ព័ត៌មានជាតិ

ក្រសួងការងារ ដាក់ចេញវិធានការមួយចំនួនបង្កើនទំនុកចិត្តពី កម្មករ-និយោជិត មកលើយន្តការអធិការកិច្ចការងារ

បានផុស

១ year មុន

នៅ

ថ្ងៃអង្គារ ២៥ មីនា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានដាក់ចេញនូវវិធានការមួយចំនួន ដើម្បីបង្កើនទំនុកចិត្តពីកម្មករ-និយោជិត និងសាធារណជន មកលើយន្តការអធិការកិច្ចការងារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងការងារ បានឱ្យដឹងថា វិធានការទាំងនោះរួមមាន ផ្ដល់ថាមភាពដល់បញ្ជាការឯកភាពក្រុមអធិការកិច្ចជាមជ្ឈមណ្ឌលសម្របសម្រួលពិនិត្យ និងវាយតម្លៃអធិការកិច្ចការងារ។ រៀបចំផែនការសកម្មភាពអធិការកិច្ចការងារ ដោយផ្អែកលើកម្រិតហានិភ័យ ដោយមានការពិគ្រោះយោបល់ពីភាគីពាក់ព័ន្ធ។ ពង្រឹងភាពស្អាតស្អំ និងការអនុវត្តតួនាទីរបស់អធិការការងារតាមរយៈការលើកទឹកចិត្ត និងការចាត់វិធានការវិន័យ។ បន្តផ្ដល់វិជ្ជាជីវូបនីយកម្ម តាមរយៈកម្មវិធីបណ្ដុះបណ្ដាល និងការចែករំលែកបទពិសោធ និងធ្វើទំនើបកម្មប្រព័ន្ធគ្រប់គ្រងទិន្នន័យសហគ្រាស គ្រឹះស្ថាន និងអធិការកិច្ចការងារ ដើម្បីបង្កើនប្រសិទ្ធភាព និងតម្លាភាព។

ជាមួយគ្នានេះដែរ កាលពីថ្ងៃទី ១៨ ខែមករា ឆ្នាំ ២០២៤ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីណែនាំ និងក្រើនរំលឹកដល់ម្ចាស់ ឬនាយកសហគ្រាស គ្រឹះស្ថានផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប ដើម្បីធានាបាននូវការអនុវត្តការផ្តល់ និងបើកប្រាក់ឈ្នួល និងអត្ថប្រយោជន៍ផ្សេងៗ ដល់កម្មករ-និយោជិតឱ្យបានត្រឹមត្រូវ។

លោក កត្តា អ៊ន រដ្ឋលេខាធិការ និងជាអ្នកនាំពាក្យ នៃក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ការពង្រឹងការធ្វើអធិការកិច្ចការងាររបស់ក្រសួងការងារ និងបណ្តុះបណ្តាលវិជ្ជាជីវៈ លើសហគ្រាស គ្រឹះស្ថានផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប សម្រាប់ឆ្នាំ ២០២៥ គឺជាការធានានូវការគោរពសិទ្ធិការងារ លក្ខខណ្ឌការងារសមរម្យ ដោយគ្រប់ភាគីពាក់ព័ន្ធត្រូវគោរពឱ្យបានត្រឹមត្រូវស្របតាមច្បាប់ស្តីពីការងារ និងធានាបាននូវការអនុវត្ត ការបើកផ្តល់ប្រាក់ឈ្នួល និងអត្ថប្រយោជន៍ផ្សេងៗ សម្រាប់កម្មករ-និយោជិត ជៀសវាងមានការតវ៉ា ឬវិវាទការងារកើតឡើង។

លោកបានបន្តថា ការពង្រឹងអធិការកិច្ចការងាររបស់ក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសម្រេចបាននូវគោលដៅរបស់កម្ពុជា ដើម្បីប្រែក្លាយសហគ្រាសមួយ ជាសហគមន៍សុខសាន្តមួយ ដែលជាទិសដៅការងារយ៉ាងសំខាន់របស់ក្រសួង ក្នុងនាមជាសេនាធិការរបស់រាជរដ្ឋាភិបាលលើវិស័យការងារ៕

អត្ថបទ ៖ សំអឿន