វៀតណាម៖ ការវិនិយោគ​បរទេសកើនឡើង ទោះរងហានិភ័យជុំវិញពន្ធគយបដិការ

វៀតណាមបានទាក់ទាញការវិនិយោគផ្ទាល់ពីបរទេស (FDI) ចំនួន ១៣,៨២ ប៊ីលានដុល្លារអាមេរិក ចាប់តាំងពីដើមឆ្នាំ​មក ដោយកើនឡើងជិត ៤០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់កាសែត Viet Nam News កាលពីថ្ងៃចន្ទ។

ជាមួយគ្នានោះ ដើមទុនដែលបានបញ្ចេញ បានកើនឡើងដល់ ៦,៧៤ ប៊ីលាន​ដុល្លារ ​ដែល​ជាកម្រិតខ្ពស់បំផុត​ក្នុងរយៈពេល ៥ ឆ្នាំចុងក្រោយ​។ វាឆ្លុះបញ្ចាំងពីទំនុកចិត្តខ្ពស់របស់អ្នកវិនិយោគ​ក្នុងទីផ្សារ​វៀតណាម​ ទោះបីជាប្រទេសអាស៊ីអាគ្នេយ៍ដដែលរងនូវហានិភ័យពន្ធគយបដិការខ្ពស់ របស់ប្រធានាធិបតីអាមេរិក ដូណាល់ ត្រាំ ក៏ដោយ​។

តួរលេខ​ទាំងនេះ​ បានគូសបញ្ជាក់ថា វៀតណាមកាន់តែក្លាយជាទិសដៅវិនិយោគសកលកំពូល​ ជាពិសេស​ក្នុងបរិបទនៃការផ្លាស់ប្តូរខ្សែ​ច្រវ៉ាក់ផ្គត់ផ្គង់សកល និងកំណើននិន្នាការផ្លាស់ប្ដូរទីតាំងផលិតកម្មជាដើម។

សមាជិកនៃក្រុមប្រឹក្សាប្រឹក្សាគោលនយោបាយ​នាយករដ្ឋមន្ត្រីវៀតណាម លោក Cấn Văn Lực បានចង្អុលបង្ហាញថា សិង្ហបុរីបច្ចុប្បន្ននាំមុខគេក្នុងចំណោមប្រទេស និងដែនដីចំនួន ៦០ ដែលវិនិយោគនៅវៀតណាម ជាមួយនឹងទឹកប្រាក់សរុបចំនួន ១,៦ ប៊ីលាន​ដុល្លារ ឬ​ស្មើនឹង ២៨,៦ ភាគរយ នៃដើមទុនដែល​បាន​ចុះបញ្ជីថ្មី។​

បន្ទាប់មកគឺចិន ​ដែលដាក់ការវិនិយោគចំនួន ១,៥២ ប៊ីលាន​ដុល្លារ (២៧,១ ភាគរយ) ​និងជប៉ុន​ ដែលរួមចំណែក ៥៧៣,២ លាន​ដុល្លារ (១០,៣ ភាគរយ)។ ​ឧស្សាហកម្មផលិត និងកែច្នៃ បាន​រួមចំណែក ៨១ ភាគរយ លើដើមទុនដែលត្រូវបានបញ្ចេញ ដែលនេះ​ស្របតាមគោលនយោបាយ​វៀតណាម ក្នុងការទាក់ទាញការវិនិយោគទៅក្នុងវិស័យបច្ចេកវិទ្យាខ្ពស់ និងតម្លៃបន្ថែម៕