នគរបាលខេត្តស្វាយរៀង បង្ក្រាបទីតាំងកែច្នៃគ្រឿងញៀនពីរកន្លែងឃាត់ខ្លួនជនជាតិ​វៀតណាម​៨នាក់ និងថ្នាំញៀនជាង៥៦គីឡូក្រាម

កម្លាំងជំនាញការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តស្វាយរៀង សហការជាមួយកម្លាំងអធិការដ្ឋាននគរបាលក្រុងបាវិត កម្លាំងអធិការដ្ឋាននគរបាលក្រុងស្វាយរៀង បានបើកប្រតិបត្តិការបង្ក្រាបទីតាំងកែច្នៃគ្រឿងញៀនចំនួនពីរគោលដៅផ្សេងគ្នា ឃាត់ខ្លួនជនសង្ស័យជាជនជាតិវៀតណាម៨នាក់ និងរឹបអូសគ្រឿងញៀន និងសារធាតុផ្សំសរុបជាង៥៦គីឡូក្រាម។

ប្រតិបត្តិការនេះធ្វើឡើងកាលពីថ្ងៃទី២០ ដល់ថ្ងៃទី២២ ខែឧសភា ឆ្នាំ២០២៥ ក្រោមការសម្របសម្រួលនីតិវិធីពីលោក ដូរ៉ា អង្គប្រទាន ព្រះរាជអាជ្ញារងអមសាលាដំបូងខេត្តស្វាយរៀង។

តាមរបាយការណ៍របស់ស្នងការដ្ឋាននគរបាលខេត្តស្វាយរៀង ក្នុងប្រតិបត្តិការនេះ កម្លាំងជំនាញបានបង្ក្រាបនៅពីរគោលដៅផ្សេងគ្នា ទី១នៅក្រុងបាវិត រកឃើញសារធាតុញៀនសរុបទម្ងន់ ៦,២០១.៨៤ក្រាម(ជាង០៦គីឡូក្រាម) និងគោលដៅទី២ នៅផ្ទះជួលភូមិចេក សង្កាត់ចេក ក្រុងស្វាយរៀង រកឃើញសារធាតុញៀនសរុបទម្ងន់ ៥០,៧១៨.៩៨​ក្រាម​(៥០គីឡូ៧១៨.៩៨ក្រាម) រួមទាំងឧបករណ៍ និងសម្ភារៈកែច្នៃមួយចំនួនធំ។

បច្ចប្បន្នជនសង្ស័យរួមជាមួយវត្ថុតាងត្រូវបានបញ្ជួនទៅកាន់សាលាដំបូងខេត្តដើម្បីចាត់ការបន្តតាមច្បាប់៕