ព័ត៌មានជាតិ

១៣ ឆ្នាំចុងក្រោយ ក្រុងសៀមរាបបញ្ចៀសបានការជន់លិចពីជំនន់ទឹកភ្លៀង ក្រោយប្រព័ន្ធធារាសាស្ត្របុរាណបានស្តារឡើងវិញ

បានផុស

១ year មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

ប្រធាននាយកដ្ឋានគ្រប់គ្រងព្រៃឈើ ទឹក និងហេដ្ឋារចនាសម្ព័ន្ធ នៃអាជ្ញាធរជាតិអប្សរាបានឲ្យដឹងថា ក្រោយការស្តារជួសជុលប្រព័ន្ធធារាសាស្ត្រឡើងវិញ បានទប់ស្កាត់ក្រុងសៀមរាបនិងតំបន់អង្គរបញ្ចៀសបានការជន់លិចពីគ្រោះទឹកជំនន់។

លោក ភឿន សុឃីម ប្រធាននាយកដ្ឋានគ្រប់គ្រងព្រៃឈើ ទឹក និងហេដ្ឋារចនាសម្ព័ន្ធ នៃអាជ្ញាធរជាតិអប្សរា បានបញ្ជាក់ថា មុនឆ្នាំ ២០១២ ក្រោយភ្លៀងខ្លាំងពីតំបន់ភ្នំគូលែន ក្រុងសៀមរាប និងតំបន់អង្គរមួយផ្នែកតែងតែរងការជន់លិចពីទឹកជំនន់ជារៀងរាល់ឆ្នាំ។ នៅអំឡុងខែវស្សា ក្រុងសៀមរាបរងការជន់លិចពី ៣ ទៅ ៤ ដងក្នុងមួយឆ្នាំ ប៉ុន្តែក្រោយការស្តារជួសជុលប្រព័ន្ធធារាសាស្ត្របុរាណឡើងវិញ ក្នុងរយៈពេល ១៣ ឆ្នាំចុងក្រោយនេះ បានគ្រប់គ្រងបញ្ចៀសបានការជន់លិចក្រុងសៀមរាបនិងតំបន់អង្គរ រហូតដល់ពលរដ្ឋមួយចំនួនភ្លេចគិតពីគ្រោះជំនន់ទឹកភ្លៀងថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមន្រ្តីបច្ចេកទេសអាជ្ញាធរជាតិអប្សរា ការស្តារប្រព័ន្ធធារាសាស្ត្រឡើងវិញនៅតំបន់ក្រុងអង្គរគឺធ្វើទៅតាមលំនាំប្រព័ន្ធផ្លូវទឹកបុរាណ គឺស្តារទៅតាមប្រព័ន្ធចាស់ដែលមានស្រាប់។

តាមការស្រាវជ្រាវផ្ទៃរងទឹកភ្លៀងនៅតំបន់សៀមរាបអង្គរចែកចេញជា ៣ ទីមួយមានស្ទឹងសៀមរាប ទីពីរស្ទឹងពួក និងទីបីស្ទឹងរលួស។ បើតាមការគណនា ធារទឹកនៅតំបន់ឧទ្យានអង្គរតាមរយៈអាងស្តុកទឹកធំៗមានបារាយ កសិណ ត្រពាំង ស្រះ ក្នុងមួយឆ្នាំៗទទួលបានបរិមាណធារទឹកប្រមាណ ១១០ លានម៉ែត្រគីប ហើយប្រហែល ៨០% ត្រូវបានប្រមូលទុកសម្រាប់បម្រើការប្រើប្រាស់ផ្សេងៗ។

លោក ភឿន សុឃីម បានឲ្យដឹងថា នៅតំបន់អង្គរមានបារាយណ៍ធំៗចំនួន ៥ ត្រូវបានសាងសង់នាសម័យអាណាចក្រខ្មែរដែលក្នុងនោះរួមមានបារាយណ៍លលៃ (រលួស) បារាយណ៍ខាងកើត (ស្រះស្រង់) បារាយណ៍ខាងលិច (ទឹកថ្លា) បារាយណ៍ខាងជើង (នាគព័ន្ធ) និងបារាយណ៍អាគ្នេយ៍ ដែលបច្ចុប្បន្នត្រូវបានស្តារនិងជួសជុលបាន ៩០% មានប្រវែង ៩៣ គីឡូម៉ែត្រ៕