សាលាឆាន់នៅវត្តដំរីផុង ភ្លើងឆេះកាលពីយប់មិញ ខូចខាតគិតជាទឹកប្រាក់ប្រមាណជា ២៥ ម៉ឺនដុល្លារ

សាលាឆាន់ ១ខ្នង កុដិព្រះសង្ឃ ១ខ្នង រួមទាំង រូបបដិមាករចំនួន ០៨អង្គ និងសម្ភារប្រើប្រាស់មួយចំនួនធំទៀត នៅវត្តដំរីផុង ស្ថិតក្នុងភូមិបុស ឃុំដំរីផុង ស្រុកឆ្លូង ខេត្តក្រចេះ ត្រូវបានអគ្គិភ័យឆាប់ឆេះទាំងស្រុង នៅវេលាម៉ោង ០៦និង៣០ នាទីល្ងាចថ្ងៃទី២២ ខែធ្នូ ឆ្នាំ២០២៤។

ករណីអគ្គិភ័យខាងលើនេះ បានធ្វើឱ្យមានការខូចខាតនិងឆេះសាលាឆាន់​ចំនួន ០១ខ្នង ទំហំ ១៥ម៉ែត្រ x ២៥ម៉ែត្រ ធ្វើអំពីឈើប្រក់ក្បឿង និងឆេះកុដិព្រះសង្ឃ ០១ខ្នង ទំហំ ៦.៥ម៉ែត្រ x ១៣ម៉ែត្រ ធ្វើអំពីឈើប្រក់ក្បឿង រួមទាំង ឆេះរូបបដិមាករចំនួន ០៨អង្គ និងសម្ភារប្រើប្រាស់មួយចំនួនធំទៀត គិតជាទឹកប្រាក់អស់ប្រហែលចំនួន ២៥០ ០០០ដុល្លារ (២៥ ម៉ឺនដុល្លារ)។ នេះ​បើយោងតាមរបាយការណ៍ពីសមត្ថកិច្ច បានបញ្ជាក់ឲ្យដឹង នៅព្រឹកថ្ងៃទី២៣ ខែធ្នូ ឆ្នាំ​២០២៤​នេះ។

ប្រភព​​បញ្ជាក់មូលហេតុ​អគ្គិភ័យនេះ បង្កឡើងដោយសារមូលហេតុលោកសង្ឈក្នុងវត្តដំរីផុង បានដាំទឹកក្ដៅដើម្បីឆាន់ ទើបបណ្ដាលឱ្យផ្ទុះកំប៉ុងហ្គាស និងបង្កជាអណ្ដាតភ្លើងបណ្ដាលកើតជាគ្រោះអគ្គិភ័យតែម្ដង។

ក្នុងកិច្ចអន្តរាគមន៍ជួយពន្លត់អគ្គិភ័យនេះដែរ សមត្ថកិច្ចបានប្រើប្រាស់រថយន្ដពន្លត់អគ្គិភ័យរបស់អធិការដ្ឋាននគរបាលស្រុកឆ្លូង ដោយប្រើប្រាស់ទឹកអស់ចំនួន ០៤ រថយន្ត និងប្រជាពលរដ្ឋចូលរួមពន្លត់ប្រហែល ១៥០នាក់ ដោយប្រើប្រាស់​ធុងបាញ់ថ្នាំប្រហែល ១០០ ធុង ដោយដាក់ទឹកជួយ បាញ់ពន្លត់ធ្វើឲ្យ​រលត់មិនរាលដាលទៅកន្លែងផ្សេងទៀត៕

អត្ថបទ៖ ប្រុញ វិធិន