សហស្ថាបនិកកង់បីអគ្គិសនីខ្មែរ ដាក់គោលដៅផលិតកង់បីឱ្យបាន២០០គ្រឿង

លោក ឈួន រតនា សហស្ថាបនិកកង់បីអគ្គិសនីខ្មែរ ត្រៀមដាក់គោលដៅផលិតកង់បីអគ្គិសនីឱ្យបានចន្លោះពី ១០០គ្រឿង ទៅ២០០គ្រឿង រយៈពេល៣ខែ ខណៈមានក្រុមហ៊ុន៣កំពុងពិចារណាចូលរួមសហការ។

លោក ឈួន រតនា ជាសហស្ថាបនិកកង់បីអគ្គិសនីខ្មែរ ដែលមានទីតាំងស្ថិតនៅក្រុងសិរីសោភ័ណ ខេត្តបន្ទាយមានជ័យ បានប្រាប់ កម្ពុជាថ្មីថា បច្ចុប្បន្ន សហគ្រាសផលិតកង់បីអគ្គិសនីរបស់លោក មានក្រុមហ៊ុន៣ កំពុងពិចារណាដាក់ទុន វិនិយោគដើម្បីធ្វើយ៉ាងណាផលិតកង់បីអគ្គិសនីឱ្យបានចំនួន ១០០គ្រឿង ទៅ២០០គ្រឿង រយៈពេល៣ខែ ខណៈមានប្រជាពលរដ្ឋខ្មែរជាច្រើនបានគាំទ្រការបង្កើតកង់បីអគ្គិសនីនេះឡើងមក។

សហស្ថាបនិករូបនេះ បានឱ្យដឹងទៀតថា កង់បីអគ្គិសនីនេះ ត្រូវបានបង្កើតឡើងមកដោយគំនិតឪពុកកូន៣នាក់ ពោលគឺលោកឪពុក ឈួន សុផាន់ និងកូនប្រុស២នាក់ គឺរូបលោក ឈួន រតនា និងប្អូនប្រុស ឈួន ណារ៉ា ដែលអ្នកទាំង៣បាននឹកឃើញតាំងពីឆ្នាំ២០២០មកម្ល៉េះ ប៉ុន្តែដោយពុំមានដើមទុនផលិត ទើបត្រូវពន្យាពេលរហូតមកដល់សព្វថ្ងៃនេះ។

សម្រាប់អត្ថប្រយោជន៍កង់បីអគ្គិសនីស្នាដៃកូនខ្មែរនេះវិញ លោក ឈួន រតនា បញ្ជាក់ថា៖ កង់បីអគ្គិសនីដែលផលិតដោយសហគ្រាសរបស់លោក បានចូលរួមកាត់បន្ថយការបំផ្លាញបរិស្ថានបានច្រើន ជាងនេះទៀត កង់បីអគ្គិសនីនេះ វាក៏បានចូលរួមកាត់បន្ថយការចំណាយរបស់អតិថិជនបានច្រើនជាងមុនថែមទៀតផង។

ទោះជាយ៉ាងណា ចំពោះតម្លៃនៃកង់បីអគ្គិសនីខ្មែរនេះ លោក ឈួន រតនា នៅពុំទាន់ហ៊ានបញ្ជាក់ពីតម្លៃណាមួយនៅឡើយ ខណៈនៅចាំទូទាត់ការចំណាយថ្លៃដើមរួចសិន ទើបលោកអាចប្រកាសតម្លៃជាផ្លូវការតាមក្រោយបាន។

កង់បីអគ្គិសនីខ្មែរដំបូងគេនេះ ត្រូវបានបង្កើតឡើងដោយឪពុកកូន៣នាក់ ដែលផ្ដើមចេញពីជាងម៉ាស៊ីនកសិកម្មតូចមួយនៅស្រុកកំណើតរបស់ពួកគាត់ ស្ថិតនៅក្រុងសិរីសោភ័ណ ខេត្តបន្ទាយមានជ័យ៕

អត្ថបទ ៖ សួស សិត