ព័ត៌មានជាតិ

ក្រុមហ៊ុនចិនធំៗមួយចំនួនចាប់អារម្មណ៍វិនិយោគលើរោងចក្រកែច្នៃវត្ថុធាតុដើម្បីផ្គត់ផ្គង់វិស័យកាត់ដេរនៅកម្ពុជា

បានផុស

២ ខែ មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

តំណាងក្រុមហ៊ុន China Huadu ក្រុមហ៊ុន Zhejiang Juyuan New Material Co., Ltd. និងតំណាងពីបណ្តាក្រុមហ៊ុនផ្សេងៗទៀតពីមកខេត្ត Zhejiang ប្រទេសចិនបានបង្ហាញចំណាប់អារម្មណ៍លើការវិនិយោគលើការបង្កើតរោងចក្រកែច្នៃវត្ថុធាតុដើមដើម្បីផ្គត់ផ្គង់ដល់បណ្តារោងចក្រកាត់ដេរ និងវាយនភណ្ណនានានៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្ហាញនូវចំណាប់រម្មណ៍លើការវិនិយោគនេះធ្វើឡើងកាលពី ថ្ងៃទី ១៨ មីនា ដែលក្រុមប្រឹក្សាភិបាលពីក្រុមហ៊ុន China Huadu ដឹកនាំដោយលោក Liu Guorong និង លោក Liu Weiguo ប្រធានក្រុមហ៊ុន Zhejiang Juyuan New Material Co., Ltd. និងតំណាងពីបណ្តាក្រុមហ៊ុនផ្សេងៗទៀតពីវិស័យផលិតក្រណាត់នៅខេត្ត Zhejiang ប្រទេសចិនបានជួបពិភាក្សាអំពីឪកាសវិនិយោគជាមួយសមាគមវាយនភ័ណ្ឌ សំលៀកបំពាក់ ស្បែកជើង និងទំនិញធ្វើដំណើរនៅកម្ពុជា (TAFTAC) ដឹកនាំដោយលោក Enjoy Ho អនុប្រធាន TAFTAC។

លោក Liu Guorong បានបង្ហាញពីការចាប់អារម្មណ៍យ៉ាងខ្លាំងក្នុងការយល់ដឹងអំពីបញ្ហានៃការផ្គត់ផ្គង់ថាមពឡអគ្គិសនី ការផ្គត់ផ្គង់ទឹក អំពីបរិស្ថាន និងការប្រើប្រាស់ដីធ្លីសាងសង់រោងច្រក។

លោក Liu បានលើកឡើងថា៖«ក្រុមហ៊ុនរបស់ពួកយើងប្តេជ្ញានឹងបោះទុនវិនិយោគនៅកម្ពុជា ដោយពួកយើងបានស្គាល់ថាជាទីផ្សារកម្ពុជាជាទីផ្សារដែលមានសក្តានុពល និងមានទំនាក់ទំនងដ៏ជិតស្និទជាមួយប្រទេសចិន និងមានបរិយាកាសអាជីវកម្មផ្តល់អត្ថប្រយោជន៍ច្រើន»។

ជាមួយគ្នានោះដែរលោកក៏បានគូសបញ្ជាក់អំពីសារៈសំខាន់នៃការគាំទ្រពី TAFTAC និងរាជរដ្ឋាភិបាលកម្ពុជា ដើម្បីសម្រួលដល់ការវិនិយោគពីបរទេស។

លោក Mr. Liu ក៏បានលើកឡើងអំពីការប្រើប្រាស់បច្ចេកវិទ្យាលើបញ្ហាបរិស្ថានដែលបានប្រើប្រាស់ដោយក្រុមហ៊ុនរបស់លោកក្នុងការប្រតិបត្តិការវិស័យនេះ។ លោកថាកម្ពុជាអាចនឹងលក្លាយជាទីតាំងយុទ្ធសាស្ត្រសម្រាប់ការវិនិយោគរបស់វិនិយោគិនចិន ជាពិសេសដោយសារតែការកើនឡើងនៃតម្រូវការក្នុងស្រុក ខណៈពេលដែលកម្ពុជាក៏កំពុងរៀបចំខ្លួនដើម្បីឈានចេញពីឋានៈប្រទេសមានការអភិវឌ្ឍន៍តិចតួច (LDC) នៅឆ្នាំ ២០២៩ខាងមុខនេះ ដែលទាមទារឱ្យអ្នកនាំចេញផលិតផលសម្លៀកបំពាក់កាត់ដេររបស់កម្ពុជាត្រូវតែមានប្រភពផ្គត់ផ្គង់វត្ថុធាតុដើមក្នុងស្រុក។

លោក Enjoy Ho អនុប្រធាន TAFTAC បានលើកឡើងថា សម្រាប់ដំណើរទស្សនកិច្ចនេះគឺជាពេលក្នុងការលើកកម្ពស់ការវិនិយោគ និងសមត្ថភាពផលិតនៅក្នុងវិស័យនេះនៅកម្ពុជា។

លោកថា៖«ចំពោះគោលបំណងនៃការវិនិយោគពីក្រុមហ៊ុន China Huadu នឹងមិនត្រឹមតែជួយធ្វើឱ្យកាន់តែប្រសើរឡើងនៃវិស័យកាត់ដេរសម្លៀកបំពាក់ វាយនភ័ណ្ឌនៅកម្ពុជាប៉ុណ្ណោះទេ ប៉ុន្តែក្រុមហ៊ុនការអាចជួយរក្សាបាននូវខ្សែច្រវ៉ាក់ផ្គត់ផ្គង់វត្ថុធាតុដើមសម្រាប់បណ្តារោងចក្រដែលមានស្រាប់នៅទីនេះផងដែរ»។

លោកក៏បានរំលឹកអំពីភាពចាំបាច់នៃការផ្គត់ផ្គង់វត្ថុធាតុដើមកាត់ដេរកាលពីអំឡុងពេលក្រោយកូវីដ ដែលបណ្តារោងចក្រនានាចង់ឱ្យមានការបើករោងចក្រផលិតវត្ថុធាតុដើមនៅក្នុងស្រុកដើម្បីចូលរួមលើកកម្ពស់ឧត្តមភាពប្រកួតប្រជែងនៅទីផ្សារអន្តរជាតិ។

យោងតាមក្រសួងពាណិជ្ជកម្ម ការនាំចេញសម្លៀកបំពាក់ ស្បែកជើង និងផលិតផលធ្វើដំណើររបស់កម្ពុជាទៅទីផ្សារអន្តរជាតិដែលភាគច្រើនទៅទីផ្សារអឺរ៉ុប និងសហរដ្ឋអាមេរិក សម្រេចបាននូវទំហំទឹកប្រាក់ជាង ១២ ពាន់លានដុល្លារ នៅក្នុងរយៈពេល ១១ ខែ ឆ្នាំ ២០២៤ បានកើនឡើងពី ២១-២៥ ភាគរយ ធៀបនឹងរយៈពេលដូចគ្នានៅឆ្នាំ ២០២៣។

ក្នុងនោះការនាំចេញសម្លៀកបំពាក់សម្រេចបានទឹកប្រាក់ចំនួន ៨,៩៤ ពាន់លានដុល្លារ កើនឡើង ២៥,៨៤ ភាគរយ, សម្ភារៈធ្វើដំណើរបាន ១,៧៨ ពាន់លានដុល្លារ កើន ២១,៥ ភាគរយ និងស្បែកជើង ១,៥០ ពាន់លានដុល្លារ កើន ២៤,៣០ ភាគរយ៕