ព័ត៌មានជាតិ

ខេត្តកំពង់ចាម គ្រោងសាងសង់កំពង់ផែទេសចរណ៍

បានផុស

១ year មុន

នៅ

ថ្ងៃចន្ទ ៣១ មីនា ២០២៥

ដោយ

មន្ត្រីជំនាញនៃក្រសួងសាធារណការ និងដឹកជញ្ជូន នៅថ្ងៃទី៣០ ខែមីនា ឆ្នាំ២០២៥ ដឹកនាំដោយលោក ហ្គូវ លីបជាង ប្រធានការិយាល័យសំណង់ផ្លូវទឹក និងកំពង់ផែ នៃក្រសួងសាធារណការនិងដឹកជញ្ជូន សហការជាមួយមន្ទីរសាធារណការ និងដឹកជញ្ជូនខេត្តកំពង់ចាម បានចុះពិនិត្យទីតាំង និងពិសោធន៍ទីតាំងគម្រោងសាងសង់កំពង់ផែទេសចរណ៍នៅក្នុងក្រុងកំពង់ចាម ដេីម្បីបម្រើលេីវិស័យទេសចរណ៍នៅក្នុងខេត្តឲ្យកាន់តែទាក់ទាញទៀត។

លោក ផេង ដារ៉ែន អនុប្រធានមន្ទីរសាធារណការ និងដឹកជញ្ជូនខេត្តកំពង់ចាម បានបញ្ជាក់ប្រាប់ថា បច្ចុប្បន្នមន្ត្រីជំនាញរួមនឹងមន្ត្រីបច្ចេកទេសក្រសួងបានចុះមកសិក្សាធ្វេីការខូងជម្រៅដី ដេីម្បីយកទៅពិសោធន៍នៅក្រសួង ធ្វេីយ៉ាងណាឲ្យដឹងពីជម្រៅដល់បាត់ដីរឹង និងស្ទង់កម្រិតកម្ពស់ទឹកទន្លេមេគង្គពីច្រាំងទន្លេទៅទីតាំងត្រូវបុកគ្រឹះនៃសំណង់កំពង់ផែ។ លោក ផេង ដារ៉ែន បន្ថែមទៀតថា គម្រោងកំពង់ផែទេសចរណ៍មួយនេះ គឺស្ថិតនៅបណ្តោយមាត់ទន្លេក្នុងសង្កាតវាលវង់ ក្រុងកំពង់ចាម ដែលជាប់នឹងទីតាំងកំពង់សាឡាងចាស់។

គូសបញ្ជាក់ថា គម្រោងសាងសង់កំពង់ផែទេសចរណ៍ក្នុងក្រុងកំពង់ចាមមួយនេះ គឺជាភាពទាក់ទាញដែលអាចឲ្យនាវាទេសចរណ៍ក្នុងស្រុក និងក្រៅស្រុក មកចតបានត្រឹមត្រូវមានសណ្តាប់ធ្នាប់ល្អ និងគ្រោងរៀបចំអោយមានកន្លែងសម្រាប់សំរាកអង្គុយរង់ចាំរបស់ភ្ញៀវទេសចរណ៍ប្រកបដោយមានផាសុភាពល្អទៀតផង៕

អត្ថបទ៖ ឡេក ចាន់ពេជ្រ