ឯកឧត្តម ឌី វិជ្ជា ប្រាប់ទៅលោក សម រង្ស៊ី ថា ល្មមៗបានហើយ កម្ពុជា មានច្បាប់ត្រឹមត្រូវ មិនមែនធ្វើអ្វីស្រេចលើការនឹកឃើញទេ

ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរង និងជាប្រធាននាយកដ្ឋានកណ្តាលសន្តិសុខ នៅព្រឹកថ្ងៃទី២៥ ខែកុម្ភៈ នេះ បានផ្ញើសារតាមហ្វេសប៊ុកប្រាប់ទៅលោក សម រង្ស៊ី ថា ធ្វើអ្វីឱ្យល្មមៗបានហើយ ព្រោះប្រទេសកម្ពុជា មានច្បាប់ត្រឹមត្រូវ​ មិនមែនធ្វើអ្វីស្រេចតែលើការនឹកឃើញនោះឡើយ។ ប្រតិកម្មរបស់ឯកឧត្តម ឧត្តមសេនីយ៍ឯក ឌី វិជ្ជា នេះ គឺបន្ទាប់ពីលោក សម រង្ស៊ី បានប្រឌិតព័ត៌មានជាថ្មីបង្ហោះលើហ្វេសប៊ុកពាក់ព័ន្ធនឹងជំនួបរវាងឯកឧត្តម  និងឯកអគ្គរដ្ឋទូតបារាំងប្រចាំនៅកម្ពុជាជុំវិញសំណុំរឿងឃាតកម្មលោក លិម គិមយ៉ា ដែលអាជ្ញាធរថៃកំពុងស៊ើបអង្កេត។  

តាមរយៈទំព័រហ្វេសប៊ុកផ្លូវការ ឯកឧត្តម ឧត្តមសេនីយ៍ឯក ឌី វិជ្ជា បានសរសេរបែបនេះថា៖«ជូនលោក សម រង្ស៊ី សូមបញ្ឈប់ជាបន្ទាន់នូវការបញ្ចេញព័ត៌មានមិនពិត និងការចោទប្រកាន់គ្មានមូលដ្ឋានដោយបំភ្លៃក្នុងចេតនាកខ្វក់អាក្រក់ ដើម្បីបំភាន់សាធារណជន និងទម្លាក់កំហុសជារើយៗមកលើថ្នាក់ដឹកនាំរាជរដ្ឋាភិបាលកម្ពុជារបស់យើងខ្ញុំ។ ប្រទេសកម្ពុជា មានច្បាប់ទម្លាប់ត្រឹមត្រូវ មិនមែនធ្វើអ្វីមួយស្រេចតែការនឹកឃើញនោះទេ ល្មមៗបានហើយ»។

សារយ៉ាងច្បាស់លាស់របស់ឯកឧត្តម ឧត្តមសេនីយ៍ឯក ឌី វិជ្ជា នេះ គឺជាការឆ្លើយតបទៅនឹងការបោកប្រាស់ បំផ្លើសបំភ្លៃព័ត៌មានរបស់លោក សម រង្ស៊ី។ លោក សម រង្សី តាមរយៈហ្វេសប៊ុកនៅព្រឹកថ្ងៃអង្គារនេះ បានសរសេរប្រឌិតព័ត៌មានខុសពីសម្តីដើមរបស់ស្ថានទូតបារាំង ហើយអុជអាងចង់ឱ្យអាជ្ញាធរកម្ពុជាសហការជាមួយបារាំង ខណៈដែលសំណុំរឿងឃាតកម្មលោក លិម គិមយ៉ា កំពុងស្ថិតនៅក្នុងការស៊ើបអង្កេតរបស់អាជ្ញាធរថៃ។

ប៉ុន្តែ ខ្លឹមសារដែលលោក សម រង្ស៊ី បានបង្ហោះនេះ គឺខុសទាំងស្រុងពីខ្លឹមសារពិតដែលបង្ហោះលើបណ្តាញសង្គមរបស់ស្ថានទូតបារាំងប្រចាំនៅកម្ពុជា។ ខ្លឹមសារពិត គឺស្ថានទូតបារាំងបានសរសេរថា៖«ឯកអគ្គរដ្ឋទូតបារាំង Jacques Pellet បានជួបជាមួយលោក ឌី វិជ្ជា អគ្គស្នងការរងនគរបាលជាតិ ដើម្បីពិភាក្សាពីវិធានការនានារបស់អាជ្ញាធរកម្ពុជាទាក់ទងនឹងការស៊ើបអង្កេតរបស់ថៃនៅក្នុងសំណុំរឿងឃាតកម្មលោក លិម គិមយ៉ា ដែលមានសញ្ជាតិបារាំង។ បារាំងកំពុងតែឃ្លាំមើលយ៉ាងយកចិត្តទុកដាក់នៅក្នុងដំណើរការស៊ើបអង្កេតនេះ»។ ស្ថានទូតបារាំងប្រចាំកម្ពុជា បានសរសេរបែបនេះនៅលើបណ្តាញសង្គម X របស់ខ្លួន នៅថ្ងៃទី២៤ ខែកុម្ភៈ ឆ្នាំ២០២៥។

ការបន្លំព័ត៌មាន និងបញ្ចេញព័ត៌មានមិនពិតរបស់លោក សម រង្ស៊ី នាពេលនេះ គឺសរបង្ហាញឱ្យឃើញយ៉ាងច្បាស់ថា មិនត្រឹមអ្នកគាំទ្រ និងប្រជាពលរដ្ឋខ្មែរទេ សូម្បីតែឯកអគ្គរដ្ឋទូតបារាំង ​និងស្ថានទូតបារាំងប្រចាំកម្ពុជា ក៏លោក សម រង្ស៊ី ដែលកំពុងសំងំជ្រកកោនយ៉ាងសុខសាន្តនៅប្រទេសបារាំងនោះ ក៏មិនញញើតក្នុងការបំផ្លើសបំភ្លៃព័ត៌មានខុសពីខ្លឹមសារដើមទាំងស្រុងនោះដែរ៕