ព័ត៌មានអន្ដរជាតិ

តើកត្តាអ្វីធ្វើឲ្យ លោកស្រី ផែថងថាន សេសសល់ឱកាសតិចបំផុតរក្សាអំណាច?

បានផុស

១០ ខែ មុន

នៅ

ថ្ងៃសៅរ៍ ២១ មិថុនា ២០២៥

ដោយ

រដ្ឋាភិបាលចម្រុះដឹកនាំដោយគណបក្សភឿថៃដែលមានលោកស្រី ផែថងថាន ស៊ីណាវ៉ាត្រជានាយករដ្ឋមន្ត្រី ស្ទើរតែដួលរលំទៅហើយមកដល់ពេលនេះ បន្ទាប់ពីគណបក្ស Bhumjaithai ដែលមានអាសនៈសភារហូតដល់៦៩ បានប្រកាសដកខ្លួនកាលពីថ្ងៃទី១៨ខែមិថុនា និងរដ្ឋមន្ត្រីរហូតដល់៨រូបពីគណបក្សនេះបានប្រកាសលាលែងពីតំណែង។

លោកស្រី ផែថងថាន ស៊ីណាវ៉ាត្រ លើកដីថ្វាយបង្គំមហាក្សត្រថៃ ក្នុងថ្ងៃស្បថចូលកាន់តំណែង។ Reuters

នាយករដ្ឋមន្ត្រីផែថងថាន បានថ្វាយបង្គំរូបឆាយាល័ក្ខរបស់មហាក្សត្រថៃ ក្រោយពេលជាប់ជានាយករដ្ឋមន្ត្រី។ FB

បើទោះបីជា លោក Sorawong Thienthong អគ្គលេខាធិការគណបក្សភឿថៃ និងកាន់តួនាទីជារដ្ឋមន្ត្រី ក្រសួងទេសចរណ៍និងកីឡា បានចេញមុខធ្វើអត្ថាធិប្បាយការពារនៅរសៀលថ្ងៃសៅរ៍នេះ ថា លោកស្រី នាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) នឹងមិនលាលែងពីតំណែង ឬប្រកាសរំលាយសភា ដោយប្តេជ្ញាបន្តកាន់តំណែងពេញមួយអាណត្តិ និងជំរុញទៅមុខជាមួយនឹងគោលនយោបាយរបស់លោកស្រី គឺគ្រាន់តែខ្ចីពេលវេលាខ្លះប៉ុណ្ណោះ ព្រោះអំណាចពិតប្រាកដមិនស្ថិតនៅលើគណបក្សភឿថៃជាអ្នកសម្រេចឡើយ។

រដ្ឋាភិបាលចម្រុះថៃក្នុងអាណត្តិនេះ កើតឡើងដោយសារសម្ព័ន្ធគណបក្សរហូតដល់១១ ដែលមានចំនួនសមាជិកសភាសរុប៣២៤ ដែលលើមធ្យមភាគនៃសមាជិកសភាទាំងអស់ចំនួន៥០០ (សមាជិកសភាក្នុងតួនាទីមាន៤៩៥)។

ក្រោយគណបក្ស Bhumjaithai បានប្រកាសដកខ្លួនពីរដ្ឋាភិបាលចម្រុះ គឺសមាជិកសភារបស់ខ្លួន៦៩ បានបាត់បង់សុពលភាពពីរដ្ឋាភិបាលចម្រុះដូចគ្នា។ ដូចនេះ សមាជិកសភាក្នុងរដ្ឋាភិបាលចម្រុះសរុប៣២៤នោះ គឺនៅសល់ ២៥៥ប៉ុណ្ណោះ ដែលលើមធ្យមភាគត្រឹមតែ៧សំឡេងប៉ុណ្ណោះ។

បច្ចុប្បន្ននេះគណបក្សធំៗដែលនៅសេសសល់ក្នុងរដ្ឋាភិបាលចម្រុះ មានដូចជា គណបក្ស ជាតិថៃរួបរួម (United Thai Nations) ដែលមាន៣៦អាសនៈ គណបក្ស Klatham មាន២៦អាសនៈ គណបក្សប្រជាធិបតេយ្យ (Democrat) មាន២៥អាសនៈ គណបក្ស Charthaipattana មាន១០អាសនៈ គណបក្ស Prachachat មាន១០អាសនៈ ហើយគណបក្សក្រៅពីនោះក្នុងរដ្ឋាភិបាលគឺមានអាសនៈតិចតួចពី១ទៅ៣អាសនៈប៉ុណ្ណោះ។

លោកស្រី ផែថងថាន ពេលស្បថចូលកាន់តំណែងកាលពីខែសីហា។ Reuters

ក្នុងករណីបែបនេះ បើគណបក្សណាមួយក្នុងចំណោមគណបក្សខាងលើ ប្រកាសដកខ្លួនចេញពីរដ្ឋាភិបាលចម្រុះ នោះរដ្ឋាភិបាលដឹកនាំដឹកនាំដោយគណបក្សភឿថៃនឹងអស់សុពលភាពភ្លាម ព្រោះសមាជិកសភានៃរដ្ឋាភិបាលចម្រុះតិចជាងមធ្យមភាគ ៥០បូក១។

ផ្អែកតាមទិន្នន័យនេះ គណបក្សភឿថៃដែលកំពុងដឹកនាំរដ្ឋាភិបាលចម្រុះ ត្រូវថ្នមចិត្តគណបក្សផ្សេងៗដែលមានអាសន្នច្រើនខាងលើនេះខ្លាំងណាស់ដើម្បីទប់សភាពការណ៍ឲ្យមានស្ថិរភាព។

ក្នុងចំណោមគណបក្សធំៗខាងលើ គឺមានគណបក្ស (United Thai Nations) ដែលមាន៣៦អាសនៈ ដែលបង្កើតឡើងដោយអតីតៈនាយករដ្ឋមន្ត្រី ប្រាយុធ ចាន់អូចា ដែលមានប្រវត្តិជាអគ្គមេបញ្ជាការកងទ័ពជាតិ និងធ្វើរដ្ឋប្រហារទម្លាក់អតីតនាយករដ្ឋមន្ត្រី យីងឡាក់ ស៊ីណាវ៉ាត្រ បានចេញមុខតវ៉ាយ៉ាងខ្លាំងឲ្យនាយករដ្ឋមន្ត្រី ផែថងថាន ស៊ីណាវ៉ាត្រ ចេញទទួលខុសត្រូវចំពោះការសន្ទនាជាមួយសម្តេចតេជោ ដោយការលាលែងពីនាយករដ្ឋមន្ត្រី ហើយ ដាក់បេក្ខភាពថ្មីជំនួស។

ការបង្ហាញគោលជំហរឲ្យទទួលខុសត្រូវរបស់នាយករដ្ឋមន្ត្រីផែថងថាន ស៊ីណាវ៉ាត្រ ដោយការលាលែង គឺកើតក្នុងចំណោមគណបក្សធំៗមួយចំនួនខាងលើ។

ដូចនេះ បច្ចុប្បន្ននេះអំណាចនៃការសម្រេចមិនស្ថិតនៅលើការប្តេជ្ញាចិត្តរបស់នាយករដ្ឋមន្ត្រី ផែថងថាន ស៊ីណាវ៉ាត្រ ជាអ្នកសម្រេចក្នុងការបន្តនោះទេ គឺអំណាចបានធ្លាក់ទៅលើគណបក្សដែលមានសំឡេងច្រើនក្នុងរដ្ឋាភិបាលចម្រុះ។

និយាយឲ្យចំ គឺ លោកស្រី ផែថងថាន រងចាំតែពេលវេលាប៉ុណ្ណោះ ដោយគ្មានអំណាចតវ៉ាច្រើននោះទេ៕

រ៉ាន់ រើយ