Ronaldo ស៊ុតមួយគ្រាប់យប់មិញ បង្គ្រប់គ្រាប់បាល់ ក្លាយជាម្ចាស់ស្បែកជើងមាស ២ ឆ្នាំជាប់គ្នា

ប្រធានក្រុមរបស់ Al-Nassr កីឡាករ Cristiano Ronaldo ក្រសោបបានតំណែងជាម្ចាស់ស្បែកជើងមាសរដូវកាល ២០២៤-២០២៥ ប្រចាំក្របខណ្ឌលីគ អារ៉ាប៊ីសាអ៊ូឌីត Saudi Pro League ជាផ្លូវការ។

ក្របខណ្ឌ Saudi Pro League បានបញ្ចប់រដូវកាល ២០២៤-២០២៥ ជាស្ថាពរ ក្នុងនោះក្រុម Al-Ittihad ដែលជាទ្រនំបច្ចុប្បន្នរបស់ Karim Benzema និង N’Golo Kante បានក្លាយជាម្ចាស់ជើងឯក ដោយឈរនៅលើ​ក្រុម​លេខ​ ២ Al-Hilal និងក្រុមលេខ ៣ Al-Nassr។

យ៉ាងណា បន្ទាប់ពីបញ្ចប់រដូវកាលនេះ ដ្បិត Ronaldo នៅពុំទាន់អាចជួយឱ្យ Al-Nassr ឈ្នះពានលីគក៏ដោយ ចាប់តាំងពីរូបគេផ្លាស់មកទីនេះ តាំងពីខែ មករា ឆ្នាំ ២០២៣ ប៉ុន្តែរូបគេបានបង្ហាញសមត្ថភាពស៊ុតបញ្ចូលទីយ៉ាងអស្ចារ្យ ដោយបានក្លាយជាអ្នកស៊ុតបញ្ចូលទីច្រើនជាងគេប្រចាំលីគកំពូល អារ៉ាប៊ីសាអ៊ូឌីត ២ រដូវកាលជាប់គ្នា។

រដូវកាលនេះខ្សែប្រយុទ្ធសញ្ជាតិ ព័រទុយហ្គាល់ វ័យ ៤០ ឆ្នាំ បានបន្តឈ្នះស្បែកជើងមាសទៀត បន្ទាប់ពីស៊ុតបញ្ចូលទីសរុបចំនួន ២៥ គ្រាប់ ឈរនៅលើ Ivan Toney ដែលមាន ២៣ គ្រាប់ និងកីឡាករ Abderrazak Hamdallah ដែលមាន ២១ គ្រាប់។

គួររម្លឹកថា កាលពីរដូវកាលមុន ២០២៣-២០២៤ កីឡាករ Ronaldo បានឈ្នះស្បែកជើងមាសជាលើកដំបូង បន្ទាប់ពីស៊ុតបញ្ចូលទីបានចំនួន ៣៥ គ្រាប់ ដោយឈរនៅលើកីឡាករ Aleksandar Mitrovic ដែលមាន ២៨ គ្រាប់៕

អត្ថបទ៖ សេម កុសល