លេចវត្តមានជាថ្មីក្នុងកម្មវិធីបវរកញ្ញា! ផន ស្រីពី បញ្ជាក់ជំហរថា ទោះបរាជ័យច្រើនដងតែនឹងខំក្រោកយកឈ្នះខ្លួនឯង

ខណ:កំពុងលេចវត្តមានក្នុងការប្រកួតកម្មវិធីសម្រស់ Miss Cosmo Cambodia 2025 កញ្ញា ផន ស្រីពី បានចេញមកបញ្ជាក់ថា នាងមកលើកនេះ មិនដើម្បីយកឈ្នះនរណាទេ គឺដើម្បីយកឈ្នះខ្លួនឯងថ្វីត្បិតកន្លងមកធ្លាប់បរាជ័យច្រើនដង។

កញ្ញា ផន ស្រីពី ធ្លាប់ឆ្លងកាត់ការប្រកួតច្រើនលើកមកហើយ រួមមាន Mr & Miss Cambodia Koraw 2018 , Freshie Girl 2019 ដោយនាងទទួលបានចំណាត់ថា្នក់ Top 10 ។ លុះឆ្នាំ២០២៤ នាងសម្រេចក្តីស្រមៃមួយទៀតដោយដណ្តើមបានមកុដ Miss Grand Kampong Cham 2024 នៃកម្មវិធី Miss Grand Cambodia 2024 ខណ:កន្លងទៅ នាងត្រូវបានជ្រើសរើសឱ្យក្លាយជាបវរកញ្ញាតំណាងប្រទេសកម្ពុជា ដើម្បីចូលរួមក្នុងកម្មវិធី Miss Intercontinental 2024 ផងដែរ។

ទោះបីយ៉ាងណា ការបង្ហាញខ្លួនជាថ្មីនៅក្នុងការប្រកួត Miss Cosmo Cambodia ស្រាប់តែ ផន ស្រីពី បានឱ្យដឹងថា “ខ្ញុំតែងតែបរាជ័យ​ ហើយក៏លែងហ៊ានបន្តដំណើរទៅមុខ ព្រោះឧបសគ្គគ្រប់យ៉ាង​ ប៉ុន្តែខ្ញុំបានភ្លេចក្តីស្រមៃដ៏ធំធេងមួយ ខ្ញុំក្រោកឈរ​មិនមែនយកឈ្នះអ្នកណា ប៉ុន្តែខ្ញុំក្រោកឈរម្តងទៀត​ ដើម្បីយកឈ្នះខ្លួនឯងដើរទៅរកពន្លឺពេជ្រដ៏មានតម្លៃដែលនៅខាងមុខ”។

គួររម្លឹកថា អតីតបេក្ខភាព Miss Grand Cambodia 2024 កញ្ញា ផន ស្រីពី ដែលបច្ចុប្បន្នបាននិងកំពុងលេចមុខក្លាយជាបេក្ខភាពប្រកួតកម្មវិធី Miss Cosmo Cambodia 2025 បានប្តេជ្ញាឆន្ទ:របស់ខ្លួនថា នាងនឹងប្រើសំឡេងក្នុងការផ្សព្វផ្សាយវប្បធម៌និងអង្គរវត្ត ដើម្បីបង្ហាញភាពអស្ចារ្យទៅកាន់ឆាកអន្តរជាតិ៕ អត្ថបទ៖ ចាន់រ៉ា