តូបលក់ដូរមួយកន្លែង សង់រំលោភផ្លូវដើរនៅផ្សារក្រចេះក្រុង ពលរដ្ឋ​ស្នើ​អាជ្ញាធរ​ចុះពិនិត្យ​​ដោះស្រាយ

ទីតាំងតូបលក់ដូរមួយកន្លែងដែលមានលក់ម៉ុង ភួយខ្នើយ និងកំរាលពូកគ្រប់ប្រភេទក្នុងផ្សារសាមគ្គីក្រុងក្រចេះ ត្រូវបានពលរដ្ឋលើកឡើងថា បានសង់រំលោភផ្លូវដើរនិងដាក់រនាំងបាំងជិតមិនអាចដើរឆ្លងកាត់ទៅមកបាន បង្កផលប៉ះពាល់ដល់ការលក់ដូររបស់អាជីវករឯទៀតនៅជុំវិញនោះ។

ពលរដ្ឋ និងអាជីវករ ក៏បានស្នើសុំឲ្យអាជ្ញាធរក្រុងក្រចេះ និងប្រធានផ្សារសាមគ្គីក្រុងក្រចេះ ក៏ដូចជាគណៈកម្មចុះការៀបចំសណ្តាប់ធ្នាប់ផ្សារ ចុះពិនិត្យនិង​ដោះស្រាយ​ដើម្បី​កុំ​ឲ្យ​បង្កផលប៉ះពាល់ដល់ការលក់ដូររបស់អាជីវករផ្សេង​ទៀត។

ពាក់ពន្ធ័ជុំវិញការស្នើសុំនេះ លោក កែវ វណ្ណា ប្រធានប៉ាស៊ីផ្សារសាមគ្គីក្រុងក្រចេះបានឲ្យកម្ពុជាថ្មីដឹងនៅរសៀលនេះថា ទីតាំងតូបលក់ដូរនេះពិតជាប៉ះពាល់ដូចការលើកឡើងរបស់ពលរដ្ឋ និងអាជីវករពិតមែន ហើយលោកក៏មិនបានអនុញ្ញាតិឲ្យសាងសង់នោះ​ដែរ។

លោកថា កន្លងទៅរដ្ឋបាលក្រុងក្រចេះ​បាន​ចុះធ្វើការងារនេះរួចម្តងមកហើយ ដោយម្ចាស់តូបព្រមទទួលយកការសម្របសម្រួលជាមួយក្រុមការងារដោយ​យល់​ព្រមកាត់ចេញ ប៉ុន្តែតាំងពីធ្វើកិច្ចសន្យានោះមករហូតមកដល់ពេលនេះ អត់ទាន់រុះរើ​ចេញទេ។

ក្នុងនាមលោកជាប៉ាស៊ីផ្សារ មិនអនុញ្ញាតិឲ្យធ្វើទេដែល​ចេញ​មកខុសគេតែឯងបែបនេះ ហើយអាជីវករលក់ដូរនៅជួរជាមួយ​គ្នា ក៏​ស្នើ​ចង់បានផ្លូវដើរនៅលើចិញ្ចើមផ្សារដូចពីមុនឡើងវិញ។

លោកបានបញ្ជាក់បន្ថែមថា ចំពោះបញ្ហានេះ លោកនឹងពិភាក្សាជាមួយរដ្ឋបាលក្រុងម្តងទៀត ដើម្បីកំណត់ពេលវេលាចុះពិនិត្យ និងមានវិធានការបន្ត៕

អត្ថបទ៖ ប្រុញ វិធិន