លោក ជុំ សំអង រំលឹកអ្នកសិល្បៈដែលឆ្មើងនឹងលោកថា «ចំណុចចាប់ផ្តើមអ្នកឯង ក៏មានវត្តមានពួកខ្ញុំដូចគ្នា»

លោក ជុំ សំអង ដែលគេស្គាល់ថាអ្នកនិពន្ធ និងដឹងនាំរបស់ផលិតកម្មរស្មីហង្សមាស បានបង្ហាញក្តីមិនពេញចិត្តនឹងទង្វើអ្នកសិល្បៈមួយចំនួន ដែលមិនមានការគោរពចំពោះលោក ហើយថែមទាំងបង្ហាញអប្បកិរិយាហាក់ដូចជាដូចមិនស្គាល់លោក ក្នុងនាមជាអ្នកធ្លាប់ចូលខ្លួនជ្រោមជ្រែងជាមួយចំណុចចាប់ផ្តើមរបស់អ្នកនោះថែមទៀត។
នេះបើតាមការលើកឡើងរបស់ជុំ សំអង អ្នកនិពន្ធ និងដឹងនាំក្នុងវិស័យចម្រៀង។

តាមរយៈវីដេអូជាង ២នាទី អ្នកនិពន្ធនិងដឹកនាំរូបនេះ លោកសង្កត់ធ្ងន់ដោយក្តីមិនពេញចិត្ត និងអន់ចិត្តថា “ចំណុចចាប់ផ្តើមអ្នកឯង ក៏មានវត្តមានពួកខ្ញុំដូចគ្នា”។

លោកថា អ្វីដែលលោកលើកឡើងមកនេះ ​ពុំមែនជាការរំលឹកដើម្បីទាញឱ្យមានការដឹងគុណនោះឡើយ។ តួយ៉ាង ជំនួសឱ្យក្តីទាមទារការដឹងគុណ លោកចង់ផ្តល់ជាការណែនាំដល់អ្នកសិល្បៈដែលមានឈ្មោះបោះសំឡេង ហើយបែរធ្វើអប្បកិរិយាមិនសមគួរចំពោះលោក ពេលដើរកាត់ធ្វើដូចមិនឃើញ ឬមិនស្គាល់ជាដើម។

សូមស្តាប់វីដេអូខាងក្រោម៖

យ៉ាងណា ពាក់ព័ន្ធនឹងរឿងរ៉ាវនេះ ឧកញ៉ា យឹម តាស្រង់ ដែលជាអតីតអ្នកនិពន្ធទំនុកច្រៀងដ៏ឆ្នើម ហើយធ្លាប់ទ្រនំនឹងលោក ជុំ សំអង ដែរនោះ បានបញ្ចេញជាមតិយោបល់ជុំវិញការលើកឡើងខាងលើ ដោយផ្អែកលើបទពិសោធជាក់ស្តែងដែលលោកធ្លាប់ឆ្លងកាត់ នូវវិធីឆ្លើយតបទៅកាន់បុគ្គលដែលជាអ្នកសិល្បៈប្រភេទនេះ។

ជំហានដំបូងលោកបានលើកជាយោបល់ណែនាំ ទន្ទឹមនឹងវិធីដែលលោកធ្លាប់ធ្វើឆ្លើយតបវិញដូច្នេះថា “វិធីបងធ្លាប់ធ្វើមានមួយកន្លងមក ដើម្បីឱ្យចិត្តបានស្ងប់ចំពោះតារាដែលធ្លាប់មិនចូលចិត្តបងពីមុន គឺបងជួលខាង Agency រៀបចំតារាចុចឈ្មោះតារាដែលធ្លាប់មិនចូលចិត្តបង ៥នាក់ ដោយប្រាប់ប្អូនខាងរៀប Agency មិនឱ្យដឹងថាជាកម្មវិធីបង ហើយទៅច្រៀងកំដរបងបាយមួយពេលនៅសណ្ឋាគារមួយនាមាត់សមុទ្រ។ និយាយពីថាថ្ងៃនោះបងបាយឆ្ងាញ់ហើយគេងស្កប់ណាស់ តែត្រូវចំណាយលុយបន្តិច ពេលនោះប្អូននឹងស្ងប់ចិត្តហើយលែងប្រកាន់ខឹងបងប្អូនអ្នកសិល្បៈយើងមួយចំនួនដែលប្អូនយល់ថាគេមិនចូលចិត្តយើង“។