អាជ្ញាធរ ព្រមានបិទទីតាំងអាហារដ្ឋានណា បង្ហូរទឹកកខ្វក់ចូលព្រែកទឹកឈូ

អាជ្ញាធរ​មាន​សមត្ថកិច្ច​ខេត្ត​កំពត បាន​ព្រមាន​ដល់​ម្ចាស់​ភោជនីយដ្ឋាន ដែល​បញ្ចេញ​ទឹក​ស្អុយ​ចូល​ព្រែក​ទឹកឈូ ដែលជា​តំបន់​ទេសចរណ៍​ដ៏​ពេញនិយម ដោយ​សង្កត់ធ្ងន់ថា ការបង្ហូរទឹកកខ្វក់នេះ នឹងបង្កគ្រោះថ្នាក់​ដល់​សុខភាព​ទាំង​ភ្ញៀវ​ជាតិ និង​អន្តរជាតិ ដែល​មក​លេង​កម្សាន្ត​នៅ​តំបន់​នោះ និងចុះ​ហែល​ទឹកលេង​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះ បន្ទាប់ពីអាជ្ញាធរមានសមត្ថកិច្ចពាក់ព័ន្ធ បានចុះពិនិត្យទីតាំងខាងលើ ក្រោយមានវីដេអូមួយបានបង្ហោះនៅលើបណ្តាញសង្គមហ្វេសប៊ុក ពីសកម្មភាពម្ចាស់ហាង បានបង្ហូរទឹកកខ្វក់ចូលព្រែកទឹកឈូ កាលពី ព្រឹកថ្ងៃទី០១ ខែកុម្ភៈ ឆ្នាំ២០២៥ (នៅទីតាំងរមណីយដ្ឋានទឹកឈូ ) ស្ថិតនៅភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត។

ក្រោយទទួលបានព័ត៌មាននេះ ក្រុមការងាររដ្ឋបាលស្រុក ឃុំ សហការជាមួយមន្ទីរបរិស្ថាន និងមន្ទីរទេសចរណ៍ ចុះពិនិត្យទីតាំងជាក់ស្ដែង ឃើញថាកាកសំណល់រាវ ពិតជាបានហៀរចេញពីអាហារដ្ឋាន ម៉ាក់ឈូឈូ ហើយម្ចាស់ក៏បានលបលួចបង្ហូរទឹកកាកសំណល់រាវទាំងនោះ ចូលទៅក្នុងព្រែកទឹកឈូពិតប្រាកដមែន ។ សេចក្តីប្រកាសព័ត៌មានរដ្ឋបាលស្រុកឈូ ចុះថ្ងៃទី​ ០១ ខែកុម្ភៈ បានបញ្ជាក់ថា៖‍«ក្រុមការងារ បានធ្វើកំណត់ហេតុ និងដាក់កិច្ចសន្យាយ៉ាងម៉ឹងម៉ាត់ ជាមួយម្ចាស់អាហារដ្ឋានខាងលើ និងណែនាំទៅម្ចាស់ អាហារដ្ឋាននោះត្រូវបញ្ឈប់ជាបន្ទាន់ចំពោះករណីបង្ហូរទឹកកខ្វក់ខាងលើនេះ ប្រសិនបើមានករណីនេះបន្តទៀតម្ចាស់ទីតាំងនិងទទួលខុសត្រូវចំពោះមុខច្បាប់»។

ក្រុមការងារក៏បានចុះពិនិត្យទីតាំងអាហារដ្ឋាននៅក្បែរៗនោះទាំងអស់ ពុំឃើញមានការបង្ហូរទឹកកខ្វក់ចូលព្រែកនោះទេ ព្រមទាំងបានណែនាំដល់ម្ចាស់ទីតាំងត្រូវរៀប អាងចម្រោះ ឬធុងសិបទិក តាមលក្ខណៈបច្ចេកទេសឱ្យបានឆាប់រហ័ស កុំឱ្យហៀរដូចករណីខាងលើ៕