ថៃ ធ្លាប់ផ្ទុះរឿងអាស្រូវដ៏អាម៉ាស់២ដង លួចត្បូងពេជ្រក្នុងវាំង និងសម្លាប់អ្នកការទូតអារ៉ាប៊ីសាអូឌីត

កាលពីចុងទសវត្សរ៍ឆ្នាំ ១៩៨០ ប្រទេសថៃបានរងនូវការអាម៉ាស់យ៉ាងធ្ងន់ធ្ងរលើឆាកអន្តរជាតិ បន្ទាប់ពីពលរដ្ឋរបស់ខ្លួនបានលួចគ្រឿងអលង្ការ និងត្បូងពេជ្រក្នុងវាំងនៅប្រទេសអារ៉ាប៊ីសាអូឌីត ព្រមទាំងសម្លាប់អ្នកការទូត ដោយកាលណោះ នាំឲ្យមានជម្លោះដ៏ធ្ងន់ធ្ងរនៅក្នុងប្រវត្តិសាស្ត្រប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រម្លឹកទៅកាន់ទៅឆ្នាំ ១៩៨៩ អ្នកយាមជនជាតិថៃម្នាក់ឈ្មោះ Kriangkrai Techamong ធ្វើការនៅរាជវាំងរបស់ព្រះអង្គម្ចាស់អារ៉ាប៊ីសាអូឌីតក្នុងទីក្រុង Riyadh នៅយប់មួយគាត់បានលួចគ្រឿងអលង្ការ និងត្បូងមានតម្លៃប្រហែល ២០ លានដុល្លារ រួមទាំងពេជ្រពណ៌ខៀវដ៏កម្រមួយ (Blue Diamond Affair) ។

ទោះជាយ៉ាងណាក៏ដោយ នៅពេលដែលបុរសរូបនោះលួចបានភ្លាម ក៏សម្រេចចិត្តចាកចេញទៅកាន់ប្រទេសថៃ​ ដោយ​លាក់វានៅ​ក្នុង​ម៉ាស៊ីន​បូម​ធូលីមួយ។ វត្ថុដែលគេលួចនោះ ក្រោយមកត្រូវបានប៉ូលិសថៃរឹបអូសបាន ប៉ុន្តែភាគច្រើននៃវត្ថុទាំងនោះបានបាត់យ៉ាងអាថ៌កំបាំង ជំនួសដោយរបស់ក្លែងក្លាយ។ ជាពិសេស ត្បូងដ៏មានតម្លៃបំផុតដែលជាត្បូងពេជ្រពណ៌ខៀវដ៏កម្រ ៥០ ការ៉ាត់ របស់សែរាជវង្សអារ៉ាប៊ីសាអូឌីត បែរជារកមិនឃើញទៅវិញ។

យ៉ាងណា ដើម្បីលុបលាងកំហុស អតីត​អ្នក​យាម​នៅ​វាំង​ក្នុង​ទីក្រុង Riyadh រូបនេះ បាន​សម្រេចចូលបួស​នៅ​វត្ត Tha Makwaen ក្នុងស្រុកកំណើត​របស់​គាត់។ លោក​មាន​បំណង​បួស​ជា​ព្រះសង្ឃ​ដោយ​គ្មាន​កំណត់ ហើយ​ទុក​គ្រួសារ​ចោល​ ដោយជឿថា សំណាងអាក្រក់បានតាមយាយីតាំងពីរឿងលួចត្បូងពណ៌ខៀវ។ គាត់​បាន​ជួប​បញ្ហា​ម្តង​ហើយ​ម្តង​ទៀត រួម​ទាំង​រថយន្ត​ធុន​ធំ​បុក​​រថយន្ត​គាត់ ដែល​គាត់​បាន​រួច​ផុត​ពី​សេចក្តី​ស្លាប់ទាំងអស់។

មិនទាន់បញ្ចប់ត្រឹមនេះទេ នៅឆ្នាំ ១៩៩០ អ្នកការទូតអារ៉ាប៊ីសាអូឌីតបីនាក់នៅទីក្រុងបាងកក ត្រូវបានសម្លាប់នៅក្នុងការវាយប្រហារដាច់ដោយឡែក ហើយករណីទាំងនោះនៅតែមិនអាចដោះស្រាយបាន។ អ្វីដែលធ្វើឲ្យប្រទេសកាន់សាសនាឥស្លាមកាន់តែមានកំហឹង ពោលគឺអ្នកជំនួញម្នាក់ដែលអារ៉ាប៊ីសាអូឌីតបញ្ចូនមកស៊ើបអង្កេតគ្រឿងអលង្ការ ដែលត្រូវបានគេលួច ស្រាប់តែស្លាប់ដោយពុំដឹងមូលហេតុ ហើយគេសន្មតថាជាករណីឃាតកម្ម។

មន្ត្រីប៉ូលិសថៃជាច្រើននាក់ត្រូវបានចោទប្រកាន់ពីបទពុករលួយ ហើយម្នាក់ទៀតគឺលោក ឧត្តមសេនីយ៍ឯក Chalor Kerdthes ត្រូវកាត់ទោសប្រហារជីវិតដោយតុលាការកំពូលពីបទធ្វើឃាត ពាក់ព័ន្ធនឹងការសម្លាប់គ្រួសារឈ្មួញត្បូងម្នាក់។ ក្រោយមកត្រូវបានកាត់បន្ថយមកត្រឹម ៥០ ឆ្នាំ ដោយការលើកលែងទោសពីព្រះមហាក្សត្រ។

ដោយមានការមិនទុកចិត្តយ៉ាងខ្លាំងចំពោះអាជ្ញាធរថៃនិងជឿថា អំពើពុករលួយកម្រិតខ្ពស់បានរារាំងយុត្តិធម៌។ នៅឆ្នាំដដែលនោះ ទំនាក់ទំនងការទូតរវាងអារ៉ាប៊ីសាអូឌីតនិងថៃ បានធ្លាក់ចុះយ៉ាងធ្ងន់ធ្ងរ ពោលគឺ ប្រទេសមួយនេះ បានចេញច្បាប់ ហាម​ពលករ​ថៃ​ធ្វើ​ដំណើរ​ចូលមកធ្វើការ, ដកហូតទិដ្ឋាការ និងលិខិតអនុញ្ញាតការងារ ដោយកាត់ផ្តាច់ប្រភពចំណូលដ៏សំខាន់សម្រាប់ពលករថៃ ព្រមទាំងបង្កកគំនិតផ្តួចផ្តើមពាណិជ្ជកម្ម និងទេសចរណ៍ថ្មីថែមទៀតផង។

យ៉ាងណាមិញ បន្ទាប់ពីរឹតបន្តឹងអស់រយៈពេលជាង៣០ ឆ្នាំ និងតានតឹងជាច្រើនទសវត្សរ៍ ប្រទេសទាំងពីរបានស្តារទំនាក់ទំនងការទូតឡើងវិញជាផ្លូវការនៅខែមករាឆ្នាំ ២០២២។ នាពេលនោះ រាជទាយាទអារ៉ាប៊ីសាអូឌីត Mohammed bin Salman និងនាយករដ្ឋមន្ត្រីថៃ ប្រាយុទ្ធ ចាន់អូចា  បានជួបពិភាក្សាជាប្រវត្តិសាស្ត្រ។ ទាំងនោះបាននាំឲ្យមានការបើកស្ថានទូតឡើងវិញ, ការស្ដារឡើងវិញនូវការធ្វើចំណាកស្រុក បូករួមនឹងកិច្ចព្រមព្រៀងវិនិយោគ និងទេសចរណ៍ទ្វេភាគី៕

អត្ថបទ៖ សាង ស្រីល័ក្ខ

ចុចអាន៖ប្រវត្តិខ្លះៗ​របស់មេចលនាអាវលឿង សន្ធិ លឹម ថុងគុល ដែល​ប្រកាសចង់បានទឹកដីកម្ពុជា