តើអ្នកដឹងទេ? ការផ្តល់ឈាមអាចជួយកាត់បន្ថយមហារីកនានា និងមេរោគក្នុងឈាមមនុស្សបាន

មកទល់ពេលនេះមានមនុស្សមួយចំនួនធំបានយល់ច្បាស់ទូលំទូលាយពីអត្ថប្រយោជន៍នៃការបរិច្ចាគឈាម ដែលអាចជួយជីវិតអ្នកដទៃបាន ហើយក៏អាចជួយឱ្យអ្នកផ្តល់ទទួលបាននូវសុខភាពមួយដែលល្អប្រសើរដែរ។ ប៉ុន្តែ ក៏នៅមានបុគ្គលមួយចំនួនតូចយល់ច្រឡំថា ការផ្តល់ឈាមគឺមិនមានប្រយោជន៍អ្វីឡើយ ផ្ទុយទៅវិញធ្វើឱ្យអ្នកផ្តល់ឈាមអស់ឈាមទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុដូចនេះហើយ ថ្ងៃនេះ កម្ពុជាថ្មី សូមលើកយកពីអត្ថប្រយោជន៍មួយចំនួនដែលបានមកពីការបរិច្ចាគឈាម។ បើតាមការផ្សាយពី មជ្ឈមណ្ឌលជាតិផ្តល់ឈាម កន្លងមកបានឱ្យដឹងថា ឈាម មានប្រភពតែមួយគត់ គឺបានមកពីមនុស្ស មិនមានរោងចក្រណាអាចផលិតឈាមបានឡើយ។ សម្រាប់អត្ថប្រយោជន៍ចំពោះសុខភាពដែលបានមកពីការផ្តល់ឈាមវិញមានដូចជា កាត់បន្ថយមហារីកនានា, កាត់បន្ថយកូលេស្តេវ៉ុល និងភាពតានតឹងក្នុងចិត្ត, កាត់បន្ថយការដាច់សរសៃឈាមខួរក្បាល, កាត់បន្ថយកំហាប់ឈាម, កាត់បន្ថយការលើសជាតិដែក, សុខភាពបេះដូងមានភាពប្រសើរឡើង និងកាត់បន្ថយការឡើងទម្ងន់ជាដើម។

បន្ថែមពីនេះ មជ្ឈមណ្ឌលជាតិផ្តល់ឈាម បានបញ្ជាក់ថា ក្រៅពីជួយដល់សុខភាពខ្លួនឯងហើយ អ្នកផ្តល់ឈាមក៏បានជួយដល់ជីវិតអ្នកដទៃដែលមានតម្រូវការចាំបាច់ដូចជា ស្ត្រីដែលពិបាកនៅពេលសម្រាលកូន អ្នកជំងឺដែលជួបគ្រោះថ្នាក់នានា អ្នកជំងឺដែលត្រូវការវះកាត់ និងអ្នកជំងឺមហារីកគ្រាប់ឈាមជាដើម។ បើនិយាយពីលក្ខខណ្ឌអ្នកផ្តល់ឈាមត្រូវមាន គឺសុខភាពល្អ, មានអាយុចាប់ពី១៨ឆ្នាំ​ ដល់៦៥ឆ្នាំ, មានគីឡូចាប់ពី ៤៥គីឡូក្រាមឡើងទៅ។

ចំណែក អ្នកឧកញ៉ា ​គួច ម៉េងលី ជាវេជ្ជបណ្ឌិតជំនាញមួយរូប បានលើកឡើងកាលពីចុងឆ្នាំ២០២៤ថា ការបរិច្ចាគឈាមជួយកាត់បន្ថយមហារីកថ្លើម កាត់បន្ថយគាំងបេះដូង កាត់បន្ថយជាតិដែក និងមេរោគក្នុងខ្លួនផងដែរ។ អ្នកឧកញ៉ា គួច ម៉េងលី បាននិយាយថា៖ “បើបរិច្ចាគឈាមច្រើន គឺរស់បានយូរ។ កាត់បន្ថយមហារីកថ្លើម កាត់បន្ថយមេរោគ កាត់បន្ថយគាំងបេះដូង ចាំបណ្ណឹងបានហើយ។ ឈាមយើងស្រស់ស្រាយ សុខភាពល្អ”៕