ម៉ាឡេស៊ី ចង់ទិញអង្ករ និងត្រីរ៉ស់កម្ពុជា ទៅបំពេញតម្រូវការក្នុងប្រទេសខ្លួន​

រដ្ឋមន្ត្រីក្រសួងកសិកម្មម៉ាឡេស៊ី លោក Datuk Seri Haji Mohamad bin Sabu​ បាន​គូស​បញ្ជាក់​ថា ម៉ាឡេស៊ី​ចង់​ទិញ​អង្ករ និងត្រីរ៉ស់កម្ពុជា ទៅ​បំពេញ​តម្រូវ​ការ​ក្នុង​ប្រទេស​របស់​ខ្លួន​ដែល​កំពុង​មាន​ការ​ខ្វះខាត។

ក្នុង​ឱកាស​ចូល​ជួប​សម្តែង​ការ​គួរ​សម និង​ពិភាក្សា​ការងារ​ជា​​រដ្ឋមន្ត្រី​ក្រសួង​កសិកម្ម​ រុក្ខាប្រមាញ់ និង​នេសាទកម្ពុជា លោក ឌិត ទីណា នៅ​ថ្ងៃ​ទី​២៤ ខែ​កុម្ភៈ ​លោក Datuk Seri Haji Mohamad bin Sabu ​បាន​លើក​ឡើង​ពី​កិច្ច​សហប្រតិបត្តិ​ការ​ដើម្បី​ផលប្រយោជន៍ប្រទេសទាំងពីរ។លោក​បាន​គូស​បញ្ជាក់​ថា បញ្ហាសន្តិសុខស្បៀងរបស់ប្រទេសម៉ាឡេស៊ី ជាគោលដៅសំខាន់ ដោយ​ភាគី​ម៉ាឡេស៊ី​មាន​បំណងចង់ទិញអង្ករ និងត្រីរ៉ស់កម្ពុជា ទៅបំពេញ​តម្រូវការ​របស់​ប្រទេស​ម៉ាឡេស៊ី​ដែល​មានការខ្វះខាត។ បន្ថែម​ពី​នេះ​ ម៉ាឡេស៊ី ក៏​ចង់​វិនិយោគ​លើ​ការ​ផលិតទឹកដោះគោស្រស់ ក្នុងប្រទេស​កម្ពុជា​ផងដែរ។

ជាមួយគ្នានោះដែរ ​លោក ឌិត ទីណាបានគូសបញ្ជាក់ថា ប្រទេស​ទាំងពីរមាន​ចំណុចបំពេញឱ្យគ្នាច្រើនទៅវិញទៅមក ដោយ​ប្រទេសកម្ពុជា​មានសក្ដានុពល​លើការដាំដុះ​ស្រូវ និង​ផលិតកម្ម​អង្ករមាន​គុណភាព ព្រម​ទាំង​សំបូរត្រី ស្រប​ពេល​ដែល​ប្រទេសម៉ាឡេស៊ី មានតម្រូវការ។ ដូចនេះប្រទេស​ទាំងពីរ​នឹងសហការគ្នា ដោយកម្ពុជាស្នើ​ឱ្យ​ភាគីម៉ាឡេស៊ីបន្ធូរបន្ថយរបាំងបច្ចេកទេស ដូចជា របាំង​អនាម័យ ភូតគាមអនាម័យ ដើម្បីសម្រួលដល់ការនាំចេញកសិផលកម្ពុជាទៅប្រទេលម៉ាឡេស៊ី។

លោក រដ្ឋមន្ដ្រីក៏បានសាទរដល់ប្រទេសម៉ាឡេស៊ី ដែលចង់បានអង្ករ​ប្រណិតប្រកប​ដោយគុណភាពខ្ពស់ ខណៈដែលស្រូវអង្ករកម្ពុជា ជាផលិតផលប្រណិត មានគុណភាពល្អ និងរសជាតិឆ្ងាញ់។

រដ្ឋមន្ដ្រីកសិកម្មនៃប្រទេសទាំងពីរ បានឯកភាពលើកកម្ពស់កសិ-ពាណិជ្ជកម្ម រវាងប្រទេសទាំងពីរ សំដៅដោះ​ស្រាយបញ្ហារបស់​ប្រជាពលរដ្ឋឱ្យទទួលបានផលប្រយោជន៍ទៅវិញទៅមក ដោយប្រទេស​កម្ពុជាមាន​ទីផ្សារស្រូវអង្ករ ហើយ​ប្រទេសម៉ាឡេស៊ីទទួលបានសន្តិសុខស្បៀង មានហូបគ្រប់គ្រាន់ ទាំងអង្ករ និងត្រី៕