មន្ត្រី​បរិស្ថាន​ឥណ្ឌូណេស៊ី​រកឃើញ​​មូលហេតុ​ជន់លិច​ ​ព្រោះ​ការរំលោភ​​និង​ប្រើប្រាស់​ដី​​​​រក្សា​ទឹក

ក្រសួងបរិស្ថាននិងរុក្ខាប្រមាញ់ឥណ្ឌូណេស៊ីបានត្រួតពិនិត្យតំបន់ទន្លេខាងលើក្នុងខេត្ត West Java កាលពីថ្ងៃព្រហស្បតិ៍ ហើយបានរកឃើញ​ថា មានការរំលោភច្បាប់បរិស្ថានដែលបានរួមចំណែកដល់ការជន់លិចថ្មីៗនេះនៅក្នុងទីក្រុងហ្សាកាតា និងតំបន់ជុំវិញក្នុងរយៈពេលពីរថ្ងៃកន្លងមកនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី៧ខែមីនានេះ។

ក្រសួង​បាន​បង្កើត​ក្រុមប្រឹក្សា​ត្រួតពិនិត្យ​បរិស្ថាន​ចំនួន​បួន​នៅលើ​​ទីតាំង​​ដី​ដែល​មុខងារ​ត្រូវបាន​ផ្លាស់ប្តូរ ដែល​ធ្វើ​ឱ្យតំបន់នេះ​មិនអាច​រក្សា​ទឹក​បាន​។ ម្ចាស់ដីបាននិងកំពុងប្រើប្រាស់តំបន់ទាំងនេះ ដោយមិនបានទទួលការអនុញ្ញាតនោះទេ។ រដ្ឋមន្ត្រីបរិស្ថាន​ឥណ្ឌូណេស៊ី លោក Hanif Faisol Nurofiq បាននិយាយថា ទីតាំងចំនួន៣៣ផ្សេងទៀតនៅតំបន់ខាង​លើ ដែលមានទីតាំងនៅ Puncak Cisarua នៃតំបន់ទីក្រុង Bogor ក៏បំពានច្បាប់បរិស្ថានផងដែរ។

យោងតាមទិន្នន័យរបស់ក្រសួងបរិស្ថាន ផ្ទៃដីចំនួន ១៥០០០ហិកតានៃតំបន់ខាងលើនៃទន្លេ Ciliwung គួរតែត្រូវបានបែងចែកសម្រាប់តំបន់ការពារ ឧទ្យានជាតិ ព្រៃផលិតកម្ម ប្រភពទឹក និងការតាំងទីលំនៅដែលមានកំណត់។ ទោះយ៉ាងណាក៏ដោយ ចាប់តាំងពីឆ្នាំ ២០២២ផ្ទៃដីប្រមាណ ៨០០០ហិកតាត្រូវបានបំប្លែងជាចំការដំណាំនិងសាងសង់លំនៅដ្ឋាន។

គួរបញ្ជាក់ថាលើសពីនេះ ផ្ទៃដីចំនួន ៣២០៣.២៤ ហិកតានៅតំបន់ខាងលើបានក្លាយទៅជាការរិចរិលយ៉ាងធ្ងន់ធ្ងរ ដែលបង្កហានិភ័យនៃការបាក់ដី និងសំណឹករហូតដល់ ១៨០ តោនក្នុងមួយហិចតាជារៀងរាល់ឆ្នាំ។ ទឹកជំនន់នាពេលថ្មីៗនេះ ដែលបង្កឡើងដោយការហូរហៀរពីទន្លេ Ciliwung និង Cisadane ដែលមានប្រភពចេញពី Puncak Cisarua ក្នុងតំបន់ Bogor បានប៉ះពាល់ដល់ទីក្រុង Jakarta និងទីក្រុងរណបរបស់ខ្លួនចាប់ពីថ្ងៃអង្គារដល់ថ្ងៃពុធសប្ដាហ៍នេះ។

គ្រោះមហន្តរាយនេះបានឆក់យកជីវិតមនុស្សបីនាក់ បង្ខំឱ្យមានការជម្លៀសខ្លួនជាទ្រង់ទ្រាយធំ និងរំខានដល់សកម្មភាពអាជីវកម្ម ជាពិសេសការដឹកជញ្ជូនទំនិញ៕

អត្ថបទ៖ ប៊ុន សុភាព