ពូទីន ព្រមចរចាជាមួយអ៊ុយក្រែន ដោយគ្មានលក្ខខណ្ឌអ្វីទាំងអស់

វិមានក្រឹមឡាំង អះអាងថា ពេលនេះប្រធានាធិបតីរុស្ស៊ី វ្ល៉ាឌីមៀរ ពូទីន យល់ព្រមចូលតុចរចាជាមួយអ៊ុយក្រែន ដោយគ្មានលក្ខខណ្ឌអ្វីទាំងអស់។ នេះបើតាមការចុះផ្សាយរបស់ RT។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមអ្នកនាំពាក្យវិមានក្រឹមឡាំង Dmitry Peskov ប្រាប់ទៅអ្នកសារព័ត៌មានកាលពីថ្ងៃសៅរ៍ទី២៦ខែមេសាឆ្នាំ២០២៥, លោក ពូទីន បានបង្ហាញពីការត្រៀមខ្លួនចរចាជាមួយអ៊ុយក្រែន និងលើកយកប្រធានបទនេះមកពិភាក្សា ពេលជួបជាមួយប្រេសិតពិសេសរបស់ប្រធានាធិបតីអាមេរិក ដូណាល់ ត្រាំ គឺលោក Steve Witkoff អំឡុងដំណើរទស្សនកិច្ចទីក្រុងមូស្គូ នាពេលថ្មីៗនេះ។

មុននេះ ទីក្រុងមូស្គូ បានដាក់លក្ខខណ្ឌថ្មីមួយទៅអ៊ុយក្រែន ដោយនោះគឺគ្រាន់តែទីក្រុងកៀវ លុបចោលបម្រាមបោះបង់គំនិតឈប់ប្រកាន់ចិត្តមិនចរចាជាមួយលោក ពូទីន ទៀតទៅ នោះភាគីទាំងពីរអាចចូលមកកាន់តុពិភាក្សាគ្នាស្តីពីវិធីឈានទៅរកការបញ្ចប់សង្គ្រាមបានហើយ។

រម្លឹកទៅខែតុលាឆ្នាំ២០២២ កាលនោះ លោក វ៉ូឡូឌីមៀរ ហ្សេលេនស្គី បានចុះហត្ថលេខាលើក្រឹត្យមួយ ដោយហាមឃាត់រាល់កិច្ចពិភាក្សាជាមួយរុស្ស៊ី ដរាបណាលោកពូទីន នៅកាន់អំណាច ដោយសារតែមេដឹកនាំអ៊ុយក្រែន លែងមានជំនឿចិត្តលើទីក្រុងមូស្គូទៀតហើយ។

យ៉ាងណា កាលពីថ្ងៃសៅរ៍លោក Peskov អះអាងថា «ក្នុងអំឡុងកិច្ចសន្ទនាជាមួយប្រេសិតលោក Witkoff ដែលជាប្រេសិតលោក ត្រាំ, លោក វ្ល៉ាឌីមៀរ ពូទីន បានរំលឹកថា ភាគីរុស្ស៊ីត្រៀមខ្លួនរួចជាស្រេច ដើម្បីចាប់ផ្តើមការចរចាជាមួយអ៊ុយក្រែនជាថ្មី ដោយគ្មានលក្ខខណ្ឌអ្វីទាំងអស់»។

សូមជម្រាបថា ជំនួបរវាងលោក ពូទីន និង Witkoff កាលពីថ្ងៃសុក្រ គឺជាការទាក់ទងគ្នាលើកចុងក្រោយបង្អស់រវាងទីក្រុងមូស្គូនិងវ៉ាស៊ីនតោន ក្នុងរយៈពេលប៉ុន្មានខែមកនេះ។

បេសកជនពិសេសរបស់អាមេរិក ត្រូវបានគេមើលឃើញថា ជាឥស្សរជនសំខាន់នៅពីក្រោយការចាប់ផ្តើមកិច្ចចរចាបញ្ចប់ជម្លោះអ៊ុយក្រែន ខណៈមកទល់បច្ចុប្បន្ន លោកបានរៀបចំកិច្ចពិភាក្សាជាមួយមន្ត្រីរុស្ស៊ីច្រើនលើកមកហើយ៕

អត្ថបទ៖ សុខ សុវណ្ណ

ចុចអាន៖ រុស្ស៊ី សរសើរទ័ពកូរ៉េខាងជើង ដែលជួយខ្លួនរំដោះបានតំបន់ Kursk