​ពន្ធដារ អំពាវនាវដល់អ្នកជាប់ពន្ធទាំងអស់ អនុវត្តឱ្យបានខ្ជាប់ខ្ជួនតាមបែបបទ និងនីតិវិធីនៃការធ្វើសវនកម្មពន្ធដារ

ក្នុងគោលដៅ​អនុវត្តសៀវភៅណែនាំស្តីពី បែបបទ និងនីតិវិធីនៃការធ្វើសវនកម្មពន្ធដារសម្រាប់មន្ត្រីពន្ធដារនិង អ្នកជាប់ពន្ធ (SOP Audit) និង​ដើម្បីធានា​បាន​នូវ​សង្គតិភាព តម្លាភាព និង​ភាព​អាច​​ប៉ាន់​ប្រមាណ​បាន អគ្គនាយកដ្ឋាន​ពន្ធដារ (GDT) អំពាវនាវ​ដល់​អ្នក​ជាប់ពន្ធ​ទាំងអស់​ចូលរួម​ជាមួយ​រដ្ឋបាលសារ​ពើពន្ធ និង​អនុវត្តឱ្យ​បាន​ខ្ជាប់ខ្ជួន តាម​បែបបទ និងនីតិវិធីនៃការធ្វើសវនកម្មពន្ធដារ ដូចបាន​ចែង​​លម្អិត​ក្នុង SOP Audit។

តាមច្បាប់ស្តីពីសារពើពន្ធ កម្ពុជាមានរបបកំណត់ពន្ធតែមួយប៉ុណ្ណោះ គឺរបបស្វ័យប្រកាស ដែលអ្នក​ជាប់ពន្ធ​ត្រូវគណនា​ប្រាក់ពន្ធ និង​ដាក់​លិខិតប្រកាស បង់ប្រាក់ពន្ធដោយខ្លួនឯង។

GDT បានលើកឡើងថា៖«ដើម្បីពង្រឹងអនុលោមភាពសារពើពន្ធក្នុងការគ្រប់គ្រងការប្រមូលចំណូលពន្ធបង់ចូល ថវិកាជាតិ​ឱ្យមានតម្លាភាព និងប្រសិទ្ធភាព ព្រម​ទាំង​ដើម្បីផ្តល់​សេវា​ជូនអ្នកជាប់ពន្ធ​ឱ្យបានទាន់ពេលវេលា ដល់ទីកន្លែង ក៏ដូចជាចូលរួម​ការលើក​កម្ពស់​បរិយាកាស​វិនិយោគ និង​ការប្រកួតប្រជែង​ដោយស្មើភាព បែបបទ និង​នីតិវិធី​នៃការ​ធ្វើសវនកម្ម ពន្ធដារ​ត្រូវ​បាន​អនុវត្តជាប្រចាំ ហើយ​យន្តការនេះ​ត្រូវបាន​អនុវត្តដោយ​រដ្ឋបាល​សារពើពន្ធនានា​នៅលើពិភពលោកផងដែរ»។

ក្នុង​នោះ ដោយ​ផ្អែកតាមគោលការណ៍ដែលបានកំណត់ក្នុង SOP Audit សហគ្រាសមួយ អាចត្រូវបានចុះធ្វើសវនកម្មដល់ទីកន្លែងតែម្តងគត់ក្នុងរង្វង់ ៣ឆ្នាំ វៀរលែងតែរកឃើញ​ថា សហគ្រាស​នោះ​មានហានិភ័យ ឬ មានភាពមិនប្រក្រតី។

ដូច្នេះ​ អ្នកជាប់ពន្ធទាំងអស់ចូលរួមជាមួយរដ្ឋបាលសារពើពន្ធ អនុវត្តឱ្យបានខ្ជាប់ខ្ជួន តាមបែបបទនិងនីតិវិធី​នៃ​ការធ្វើ​សវនកម្មពន្ធដារ ដូចបាន​ចែងលម្អិតក្នុង SOP Audit។

គួរ​ជម្រាប​ថា អ្នកជាប់ពន្ធតាមរបបស្វ័យប្រកាសនេះ ត្រូវបានបែងចែកជាបីប្រភេទគឺ អ្នកជាប់ពន្ធតូច អ្នកជាប់ពន្ធ មធ្យម និងអ្នកជាប់ពន្ធធំ។ របបស្វ័យប្រកាសនេះ គឺតម្រូវឱ្យអ្នកជាប់ពន្ធ ដែលបានចុះ​បញ្ជីពន្ធដារ​រួច ធ្វើ​ការគណនាប្រាក់ពន្ធ ដាក់លិខិតប្រកាសសារពើពន្ធ និងបង់ប្រាក់ពន្ធដោយខ្លួនឯង ឱ្យបានត្រឹមត្រូវ តាមច្បាប់ស្តីពីសារពើពន្ធ។

ដើម្បីបញ្ជាក់ថា ការប្រកាសពន្ធរបស់អ្នកជាប់ពន្ធមានភាពត្រឹមត្រូវ និង ដើម្បីពង្រឹងអនុលោមភាពសារពើពន្ធ រដ្ឋបាលសារពើ​ពន្ធមានសិទ្ធិ អំណាច និងកាតព្វកិច្ចក្នុងការពិនិត្យ វិភាគ ផ្ទៀងផ្ទាត់ និងកំណត់ពន្ធ​ឡើងវិញអនុលោមតាមមាត្រា១៩៤ មាត្រា២០៩ និងមាត្រា២១០ នៃ ច្បាប់ស្តីពីសារពើពន្ធ តាមរយៈ​ការ​ប្រើប្រាស់​យន្តការ​មួយ​ហៅថា ការធ្វើសវនកម្មពន្ធដារ៕