មេឆ្មាំបដិវត្តអ៊ីរ៉ង់និងមេទ័ពកំពូលៗច្រើននាក់ ស្លាប់ក្នុងការវាយប្រហាររបស់អ៊ីស្រាអែល 

ប្រព័ន្ធផ្សព្វផ្សាយរដ្ឋអ៊ីរ៉ង់ បានបញ្ជាក់ពីការស្លាប់មេបញ្ជាការឆ្មាំបដិវត្តឥស្លាមលោក Hossein Salami និងមេទ័ពកំពូលៗច្រើននាក់ផ្សេងទៀត ជាពិសេសលោក Mohammad Bagheri ក្នុងការវាយប្រហាររបស់អ៊ីស្រាអែល នៅថ្ងៃសុក្រទី១៣ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Times of Israel, ឆ្មាំបដិវត្តន៍អ៊ីរ៉ង់ គឺជាមជ្ឈមណ្ឌលថាមពលដ៏សំខាន់មួយនៅក្នុងប្រទេសនេះ ដែលពួកគេក៏គ្រប់គ្រងឃ្លាំងមីស៊ីលបាលិស្ទិករបស់ទីក្រុងតេហេរ៉ង់ផងដែរ។

មិនត្រឹមតែឆ្មាំបដិវត្តនិងមេទ័ពកំពូលៗទេ សូម្បីអ្នកជំនាញនុយក្លេអ៊ែរល្បីៗរបស់អ៊ីរ៉ង់ ក៏ត្រូវស្លាប់ក្រោមដៃអ៊ីស្រាអែលដែរ។

សូមជម្រាបថា អ៊ីស្រាអែល បានវាយប្រហារអ៊ីរ៉ង់យ៉ាងភ្ញាក់ផ្អើល ហើយក្រោយប្រតិបត្តិការនេះ រដ្ឋមន្ត្រីការពារជាតិអ៊ីស្រាអែល លោក Israel Katz បានប្រកាសដាក់ប្រទេសក្នុងគ្រាអាសន្នភ្លាម។

តាមការបញ្ជាក់ពីអ្នកនាំពាក្យកងកម្លាំងការពារអ៊ីស្រាអែល (IDF), ការវាយប្រហារនេះគឺដើម្បីប្រឆាំងកម្មវិធីនុយក្លេអ៊ែររបស់អ៊ីរ៉ង់ និងជាការឆ្លើយតបទៅនឹងភាពគឃ្លើនរបស់រដ្ឋាភិបាលទីក្រុងតេហេរ៉ង់ ដែលបន្តគំរាមកំហែងអ៊ីស្រាអែល។

ជុំវិញការវាយប្រហារនេះដែរ រដ្ឋមន្ត្រីការបរទេសអាមេរិក Marco Rubio បានចេញមុខបញ្ជាក់ថា ទីក្រុងវ៉ាស៊ីនតោន មិន​ជាប់​ពាក់ព័ន្ធ​​ទេ។ អ៊ីស្រាអែល​វាយ​អ៊ីរ៉ង់ គឺជា​ទង្វើ​ឯកតាភាគី៕

អត្ថបទ៖ សុខ សុវណ្ណ

ចុចអាន៖ វាយអ៊ីរ៉ង់រួច អ៊ីស្រាអែលប្រកាសដាក់ប្រទេសក្នុងគ្រាអាសន្ន ខណៈតម្លៃប្រេងសកល ហក់ឡើង