ជនជាតិចិន​​២០០នាក់​ដែល​​សង្គ្រោះ​ពី​ Call-Center នៅមីយ៉ាន់ម៉ា​​ត្រៀម​បញ្ជូនទៅចិន​វិញ​​

ប្រទេសចិននឹងបញ្ជូនជនជាតិចិនប្រហែល២០០នាក់ដែលបានជួយសង្គ្រោះពីមជ្ឈមណ្ឌលឆបោក Call- Center នៅតាមព្រំដែនថៃ-មីយ៉ាន់ម៉ា ត្រឡប់​ទៅ​​ផ្ទះ​វិញ​តាមយន្តហោះ ដែលជាផ្នែកនៃ​កិច្ចខិតខំប្រឹងប្រែងចម្រុះជាតិសាសន៍ដើម្បីបង្ក្រាប​ប្រតិបត្តិការអនឡាញខុសច្បាប់នៅក្នុងតំបន់។ យោង​សារព័ត៌មាន Bangkok Post នៅថ្ងៃតី១៩ខែកុម្ភៈនេះ។

អង្គការសហប្រជាជាតិ បានឲ្យដឹងថា មនុស្សរាប់សែននាក់ដែលត្រូវបានជួញដូរដោយក្រុមឧក្រិដ្ឋជន​បច្ចេកវិទ្យា​ត្រូវបានបង្ខំ​ឱ្យធ្វើការនៅក្នុងមជ្ឈមណ្ឌលបោកប្រាស់ដែលបានរីកដុះដាលពាសពេញអាស៊ីអាគ្នេយ៍ រួមទាំងតំបន់ព្រំដែនរវាងប្រទេសថៃ និងមីយ៉ាន់ម៉ាផងដែរ។

ឧត្តមសេនីយ Thanathip Sawangsaeng អ្នកនាំពាក្យក្រសួងការពារជាតិថៃបានឲ្យដឹងថា ក្រុមជនជាតិចិន នឹងត្រូវ​បានហោះហើរត្រឡប់ទៅវិញនៅលើយន្តហោះពាណិជ្ជកម្មនៅថ្ងៃព្រហស្បតិ៍ ពី Mae Sot ក្នុងខេត្ត Tak ដែលមានព្រំប្រទល់ជាប់នឹងទីក្រុង Myawaddy ក្នុងប្រទេសមីយ៉ាន់ម៉ា។

ចាប់តាំងពីចុងខែមករាមក អាជ្ញាធរមីយ៉ាន់ម៉ាបានកំណត់អត្តសញ្ញាណជនបរទេសចំនួន ១៣០៣ នាក់ដែលបានចូលប្រទេសដោយខុសច្បាប់ និងធ្វើការនៅក្នុងតំបន់ Myawaddy ក្នុងនោះ២៧៣ នាក់ដែលត្រូវបានឃុំខ្លួនកាលពីថ្ងៃចន្ទ ខណៈ២៦០នាក់បានបញ្ជូនទៅប្រទេសថៃកាលពីសប្ដាហ៍មុន។

ការបញ្ជូនត្រឡប់ទៅវិញនេះ កើតឡើង បន្ទាប់ពី​មន្ត្រីមកពីប្រទេសចិន មីយ៉ាន់ម៉ា និងថៃបានជួបប្រជុំគ្នានៅទីក្រុង Myawaddy ក្នុងសប្តាហ៍នេះ រួមទាំងលោក Liu Zhongyi ជំនួយការរដ្ឋមន្ត្រីសន្តិសុខសាធារណៈរបស់ប្រទេសចិនផងដែរ។ ពួកគេបានជួបប្រជុំសម្របសម្រួលមួយនៅ Myawaddy និងពិភាក្សាអំពីប្រព័ន្ធការពារការក្លែងបន្លំទូរ​គមនាគមន៍រវាងប្រទេសទាំងបី។

ប្រទេសមីយ៉ាន់ម៉ាបានជាប់នៅក្នុងសង្គ្រាមស៊ីវិលដែលកាន់តែរីករាលដាលចាប់តាំងពីឆ្នាំ ២០២១នៅពេលដែលយោធាដ៏មានឥទ្ធិពលបានផ្តួលរំលំរដ្ឋាភិបាលជាប់ឆ្នោត បង្កឱ្យមានការតវ៉ាដែលបានក្លាយទៅជាការបះបោរប្រឆាំងនឹងរបបយោធា​។ ផ្នែកខ្លះប្រទេសនេះឥឡូវនេះត្រូវបានគ្រប់គ្រងដោយក្រុមប្រដាប់អាវុធ រួមទាំងផ្នែកខ្លះនៃ Myawaddy ត្រូវបានគ្រប់គ្រងដោយកងទ័ពជាតិ Karen ជាកងជីវពលដែលដឹកនាំដោយមេទ័ពក្នុងតំបន់ លោកវរសេនីយ៍ឯក Saw Chit Thu៕

អត្ថបទ៖ ប៊ុន សុភាព