបិទទ្វារ ខណៈស្ថាប័នផ្សព្វផ្សាយមួយចំនួន ដែលបានធ្វើសមារណកម្មទៅក្នុងប្រព័ន្ធបែបឌីជីថលទាន់ពេល គឺអាចមានលទ្ធភាពបន្តសកម្មភាពអាជីវកម្មរបស់ខ្លួន។ នេះជាការគូសបញ្ជាក់បន្ថែមរបស់លោករដ្ឋមន្ត្រីព័ត៌មាន។

គួរជម្រាបថា តាមទិន្នន័យដែលបង្ហាញដោយរដ្ឋមន្ត្រីក្រសួងព័ត៌មាន គិតមកទល់ពេលនេះ ក្រោយធ្វើបច្ចុប្បន្នភាព គឺមានប្រព័ន្ធផ្សព្វផ្សាយ ទាំងបុរាណ និងទាំងទំនើប ត្រឹមតែ ១៦២០អង្គភាពប៉ុណ្ណោះ បើប្រៀបពីមុនមានជាង ២ពាន់អង្គភាព ដោយសារអង្គភាពមួយចំនួន បានបិទទ្វារជាបន្តបន្ទាប់ ព្រោះជួបបញ្ហាប្រឈមពាក់ព័ន្ធនឹងស្ថានភាពហិរញ្ញវត្ថុ៕

អត្ថបទ៖ ធឿន វ៉ាន់សុង