ពូទីន ប្រកាសធ្វើសមយុទ្ធយោធារួមគ្នាជាមួយចិននៅឆ្នាំ២០២៥

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាស​ថា រុស្ស៊ី និងចិនគ្រោងនឹងធ្វើសមយុទ្ធយោធារួមគ្នានៅឆ្នាំ​២០២៥ ដែលជា​ព្រឹត្តិការណ៍​ដ៏​សំខាន់មួយទៀតក្នុងការពង្រីកកិច្ចសហប្រតិបត្តិការការពារជាតិរបស់ពួកគេ។

ការប្រកាសនេះ បានធ្វើឡើងក្នុងអំឡុងសុន្ទរកថានៅឯវេទិកាសេដ្ឋកិច្ចអន្តរជាតិ St. Petersburg កាល​ពី​ថ្ងៃ​ពុធ​ទី​១៨​ខែ​មិថុនា ដែលលោក ពូទីន បានសង្កត់ធ្ងន់ថា សមយុទ្ធបែបនេះគឺជាផ្នែកនៃកិច្ចខិតខំប្រឹងប្រែងដ៏ទូលំទូលាយដើម្បីពង្រឹងទំនាក់ទំនងយោធា-បច្ចេកទេស និងឧស្សាហកម្មការពារជាតិរវាងប្រជាជាតិទាំងពីរ។

ព័ត៌មានលម្អិតទាក់ទងនឹង​ទំហំ ពេលវេលា ទីតាំង និងគោលបំណងប្រតិបត្តិការនៃសមយុទ្ធទាំងនេះ មិនត្រូវបានបង្ហាញ​ឲ្យ​ដឹងនោះទេ។ ទោះជាយ៉ាងណា សមយុទ្ធ​នេះ គឺស្របទៅនឹងនិន្នាការយុទ្ធសាស្រ្តនាពេលថ្មីៗនេះ ដោយបានពង្រឹង«ភាពជាដៃគូយុទ្ធសាស្ត្រទូលំទូលាយ»របស់ទីក្រុងមូស្គូ និងទីក្រុងប៉េកាំង ដែលជាទំនាក់ទំនងដែលបង្កើតដោយផលប្រយោជន៍ភូមិសាស្ត្រនយោបាយរួមគ្នា ដែលប្រទេសចិននៅតែប្រុងប្រយ័ត្ន​ចំពោះ​ការចូលរួម​​ក្នុង​សម្ព័ន្ធភាពយោធាផ្លូវការ។

អ្នកវិភាគកត់សំគាល់ថា សមយុទ្ធដែលបានគ្រោងទុកទាំងនេះ បង្កើតលើកិច្ចសហប្រតិបត្តិការយោធាកាន់តែខ្លាំងឡើងនៅទូទាំងតំបន់ រួមទាំងសមយុទ្ធកងទ័ពជើងទឹកនៅឈូងសមុទ្រអូម៉ង់កាលពីដើមឆ្នាំនេះ ដែលមានការចូលរួមពីរុស្ស៊ី ចិន និងអ៊ីរ៉ង់។ សកម្មភាពសហប្រតិបត្តិការទាំងនេះ គូសបញ្ជាក់ពីការផ្លាស់ប្តូរថាមវន្តសន្តិសុខសកល ដែលអាចបង្កបញ្ហាប្រឈមជាយុទ្ធសាស្ត្រសម្រាប់មហាអំណាចលោកខាងលិច។

ការប្រកាសពី​សមយុទ្ធ​នេះ ទៀត​សោត​ធ្វើឡើងបន្ទាប់ពីដំណើរទស្សនកិច្ចផ្លូវរដ្ឋរបស់ប្រធានាធិបតីចិនលោក ស៊ី ជីនពីង ទៅកាន់ទីក្រុងមូស្គូកាល​ពី​ខែឧសភា ក្នុងអំឡុងពេលដែលមេដឹកនាំទាំងពីរបានបញ្ជាក់ឡើងវិញនូវការប្តេជ្ញាចិត្តរបស់ពួកគេក្នុងការធ្វើ​ឲ្យ​ស៊ីជម្រៅ​​នូវ​កិច្ច​សហប្រតិបត្តិការយោធា និងសេដ្ឋកិច្ច ព្រមទាំងបានអនុម័តជាផ្លូវការនូវផែនការសម្រាប់សកម្មភាពរួមគ្នា។

ទាំង​រុស្ស៊ី និងចិន ប្រាប់​ទៅ​ពិភពលោក​​ថា ទំនាក់ទំនាក់​​ទ្វេ​ភាគី​របស់​ពួក​គេ​មិនមានគោលបំណង​​ប្រឆាំង​នឹង​ភាគី​​ណាមួយ​នោះ​ទេ។ យ៉ាង​ណា​មិញ មន្ត្រីលោកខាងលិចចាត់ទុកនិន្នាការនេះថាជាផ្នែក​មួយ​​នៃ​អំណាចផ្តាច់ការដែល​កំពុង​លេច​ចេញជា​រូបរាង​បណ្ដើរៗ​ ហើយ​​ពួក​គេហៅថា​ទំនាក់ទំនង​នេះ​ថា​ជា «ការ​បង្ក​ភាពចលាចល» ដែល​ប៉ះពាល់​ដល់​​សណ្តាប់ធ្នាប់អន្តរជាតិ៕

ដោយ៖ ឈាង