នយោបាយ

សភានឹងបើកកិច្ចប្រជុំវិសាមញ្ញដើម្បីធ្វើវិសោធនកម្មរដ្ឋធម្មនុញ្ញនៅសប្ដាហ៍ក្រោយ

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

ប្រធានព្រឹទ្ធសភា សម្ដេចតេជោ ហ៊ុន សែន បានឱ្យដឹងថានៅថ្ងៃទី១១ ខែកក្កដា ឆ្នាំ២០២៥ខាងមុខ សភាជាតិនឹងបើកកិច្ចប្រជុំវិសាមញ្ញដើម្បីធ្វើវិសោធនកម្មរដ្ឋធម្មនុញ្ញាបើកឱកាសដល់ការដកសញ្ញាតិខ្មែរណាដែលចូលដៃជើងជាមួយបរទេសបំផ្លាញកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីជួបជុំសិស្ស និស្សិត បុគ្គលិកអប់រំនៃមជ្ឈមណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង ព្រឹកថ្ងៃទី៣ ខែកក្កដា ឆ្នាំ២០២៥នេះ សម្ដេចតេជោ ហ៊ុន សែន ថាការធ្វើវិសោធនកម្មនេះគឺបន្ទាប់ពីក្រុមប្រឹក្សាធម្មនុញ្ញប្រកាសពីភាពស្របធម្មនុញ្ញចំពោះការរៀបចំច្បាប់ថ្មីនេះ។

សម្ដេចថា៖ «សូមពួកអ្នកឯង(ក្រុមប្រឆាំង)ឃុបឃិតជាមួយបរទេសទៀតទៅ»។

សម្ដេចតេជោបញ្ជាក់ថាការកែប្រែរដ្ឋធម្មនុញ្ញនេះត្រូវបានសមាជិកសភាទាំង១២៥រូប និងរដ្ឋាភិបាលបានទូលស្នើទៅព្រះមហាក្សត្រ និងត្រូវបានព្រះអង្គសួរទៅក្រុមប្រឹក្សាធម្មនុញ្ញរួចរាល់ផងដែរ។

ក្រុមប្រឹក្សាធម្មនុញ្ញកាលពីថ្ងៃទី២ ខែកក្កដា បានបើកកិច្ចប្រជុំពេញអង្គក្រាបបង្គំទូលថ្វាយអង្គព្រះមហាក្សត្រ ពាក់ព័ន្ធនឹងការធ្វើវិសោធនកម្មមាត្រា៣៣នៃរដ្ឋធម្មនុញ្ញ ដោយបានបង្គំទូលថ្វាយថា ការធ្វើវិសោធនកម្មមាត្រា៣៣នៃរដ្ឋធម្មនុញ្ញប្រទេសកម្ពុជា «អាចធ្វើទៅបាន»។

គំនិតផ្ដួចផ្ដើមឱ្យមានការធ្វើវិសោធនកម្មរដ្ឋធម្មនុញ្ញដើម្បីដកសញ្ជាតិពលរដ្ឋខ្មែរណាដែលចូលដៃជើងជាមួយបរទេសបំផ្លាញប្រយោជន៍ជាតិ ត្រូវបានលើកឡើងដោយសម្ដេចតេជោ ហ៊ុន សែន ក្នុងពេលដែលសម្ដេចចុះជួបសំណេះសំណាលជាមួយសមាជិកក្រុមប្រឹក្សាឃុំសង្កាត់ ស្រុកក្រុង នៅខេត្តព្រះវិហារកាលពីថ្ងៃទី២៧ ខែមិថុនា ឆ្នាំ២០២៥កន្លងទៅ។ សម្ដេចថាការសម្រេចនេះគឺដោយសារអ្នកជ្រុលនិយមខ្លះប្រឆាំងហួសហេតុពេកមិនគិតផលប្រយោជន៍ជាតិ៕